BAIBAL nih Jesuh zeitik ah a chuah kha a chim lo. Asinain, December thla ah a chuak lo ti khawh awkah a kong a um.

Jesuh chuahnak Bethlehem khua i khuacaan umtuning kha i ruah u sih. Judah thla Chislev (November/December hrawng) cu a kik i ruah a sur thla a si. Cu thla a dih cun Tebeth thla (December/January) a si. Cu thla cu a kih bik caan a si i, a caancaan ah hmun sang ah hawhra ruah a sur tawn. Baibal nih cuka hmun khuacaan kong a chimmi kha zoh u sih.

Baibal ṭialtu Ezra nih Chislev thla cu a kik taktak i ruah sur thla a si tiah a ti. “Thla kuanak [Chislev] thla, a ni kul ni” ah mi cu Jerusalem ah an i pum tiah a ti hnu ah “ruah tampi a sur caah an ther ko” tiah a rak ṭial. Cu lio khuacaan he aa tlaiin aa pummi hna thengte nih hitin an ti: ‘Ruah fakpi in a sur caan a si fawn; lengah kan dir kho lo.’ (Ezra 10:9, 13; Jeremiah 36:22) Vawlei cung cuka hmun hrawng i a ummi tukhal pawl  cu December thla hrawng ahcun zan ah an tuu pawl he leng ah an chuak lai lo ti cu a fiang ko!

Asinain Jesuh a chuah zan ah tukhal pawl nih lengah an tuu an cawngh lio a si tiah Baibal nih a ti. A ngaingai ti ahcun Baibal ṭialtu Luka nih Bethlehem khua pawng ah cu lioah tukhal hna nih ‘an turun an zohkhenh i ramlak ah an riak’ tiah a ti. (Luke 2:8-12) Tukhal hna nih tuu kha chun lawng ah an rak cawng hna lo, ramlak ah an rak riak. Zan ah an tuu pawl he ramlak ah an rak um. Ramlak ah an um timi bia cu December thla ah a kik i ruah a surmi Bethlehem khua he aa tlak maw? Aa tlak lo. Cucaah Jesuh chuah caan i a cangmi thil nih December thla ah a chuak lo ti kha a langhter. *

Pathian Bia nih Jesuh a thih caan set te kha a rak langhter nain a chuah caan kong kha cu tlawm te lawng a rak langhter. Cu nih cun Siangpahrang Solomon i hi bia hi a kan hngalhter ṭhan: “Min ṭha hi a sungmi zihmui nakin a ṭha deuh, thih ni hi hrin ni nakin a ṭha deuh.” (Phungchimtu 7:1) Cu a si caah Baibal nih Jesuh phungchimnak le thihnak kong kha a dikthliar tiangin a langhter nain a chuahnak kong kha tlawmte lawng a langhter tikah khuaruahhar awk a si lo.