1, 2. Tuchan ah khoika ah dah a himmi dornak hmun hmuh khawh a si?

THLICHIA a hran lio ah lam cungah ka kal tiah i ruat hmanh. Van a dawm thluahmah. Nimtlau a lek, khua a ri i fakpi in ruah a vun sur. Naa hun i hnawhnam i dornak hmun kha heh tiah na kawl. Cu lioah lam pawngah, dornak hmun pakhat na hmuh. Cu hmun cu a fek, a ro i hmun nuam a si. Cu hmun him cu zeitluk in dah na hei sunsak lai!

² Kannih cu thlichia a hrangmi caan ah kan nung cang. Vawlei thil umtuning cu a chia chin lengmang. Sihmanhsehlaw, harnak in zungzal a kan huppheng khomi dornak hmun pakhat a um. Cu hmun cu zeidah a si? Baibal nih a kan cawnpiakmi hi zohhmanh: “BAWIPA, nangmah cu a ka chanhtu le a ka hupphengtu [“ka dornak le ka ralhruang,” NW] na si! Nangmah cu ka Pathian na si; nangmah cu kan bochan.”—Salm 91:2.

3. Jehovah kha zeitindah kan dornak kan siter khawh?

³ Mah kha ruathmanh! Universe Sertu le Cungnung Bik Nawlngeitu a simi Jehovah cu  a kan huppheng khotu kan dornak a si kho. Harnak a kan pe khomi mi zeipaoh asiloah zei thilpaoh nakin amah cu a ṭhawn deuh suaumau caah a kan huhphenh khawh. Harnak kan ton hmanh ah, cu ruangah a chuakmi thil ṭhalo vialte kha a hrawh khawh dih. Jehovah kha zeitindah kan dornak kan siter khawh lai? Kan i bochan a hau. Culengah, Pathian Bia nih hitin a kan forh: “Pathian dawtnak chungah khan um ko u.” (Judas 21) Asi, vancung kan Pa he kan i dawtnak hri kan fehternak thawngin Pathian dawtnak ah kan hmunh awk a si. Cu tikah kan dornak a si tiah kan zumh khawh lai. Sihmanhsehlaw cu dawtnak hri cu zeitindah kan ser khawh lai?

4, 5. Jehovah nih a kan dawtnak a langhtermi lam cheukhat cu zeidah an si?

⁴ Pathian dawtnak i hmunh khawh awkah, Jehovah nih kan cungah a dawtnak zeitindah a langhter kha kan hngalh a hau. Hi cauk bawmhnak thawngin na hngalhmi, Baibal nih a kan cawnpiakmi cheukhat kha ruathmanh. Jehovah nih Sertu in, um a nuammi inn, hi vawlei hi a kan pek. Vawlei cu ti le rawl, vawlei chuak thil, khuaruahhar saram phunphun le hmun dawh in a khahter. Baibal Chuahtertu Pathian nih a min le a sining kha a kan chimh. Mahlengah a Fapa ngeihchunte Jesuh kha kan caah vawlei ah a thlah i harnak le thihnak a inter tiah a Bia nih a ti. (Johan 3:16) Cu laksawng cu kan caah zei sullam dah a ngeih? Mah nih hmailei caah ruahchannak ṭha tuk a kan ngeihter.

⁵ Kan hmailei ruahchannak cu Pathian tuahpiakmi a dang cung zongah aa hngat rih. Jehovah nih vancung cozah, Messiah Pennak kha a rak dirh. Cu Pennak nih cun sifah harnak vialte kha a donghter dih lai i vawlei kha paradis ah a canter lai. Ruat tuahhmanh! Cuka ah dai te le nuam tein zungzal kan nung lai. (Salm 37:29) Hi caan chungah Pathian nih a ṭha bik lam in nunning kha atu a kan hmuhsak. Amah he zalong tein i biakchawnh khawhnak, thlacamnak laksawng zong a kan pek. Cu thil cu mi vialte le na cungah Jehovah  langhtermi dawtnak cheukhat lawng an si rih.

