THLAIHHLEI
Daniel Chimchungbia ah Messiah Chuahnak Kong Chimchung A Si Ning
PROFET Daniel cu Jesuh chuah hlan kum 500 leng ah a rak nungmi a si. Asinain, Messiah asiloah Khrih in Jesuh chiti thuh a si ni caan te kha Khrihfa pawl tuak khawh awkah a kong tete pe in Jehovah nih Daniel kha a rak chimh. Daniel cu hitin a ti: “Jerusalem cu hmasa a si ningah khan a siter ṭhan lai i sak a si ṭhan lai ti bia a chuah ri in Pathian thimmi [“Messiah,” NW] a chuah tiangah, zarh sarih a rau lai; cun zarh sawm ruk le zarh hnih chung cu hmasa a sining ah khan siter ṭhan a si lai.”—Daniel 9:25.
Messiah a chuah lai caan kha hngalh awkah hmasa bik ah Messiah a chuahnak ding caan relnak a hram thawk kha theih a hau. Chimchungbia ningah ‘Jerusalem sak a si ṭhan lai ti bia a chuah kum in’ aa thawk lai. Zei tik ah dah cu bia cu chuah a rak si? Baibal ṭialtu Nehemiah chim ningin, Jerusalem khua kulhnak vanpang sak ṭhannak nawl chuah caan cu “Artazaksis siangpahrang a bawi kum kulnak” ah a si. (Nehemiah 2:1, 5-8) Tuanbia ṭialtu hna nih B.C. 474 cu Artazaksis a bawi kum khat a tlin kum a si tiah an ti. Cucaah a bawi kum kulnak cu B.C. 455 a si. Atu ah Daniel i Messiah kong chimchungbia caah caan a hram thawknak cu B.C. 455 a si kha kan hngalh cang.
Daniel nih “Messiah” a chuah tiang zei can dah a rauh lai kha a rak langhter. Chimchungbia nih “zarh sarih a rau lai; cun sawm ruk le zarh hnih” a si lai tiah a ti i a zapi fonh ah zarh 69 a si. Cu caan cu zei can dah a rauh lai? Baibal cheukhat nih ni sarih a ummi ni zarh kha si loin zarh kum a si tiah an langhter. Cu a si caah zarh khat nih kum sarih kha a aiawh. Zarh kum hna asiloah kum sarih a ummi zarh timi ruahnak kha hlanlio Judah mi nih ṭha tein an hngalh. Tahchunhnak ah, kum sarihnak kum fate kha Sabbath kum ah an hman. (Exodus 23:10, 11) Cu a si caah, chimchungbia chung i zarh 69 cu zarh khat ah kum sarih a ummi zarh 69 asiloah a zapi fonh ah kum 483 a si.
Atu kan vun tuak chun lai. B.C. 455 in rel kan i thawk ahcun kum 483 cu A.D. 29 ah a phan. Cu kum cu Jesuh tipil a in i Messiah a si kum caan te kha a si! * (Luka 3:1, 2, 21, 22) Cucu Baibal chimchungbia chingchiah awk tlak in a tlinmi a si lo maw?
^ cat. 6 B.C. 455 in B.C. 1 tiang cu kum 454 a si. B.C. 1 in A.D. 1 cu kum khat a si (zero kum a um lo). A.D. 1 in A.D. 29 tiang cu kum 28 a si. Cu pathum cu kan fonh ahcun kum 483 a si. Zarh 70 nak kum chung i a ummi A.D. 33 ah Jesuh cu an rak “thah.”—(Daniel 9:24, 26) Hi chimchungbia kong hi tamdeuh in hngalh na duh ahcun ဒံယေလပဖက်ပြုချက်ကို ဂရုပြုလော့! cauk ṭhen 11 nak le Insight on the Scriptures, Volume 2, cahmai 899-901 kha zoh. A pahnih in Jehovah Hngaltu hna chuahmi a si.
