NA BAIBAL nih Salm 83:18 kha zeitindah a leh? New World Translation of the Holy Scriptures nih cun hitin a leh: “Jehovah tiah min a ngeimi nangmah lawnglawng hi vawlei cung dihlak uktu Cung Nung Bik na si kha hngal hna seh.” A dang Baibal lehnak tampi zong nih cuticun an leh ve. Asinain, Baibal lehnak tampi nih Jehovah timi min kha an hrelh tak asiloah “Bawipa” asilole “Zungzal Pathian” timi upatnak min in an thlen. Hi Baibal cang zawn ahhin zeidah aa tel awk a si? Upatnak min maw, Jehovah min dah?

Hika zawn cacang nih hin min kong a chimmi a si. Baibal cang tampi ṭialnak ah hmanmi a hrampi Hebru holh ah pumpak min kha cuka zawn ah an langhter. Hebru cafang in יהוה (YHWH) tiah cafang fonh a si. Lai holh in cu min cu “Jehovah” tiah an leh. Baibal ah cu ka lawng ah maw Pathian min cu a um? A si lo. Hebru Cathiang ah voi 7,000 hrawng a um!

Pathian min cu zei tluk in dah a biapit? Jesuh Khrih pekmi zohchunh awk thlacamnak kha ruathmanh. Hiti hin aa thawk: “Vancung khua i a um kan Pa, na min thiang cu upat si ko seh.” (Matthai 6:9) A hnuah Jesuh cu Pathian sinah hiti hin thla a rak cam: “Kan Pa, na min thiang cu upat si ko seh.” Vancung in Pathian nih “upatnak cu ka pek cang i ka pek ko rih lai” tiah a run leh. (Johan 12:28) Pathian min hi biapi bik a si cu a fiang ko. Cu a si ahcun zeicahdah Baibal lettu cheukhat nih an lehmi Baibal ah cu min cu an hrelh tak i upatnak min in an thlen?

A ruang pahnih ruangah hin si dawh a si bik. Pakhatnak cu a hram thawk aw chuah kha atu ah kan hngalh ti lo caah hman ding a si ti lo tiah mi tampi nih an ti. Hlanlio Hebru ca cu cafangaw a ngei lo. Cucaah YHWH timi hi Baibal chan lio minung nih zeiti set in dah a aw an chuah kha tuchan ah ahohmanh nih kan hngal kho ti lo. Asinain, cunih cun Pathian min hman kha a kan  dawnh awk a si maw? Baibal chan lio ah, Jesuh min aw chuah hi Yeshua asilole Yehoshua tiah rak rel dawh a si—ahohmanh nih fiang tein an chim kho lo. Asinain, nihin vawlei cung mi vialte nih Jesuh timi min hi anmahle an holh i hman bikmi aw chuah phunphun in an auh. Kum zabu pakhatnak i hmanmi aw chuah kha an hngalh lo ruangah Jesuh min kha hman lo in an um hlei lo. Cu bantuk cun ram dang i khual na tlawn ahcun, an holh in na min kha aw chuah phundang in an chuah kha na hmuh lai. Cu a si caah, Pathian min hlanlio i awchuahning fiangte in hngalh a si lo ruangah hman lo ding a si lo.

Pathian min Baibal chungah an hrelhnak a ruang pahnihnak cu Judah mi hna nih phung an thluk tuk ruangah a si. Judah mi hna nih Pathian min kha a aw chuah in zei tik hmanh ah hman ding a si lo tiah an ruah. Cutin an ruah cu hi Baibal nawlbia hi phundang in an ruah sual caah a si ti cu a fiang ko: “BAWIPA nan Pathian min cu ningcang lo in hmang hlah u, ningcang lo in ka min a hmangmi cu dan ka tat hna lai.”—Exodus 20:7.

Hi nawlbia nih hin Pathian min ningcang lo in hman kha a thlauh. Asinain upatnak in hman kha tah a thlauh maw? Thlauh hlah. Hebru Baibal (“Biakam Hlun”) ṭialtu hna cu Pathian nih hlan lio Israel mi hna Nawlbia a rak pek hna lio i a nungmi zumhfekmi an si. Asinain Pathian min kha atu le atu an rak hman. Tahchunhnak ah, annih nih Pathian a biami hna a bubu in thangpi in hla an sakmi, salm hla tampi chungah an rak langhter. Jehovah Pathian nih a biatu hna kha a min auh awkah a chimh hna i zumhawktlakmi nih an rak hman. (Joel 2:32; Lamkaltu 2:21) Cucaah tuchan Khrihfa hna zong Jesuh bantukin Pathian min upatnak in hman kha an i cungcang lo.—Johan 17:26.

Baibal lettu hna nih Pathian min zawn kha upatnak min in an thlen caah sualnak nganpi an tuah. Pathian kha hlatpi ah a ummi le pum a ngei lomi bantuk an siter, a taktak ahcun Baibal nih mi kha “Jehovah he i hawikomh” awkah a forh hna. (Salm 25:14, NW) Na komhmi na hawikom pakhat kong khi hei ruat hmanh. A ngaingai hei ti ah a min na hngalh lo ahcun zei tluk in dah nan i komh khawh lai? Cu bantuk cun mi nih Pathian min Jehovah kha zei an rel lo ahcun, Pathian cu zeitindah an naih taktak khawh lai? Cupinah, mi nih Pathian min an hman lo tikah  sullam a ngei tukmi, cu min he aa pehtlaimi hngalhnak zong an ngei kho lo. Pathian min sullam cu zeidah a si?

Pathian nih zumhawktlakmi a sal Moses kha a min sullam a rak chimh. Moses nih Pathian min a hal tikah Jehovah nih hitin a rak leh: “Ka siter laimi kha ka siter lai.” (Exodus 3:14, NW) Rotherham nih mah bia kha hiti hin a leh: “Si ka duh ningin ka si lai.” Cucaah Jehovah cu aa tinhmi tlinter awkah a herh ningin a si kho.

Si na duh ning paoh in na si kho tiah hei ti u sih. Na hawile caah zeidah na tuah lai? Na hawi pakhat a zawt a zual ngai a si ahcun a thiam ngaimi sibawi pakhat na si lai i na damter lai. Na hawi dang pakhat tangka tampi a sungh a si ahcun thil ṭha a tuahtu mirum pakhat na hung si kho i na bawmh khawh. Asinain a tak ti ahcun si na duhmi si awkah ri na ngei. Kan zapi in ri kan ngei dih. Baibal na hlathlai tikah Jehovah nih a biakam tlinter awkah a herh ning paoh in a hung si khawh kha khuaruahhar in na hmuh lai. A dawtmi hna ṭhatnak caah a ṭhawnnak a hman tikah aa nuam. (2 Chanrelnak 16:9) Jehovah min a hngal lomi tu nih cun aa dawhmi a ziaza hna kha an hngal kho lo.

Jehovah timi min hi Baibal ah a um ti cu a fiang ko. Cu min a sullam hngalh le biaknak ah zalong tein hmannak nih vancung kan Pa, Jehovah he i hawikomh awkah mi a bawmh. *