6. Jehovah dawtnak kha zeitindah na leh khawh?

⁶ Ruah awk a simi a biapi ngaimi biahalnak cu hihi a si: Jehovah dawtnak kha zeitindah ka leh lai? Mi tampi nih “Jehovah kha kan dawt ve lai hen ta” tiah an ti ko lai. Nang tah cutin na ti lai maw? Jesuh nih hi nawlbia hi a ngan bik tiah a rak ti: “Bawipa na Pathian cu na lungthin dihlak le na ruahnak dihlak le na nunnak dihlak in na dawt lai.” (Matthai 22:37) Jehovah Pathian kha dawt awk a ruang tampi na ngei ko lai. Sihmanhsehlaw cu bantuk dawtnak lungchung ah ngeih men in Jehovah kha ka lungthin dihlak le ka fimnak dihlak in ka dawt na ti kho lai maw?

7. Pathian dawt timi cu lungchung ummi lawng a si maw? Fianter.

⁷ Baibal chim ningah Pathian dawt timi cu lungchung ummi lawng a si lo. Pathian kan dawtnak lungchung ah um cu a herh tuk ko nain, cucu Jehovah kan dawt a thawknak lawng a si rih. Epal mute pakhat cu thei tampi a tlaimi epal kung pakhat a hung si kho. Asinain, epal na duh tikah mi pakhatkhat nih epal a mute pakhat in pe seh law na lung a si lai maw? A si lai lo! Cu bantuk cun Jehovah Pathian kan dawtnak lungchung ah umter cu a thawknak lawng a si. Baibal nih hitin a kan cawnpiak: “Pathian kan dawt ti cu a nawl kan zul tinak a si ko. Cun a nawlbia cu kan caah a har tuk lo.” (1 Johan 5:3) Pathian kan dawt taktak a si ahcun, thei ṭha kan tlai lai. Cucu tuahsernak in langhter ding a si.—Matthai 7:16-20.

8, 9. Pathian kan dawtnak le a cung kan i lawmhnak kha zeitindah langhter khawh a si?

⁸ Pathian nawlbia le a phunglam kan zulh tikah kan dawtnak kha kan langhter. Cutin tuah cu a har tuk lo. Thilrit si loin, Jehovah nawlbia hna cu a ṭhami, a nuammi le lung a simi nuncan in nun awkah mi a bawm. (Isaiah 48:17, 18) Lam a kan hruai ningin kan nunnak thawngin vancung kan  Pa tuahpiakmi thil vialte cung i kan i lawmh taktak kha kan langhter. Ngaihchiat awk cu nihin vawlei mi tlawmte lawng nih an i lawmhnak an langhter. Jesuh vawlei cung a nun lio i a rak nungmi mi cheukhat bantukin lawmh a hngal lomi si kan duh lo. Jesuh nih thinghmuimi pahra a rak damter hna, sihmanhsehlaw pakhat lawng a rak kir i lawmhnak bia a rak chim. (Luka 17:12-17) Lawmh a hngal lomi pakua hna si loin lawmh a hngalmi pa bantuk kha si kan duh!

⁹ Cu a si ahcun zulh awk a simi Jehovah nawlbia hna cu zeidah an si? Cu hna lakah a cheukhat kha hi cauk ah kan rak cawn cang nain, tlawmpal zoh ta usih. Pathian nawlbia zulhnak nih Pathian dawtnak ah hmunh awk a kan bawmh lai.

10. Jehovah Pathian kong hngalhnak cawn lengmang a biapitnak a kong kha fianter.

¹⁰ Jehovah kong cawnnak cu amah va naih deuhnak ah a biapimi kehlan a si. Cucu tuah zungzal dingmi a si. A kik tukmi zan ah innleng ah mei na kau i na khua lumnak na tuah hei ti u sih. Mei alh kha duhsah duhsah tein na thihter lai maw? Na thihter lai  lo. Mei a alh i na khua a lum nakhnga thing na tih chap lengmang lai. Cucu na caah thih nunnak hmanh a si kho ko! Thing nih mei a alhter peng bantukin “Pathian hngalhnak” nih Jehovah kan dawtnak kha a fehter ve lai.—Phungthlukbia 2:1-5.

