TUCHAN vawlei cung hmun tampi ah tuahmi mi uar ngaimi biaknak puai le lawki puai hna hi Baibal ah a hram lakmi an si lo. Cu a si ahcun, cu puai ni hna cu khoika in dah a hram aa thawk? Library pakhat ah na kal khawh a si ahcun nan um nak hmun i mi uar ngaimi puai ni kong a fiantermi cauk kha na hlathlai khawh. Tahchunhnak tlawmpal in zoh u sih.

 Bawipa Thawh Ni. “Biakam Thar Baibal ah Bawipa thawh ni puai tuahnak kong a um lo” tiah Encyclopædia Britannica cauk nih a ti. Bawipa thawh ni puai cu zeitindah aa thawk? Lawkih biaknak in a hram aa thawk. Mah puai hi Jesuh thawhṭhannak philhlonak caah tuah a si an ti nain, Bawipa thawh ni puai phunglam cu Khrihfa phunglam a si lo. Tahchunhnak ah, mi uar ngaimi “Bawipa thawhṭhan saveh” he aa tlaiin Catholic Encyclopedia nih hitin a ti: “Saveh cu lawkih mi hna hmelchunhnak pakhat a si i a zungzal in fa tampi ngeih khawhnak hmelchunhnak a si.”

Kum Thar Puai. Kum Thar puai nithla le phunglam hna cu ram khat le ram khat aa lo lo. Cu puai a hram thawknak kong kha The World Book Encyclopedia nih hitin a ti: “Rom siangpahrang Julius Sisar nih B.C. 46 ah January 1 kha Kum Thar ah a rak chiah. Rom mi hna nih khua kutka le innka le hramthawknak pathian Janus sinah mah ni kha an pek. Janus min kha chuankhan in January thla tiah ti a rak si, anih cu hmailei le hnulei a zoh mi hmai hmai hnih a ngei.” Cucaah Kum Thar puai cu lawkih phunglam in a hram aa thawkmi a si.

Tho. Tho cu Khrihfa chan hlan Lai lei khuakip ah tuah tawn ciomi a si. October thla ah tho cu tuah a si. Hlan pipu hna nih tho nikhua cu mithi khua ah a thimi thlarau pawl an kal caan le mithi khua in thlarau hna nih an rak don hna caan a si tiah zumhnak an rak ngei. Cucaah a nungmi le a thimi i hngalh le i theih ṭhannak caah an rak tuah tawn. Mithi caah an rak tuahmi tho kha Lai Khrihfa cheukhat nih chan he aa tlakning in an tharchuah i an tuah.

Puai Dang Hna. Vawilei cung hmunkip i tuahmi puai vialte kong cu i ruah khawh dih cawk a si lai lo. Asinain, minung asilole minung bu a hlorhmi puai hna cu Jehovah caah cohlan awk tlak a si lo. (Jeremiah 17:5-7; Lamkaltu 10:25, 26) Pathian lung a tongmi biaknak puai a si le si lo puai aa thawknak a hram hlathlai a herh kha philhhlah. (Isaiah 52:11; Biathlam 18:4) Hi cauk Ṭhen 16 nak chung i Baibal phunglam hna nih lawkih mi hna tuah tawnmi puai ah i tel kha Pathian nih zeitindah a hmuh ti hngalh awk an bawmh lai.