JEHOVAH Pathian nih Messiah aho a si hngalh khawh awk bawmtu caah biakammi Khamhtu a chuahnak, a phungchimnak le a thihnak kong a dikthliar in fianternak Baibal chimchungbia tampi kha ṭial awkah a thaw a chuahhnawh hna. Mah Baibal chimchungbia  vialte hi Jesuh Khrih cungah a rak tling dih. Cu thil hna cu khuaruahhar awk tlak in a dikthliar in a rak tling. Tahchunhnak ah, Messiah chuahnak le a ngakchiat lio a nuncan he aa tlaimi chimchungbia tlawmpal kha zoh hmanh u sih.

Profet Isaiah nih Messiah cu Siangpahrang David tefa in a chuak lai tiah a rak chimchung. (Isaiah 9:7) Jesuh cu David phun chung in a rak chuak taktak.—Matthai 1:1, 6-17.

 Pathian profet pakhat a simi Mikah nih uktu a si hngami ngakchia cu “Bethlehem Efrath” ah a chuak lai tiah a rak chimchung. (Mikah 5:2) Jesuh a chuah lioah, Israel ram ah Bethlehem timi khua pahnih a rak um. Khua khat cu chaklei Nazareth khua pawng ah a um i, khua khat cu Judah ram Jerusalem khua pawng ah a um. Jerusalem khua pawng Bethlehem cu hlan ah Efrath tiah an rak ti. Chimchungbia ning tein Jesuh cu cu khua ah a rak chuak.—Matthai 2:1.

A dang chimchungbia nih Pathian Fapa cu “Izipt ram chungin chuah awkah” auh a si lai tiah a rak ti. Ngakchia Jesuh cu Izipt ram ah kalpi a rak si. Herod a thih hnu ah cu ka cun chuahpi a si ṭhan i cu chimchungbia cu a rak tling.—Hosea 11:1; Matthai 2:15.

Cahmai 200 i cazin ah “chimchungbia” timi biatlang tang i Baibal cang hna ah  Messiah kong kha a dikthliar in a um. Mah Baibal cang hna kha “A Tlinnak” timi biatlang tang i Baibal cang hna he zaangfahnak in tahchunh. Cutin tuahnak thawngin Pathian Bia a hmaan ti na zumhnak kha a fek lai.

Hi Baibal cang hna hi na rel tikah chimchungbia pakhat cio kha Jesuh chuah hlan kum za ringlo lio in rak ṭialmi a si kha i chingchiah. Jesuh nih hitin a rak ti: “Moses phungbia chung le profet hna nih an ṭialmi chung le Salm chungah keimah kong an rak ṭialmi vialte cu a tlin dih awk a si.” (Luka 24:44) Na Baibal in na dothlat chun ahcun chimchungbia hna a dikthliar in a tlin kha na hmuh lai!