11. Jesuh cawnpiaknak nih a zultu pawl cungah zei ṭhatnak dah a rak chuahter?

¹¹ Jesuh nih a zultu pawl kha Jehovah le a sungmi a Bia, biatak an dawtnak nunter alhter peng a duh hna. Jesuh nih thihnak in a thawhṭhan hnu ah a zultu pahnih kha Hebru Cathiang chimchungbia a cung a tlinnak kong a rak cawnpiak hna. Zei ṭhatnak dah a rak chuak? A hnuah hitin an rak chim: “Lampi i bia a kan ruah le Cathiang sullam a kan chimh ah khan kan chungah mei kang bang a si lo mei kha?”—Luka 24:32.

12, 13. (a) Tuchan mi tamdeuh lungchung ah Pathian le Baibal an dawtnak zeitindah a um? (b) Dawtnak kan ngeihmi a kih lo nakhnga zeitindah kilven khawh a si?

¹² Baibal cawnpiakmi taktak na rak cawnka ah na lungthin cu lawmhnak, thathawhnak le Pathian dawtnak in a rak khah kha na hngal ti maw? Na hngalh lai ti cu a fiang ko. Mi tampi zong cutin an si ve. Cu bantuk dawtnak taktak nunter le ṭhanter peng bel zuamcawhnak a si. Tuchan vawlei tiluan ningin kal kan duh lo. Jesuh nih hitin a rak chimchung: “Mi tampi cu an dawtnak kha a kik lai.” (Matthai 24:12) Jehovah na dawtnak le Baibal biatak na dawtnak a kih lo nakhnga zeitindah na kilven khawh lai?

¹³ Jehovah Pathian le Jesuh Khrih kong hngalhnak kha cawng peng. (Johan 17:3) Pathian Bia in na cawnmi kha ṭha tein ruat law hitin i hal: ‘Hi nih hin Jehovah Pathian kong zeidah a ka cawnpiak? Ka lungthin dihlak le ka ruahnak dihlak le ka nunnak dihlak in dawt awkah zei a kong dah a um rih?’ (Salm 77:12) Cutin ṭha tein ruahnak nih Jehovah na dawtnak kha a fehter zungzal lai.

14. Thlacamnak nih Jehovah kan dawtnak a nun khawh peng nakhnga zeitindah a kan bawmh khawh?

¹⁴ Jehovah kan dawtnak nunter pengnak lam pakhat cu  hmaan tein thlacamnak a si. (1 Thesalon 5:17) Hi cauk i Ṭhen 17 nak ah, thlacamnak cu Pathian pekmi laksawng sung a si kha kan rak cawn cang. Hmaante le zalong tein i biakchawnh lawngah minung i pehtlaihnak a ṭhat bantukin Jehovah sinah hmaan tein thla kan cam lawngah amah he kan i pehtlaihnak kha a ṭha ve lai. Kan thlacamnak cu seh rianṭuan bang a sullam um lo le lungtak si lo in, a phungmen in cammi le nolh ṭhan lengmangmi bia zei tik hmanh ah siter lo ding kha a biapi. Ngakchia pakhat nih duh a nungmi a pa a chawnh bantukin Jehovah kha chawnh ve awk a si. Upat tein chawnh kan duh ko nain tluangtlam tein le lungchung chuak bia chim a hau. (Salm 62:8) Asi, pumpak Baibal hlathlainak le lungthin tak tein thlacamnak hna cu kan biaknak ah a biapimi an si i Pathian dawtnak ah hmunh khawh awk bawmtu an si.

15, 16. Pennak kong chimnak rian kha tinvo sung le ro thil in zeicah dik hmaan tein hmuh awk a si?

