BIACEIH Ni kha na mitthlam ah zeitindah na cuanter? Minung nuai tampi cu Pathian bawi ṭhutdan hmai ah chuahpi an si lai i pakhat hnu pakhat in biaceih an si lai tiah mi tampi nih an ruah. Mi a cheu cu vancung laksawng an hmu lai i a cheu cu zungzal hrem awkah sual phawt an si lai tiah an ti. Asinain Baibal nih cu caan he aa tlaiin phun dang ngaiin a langhter. Pathian Bia nih ṭih a nungmi caan si lo in ruahchannak in a khatmi remhṭhannak caan in a langhter.

Biathlam 20:11, 12 ah lamkaltu Johan ṭialmi Biaceihnak Ni kong kha hitin kan rel: “Bawiṭhutdan rangpi le a cung i a ṭhumi kha ka hmuh hna. A cung i a ṭhumi hmaika cun vawlei le van kha an zaam i an um ti lo. Cun mithi mi kha, a ngan he a hme he, bawiṭhutdan hmai i an ṭhut kha ka hmuh. Cauk kha an kau hna, cun cauk a dang pakhat, nunnak cauk zong kha an kau ve. Mithi cu an rak tuahmi cauk chung i aa ṭial ning khan an bia a ceih hna.” Hika ah langhtermi Biaceihtu hi ahodah a si?

Jehovah Pathian cu minung cung i Biaceihtu ngan bik a si. Asinain, biaceihnak rian taktak kha cu midang a pek. Lamkaltu 17:31 chim ningin lamkaltu Paul nih Pathian “thim  mipa thawngin vawlei cung dihlak hi dinnak in biaceih awkah ni a khiah cang” tiah a ti. Biaceihtu ah thimmi cu a thoṭhanmi Jesuh Khrih kha a si. (Johan 5:22) Asinain, Biaceih Ni cu zeitik ah dah aa thawk lai? Zei can dah a rauh lai?

Biathlam cauk nih vawlei cung i Satan thil ningcang a hrawk hngami Armageddon raldohnak hnu ah biaceihnak ni aa thawk lai tiah a langhter. * (Biathlam 16:14, 16; 19:19–20:3) Armageddon hnu ah Satan le a khuachia pawl cu kum thongkhat chung khor thuk chungah thlak an si lai. Cu caan chungah vancung ro a cotu 144,000 hna cu “Khrih he cun siangpahrang bantukin kum thong khat chung uktu bawi an si” lai. (Biathlam 14:1-3; 20:1-4; Rom 8:17) Cu a si caah Biaceih Ni cu suimilam 24 lawng a raumi hnawhnam tuk in tuah hngami rian a si lo. Kum thongkhat a rau lai.

Kum thongkhat chungah Jesuh Khrih cu ‘a nungmi he a thimi he bia ceihtu’ a si lai. (2 Timote 4:1) “A nungmi” cu Armageddon in a luatmi “mibu nganpi” kha an si lai. (Biathlam 7:9-17) Lamkaltu Johan zong nih “mithi mi kha . . . [biaceihnak] bawiṭhutdan hmai i an ṭhut” kha a rak hmuh. Jesuh nih bia aa kam bantukin “thlan chung i a ummi mithi vialte nih a [“Khrih,” NW] aw an theih lai caan kha a ra lio.” (Johan 5:28, 29; Lamkaltu 24:15) Sihmanhsehlaw zei zoh in dah biaceih an si lai?

Lamkaltu Johan langhnak hmuh ningah “cauk kha an kau hna” i “mithi cu an rak tuahmi cauk chung i aa ṭial ning khan an bia an ceih hna.” Cu cauk cu minung nih hlan i an rak tuahmi kong ṭialmi ca maw a si? A si lo, an thih hlan i an rak tuahmi zoh in biaceih an si lai lo. Cucu zeitindah kan hngalh? Baibal nih hitin a ti: “Minung cu a thih tikah cun sual ṭhawnnak chung khan a luat.” (Rom 6:7) Cucaah a thoṭhanmi cu sualnak a ngei lomi sining in an thoṭhan lai. Cu cauk cu Pathian nih a hnu ah a halmi hna kha a chim duhmi a si. Armageddon in a luatmi si hna seh a thoṭhanmi si hna seh zungzal in nun awkah Pathian nawlbia an zulh lai,  mah nawlbia ah Jehovah nih kum thongkhat chungah a pekmi hna nawlbia thar zeipaoh aa tel. Cucaah Biaceih Ni chung i an tuahmi zoh in pakhat cio kha biaceih an si lai.

Biaceih Ni ah minung nuai tampi cu hmasa bik ah Pathian duhnak kong kha an cawn lai i cu ningin nun awk caanṭha an hmu lai. Mah nih khan cawnpiaknak rian nganpi a um lai ti kha a langhter. A si, “vawlei le a cung a ummi kha an bia na ceih tikah dinnak hi zeidah a si ti kha an hngalh lai.” (Isaiah 26:9) Asinain, mikip nih Pathian duhnak zulh kha an duh lai lo. Isaiah 26:10 nih hitin a ti: “Nang nih cun mi ṭhalo kha na zaangfah ko hna nain, dinnak tuah kha an cawng duh hlei lo. Miding mi an umnak ram hmanh ah hin ṭhatlonak kha an tuah ṭhiamṭhiam ko, na lianhngannak kha an hngal duh hlei lo.” Mah miṭhalo pawl cu Biaceih Ni ah zungzal thih dantatnak an hmu lai.—Isaiah 65:20.

Biaceih Ni ah a luatmi hna cu cu ni a dongh tik ah tling hirhiar tein “an nung” lai. (Biathlam 20:5) Cucaah Biaceih Ni nih minung kha a hram thawk i a tlingmi sining kha a ngeihter ṭhan hna lai. (1 Korin 15:24-28) Cu hnu ah hmanung bik hneksaknak a um lai. Satan cu khor thuk chung in chuah a si lai i minung hlennak nawl voikhat a hmu ṭhan lai. (Biathlam 20:3, 7-10) Satan a domi hna nih Baibal biakammi a tlin dih cikcek kha an hmuh lai: “A dingmi cu ram chungah himte in an um lai i ram cu zungzal in anmah ta a si lai.” (Salm 37:29) A si, Biaceih Ni cu zumhawk a tlakmi vialte caah thluachuah a si lai!