¹⁵ Pumpak Baibal hlathlainak le thlacamnak cu mah pumpak in tuah khawhmi biaknak he aa tlaimi a si. Asinain, mi hmai ah tuahmi biakning phun khat a simi kan zumhnak midang va chimhnak kong kha atu i ruah u sih. Midang kha Baibal biatak cheukhat kong na chim cang hna maw? Na chimh cang hna a si ahcun Jehovah a rianṭuannak tinvo sung na hmu cang. (Luka 1:73-75) Jehovah Pathian kong kan hngalhmi biatak mi kan chimh tik hna ah, Khrihfa taktak vialte pekmi a biapi ngaimi rian a simi Pathian Pennak thawngṭha bia chimnak rian kan cohlan a si.—Matthai 24:14; 28:19, 20.

¹⁶ Lamkaltu Paul nih a phungchimnak rian kha ro thil tiah a ti i a sung tukmi thil in a rak hmuh. (2 Korin 4:7) Jehovah Pathian le aa tinhmi kong midang va chimh cu na tuah khawhmi lakah a ṭha bikmi rian a si. Cu rian cu a ṭha bik Bawi a rian na ṭuan a si i a ṭha bikmi ṭhathnemnak a chuahter khawh. Cu rian ah i telnak thawngin lungthin ṭha a ngeimi  hna kha vancung kan Pa naih awk le zungzal nunnak lam cung phanh awkah kan bawmh hna! Cu rian nakin lung a siter deuhmi rian a um ti hnga maw? Mahlengah, Jehovah le a Bia tehtekhaannak nih na zumhnak le amah na dawtnak kha a ṭhawnter. Cun naa zuamnak kha Jehovah nih a sunsak  ngaingai. (Hebru 6:10) Cu rian ah i manh lo ngai in umnak nih Pathian dawtnak ah hmunh awk a kan bawmh.—1 Korin 15:58.

17. Nihin ah Khrihfa phungchimnak rian cu zeicah biapi ngaiin ṭuan a hauh?

¹⁷ Pennak kong chimnak rian biapi ngai in ṭuan a hauh kha na hngalh a hau. Baibal nih hitin a ti: ‘Phung kha chim hna; biapi ngai in ṭuan.’ (2 Timote 4:2, NW) Zeicah cu rian cu biapi ngaiin nihin ah ṭuan a hauh? Pathian Bia nih hitin a kan chimh: “BAWIPA ni a liannganmi cu a nai cang, khulrang in a ra lio; cu ni tluk in khulrang in a tli khomi an um lo.” (Zefaniah 1:14) Asi, Jehovah nih hi thil sining vialte a donghter lainak caan cu khulrang in a ra lio. Mi kha ralrin pek an hau! Atu ah Jehovah kha an cung Nawlngeitu Bik in i thim awk caan a si kha an hngalh a herh. Donghnak cu ‘a rau ti lai lo.’—Habakkuk 2:3, NW.

18. Khrihfa taktak hna he i kom in Jehovah kha zapi hngalh in zeicah biak ding a si?

¹⁸ Jehovah nih Khrihfa taktak hna he i kom in zapi hngalh in amah ka bia hna seh ti a kan duh. Curuangah a Bia nih hitin a ti: “Pakhat le pakhat kan i dawt khawh nakhnga le thil ṭha kan i tuahpiak khawh nakhnga, i bawm thliahmah u sih. Pakhat le pakhat hmun khat i i pumh lengmang kha ngol hlah u sih; a cheu nih cun ngol hmanh hna sehlaw, kannih cu i forh chin u sih, zeicahtiah Bawipa Ni cu a nai deuh chin lengmang ti kha kan hngalh caah i forh chin lengmang ko u sih.” (Hebru 10:24, 25) Khrihfa pumhnak ah zumtu khat pawl he kan i pumh tikah kan dawtmi Pathian thangṭhatnak le biaknak caanṭha kan ngei. Pakhat le pakhat i bawmh le tha i peknak caan zong kan hmu.

19. Khrihfabu ah dawtnak hri fehter awkah zeitindah tuah khawh a si?

¹⁹ Jehovah zumtu khat pawl he kan i komh tikah khrihfabu dawtnak le i komhnak hri kha kan fehter. Jehovah nih kan ṭhatnak a kan zohpiak bantukin pakhat le pakhat kan ṭhatnak i zohpiak kha a biapi. Zumtu khat sinin tlinnak i ruahchan hlah. Thlarau lei kan ṭhan ning aa dan cio le sualnak  kan tuah cio tawn kha philh hlah. (Kolose 3:13) Jehovah a daw tukmi hna he aa kommi si ding naa zuam ahcun nangmah theng thlaraulei ah na ṭhang lai. Asi, thlarau lei unau nu, unau pa hna he Jehovah na biakmi nih Pathian dawtnak ah hmunh awk an bawmh lai. Jehovah kha zumhawktlak tein a bia i a dawtnak ah a hmunmi hna kha zeitindah laksawng a pek hna?

20, 21. “Nunnak taktak” cu zeidah a si i, zeicah ruahchannak ṭha tuk a si?

²⁰ Jehovah nih zumhawktlakmi a salle pawl kha nunnak laksawng a pek hna, sihmanhsehlaw zei bantuk nunnak dah a si? Atu zongah kan nung a si lo maw tiah mi a tamdeuh nih an ti ko lai. Kan thaw kan dawp i kan chuah, kan ei i kan ding. Cucaah kan nung ti cu a fiang ko. Chikkhat kan i nuamh caante ah “atu hi nun taktak a si” tiah kan ti men lai. Asinain, Baibal nih tuchan ah mizei hmanh nun taktak in an nung lo tiah biapi ngaiin a langhter.

²¹ Pathian Bia nih ‘nunnak taktak a simi nunnak kha hmuh’ awkah a kan forh. (1 Timote 6:19) Cu bia nih “nunnak taktak” cu hmailei ah a um lai mi a si kha a langhter. A si, mitling kan si tik ahcun Pathian nih hmasa bik i aa tinhmi ningin kan nun lai caah cu bia nih a chim duhmi ning bakin kan nung cang lai. Paradis vawlei ah a tlingmi ngandamnak, daihnak le lawmhnak in kan nun tikah, “nunnak taktak”—zungzal nunnak kha kan i nuamhpi lai. (1 Timote 6:12) Cucu ruahchannak ṭha tuk a si lo maw?

22. “Nunnak taktak a simi nunnak” cu zeitindah na hmuh khawh lai?

²² “Nunnak taktak a simi nunnak” cu zeitindah kan hmuh khawh lai? Mah cacang i a cung deuh ah Paul nih Khrihfa hna kha ‘ṭhatnak tuah le thil ṭha tuahnak i a rum’ mi si awkah a rak forh hna. (1 Timote 6:18) Cucaah Baibal in kan hngalhmi biatak kan zulhnak cungah tampi aa hngat ti cu a fiang ko. Sihmanhsehlaw Paul nih thil ṭha tuahnak thawngin “nunnak taktak” kan hmu lai tiah a ti duhnak a si maw? A  si lo, cu bantuk ruahchannak ṭha cu Pathian “vel” thawng in hmuhmi a si. (Rom 5:15) Asinain Jehovah nih zumhawktlak in amah a biami hna kha laksawng pek a duh hna. Pathian nih “nunnak taktak” in nunter an duh. Cu bantuk a nuammi le a daimi zungzal nunnak cu Pathian dawtnak i a hmunmi nih an hmuh lai.

23. Pathian dawtnak i hmunh cu zeicah a biapit?

²³ Hiti hin pakhat cio kan i hal ding a si, ‘Pathian nih Baibal ah a chim mi ningin ka bia maw?’ Ka bia ko tiah nifate kan i ti khawh a si ahcun lam hmaan cungah kan um. Jehovah cu kan dornak a si kha kan zumh khawh. Zumhawktlakmi a mi hna kha hi chan hlun i harnak in a khatmi ni hmanung bik caan chung vialte ah a kilven hna lai. Jehovah nih a naih tuk cangmi a sunglawimi chan thar chungah a kan luhpi cang lai. Cu bantuk thil sining kan hmuhton lai caah lunglawmh awk a va si dah! Hi donghnak caan ah a hmaanmi kan i thim caah kan i lawm tuk te lai! Atu ah cubantuk naa thim a si ahcun, Jehovah Pathian pek timhmi “nunnak taktak” kha zungzal in naa nuamhpi lai!