THUMKOMH Pathian cawnpiaknak cu Pathian ah minung pathum—Pa, Fa, Thiang Thlarau—aa tel ti a si. Hi pathum hna hi zei dangdang ah le lianhngannak le hram thawk ngeih lonak ah an i lo tiah an ti. Cu a si caah, Thumkomh Pathian cawnpiaknak ningah Pa zong Pathian, Fa zong Pathian, Thiang Thlarau zong Pathian a si ti a si, asinain Pathian tucu Pakhat lawng a si.

 Thumkomh Pathian a zummi tampi nih mah cawnpiaknak kong kha kan fianter kho lo tiah an ti. Asinain, mah kha Baibal cawnpiakmi a si tiah an ruah. Hngalh awk cu “Thumkomh Pathian” timi biafang hi Baibal chung khuazei ka hmanh ah a um lo. Cu a si ahcun thumkomh Pathian timi zumhnak tah hmuh a si maw? Mah biahalnak kha phit awkah, Thumkomh Pathian a zummi hna atu le atu hman tawnmi Baibal cang kha zoh u sih.

Johan 1:1 nih “vawlei hi ser a rak si hlan ah Bia cu a rak um cang; cu Bia cu Pathian sinah a rak um i Pathian he an sining aa khat” tiah a ti. Mah bia a ṭialtu lamkaltu Johan nih “Bia” cu Jesuh a si tiah fiang tein a langhter. (Johan 1:14) Asinain Bia cu Pathian he an sining aa khat tiah ti a si caah mi a cheu nih ‘Pa le Fa cu Pathian pakhat cheu bang an si’ tiah an ruah.

Mah Baibal cang kha a hramthawk ah Grik holh in an rak ṭial ti kha i chingchiah. A hnu ah Baibal lettu hna nih holh dang in an rak leh. Asinain Baibal lettu hna nih “Bia cu Pathian he an sining aa khat” timi bia hi an rak hmang lo. Zeiruangah a si? Baibal ah hmanmi Grik biafang an hngalhnak cungah hrambunh in Baibal lettu pawl nih “Bia cu Pathian he an sining aa khat” timi kha phun dang in leh ding a si tiah an ti. Zeitin in dah an rak leh? Hihi tahchunhnak tlawmpal an si: “Bia cu pathian pakhat a si.” (The New Testament in an Improved Version) “Bia cu Pathian he an umṭi i Pathian sining kha a ngei.” (The Translator’s New Testament) Cu Baibal lehnak hna ningin Bia cu Cung Nung Bik Pathian a si lo. * Mah nak cha cun Jehovah sermi thil nung hna lak ah Bia i a dirhmun ruangah ‘pathian pakhat’ bantukin chim a si. Hi ka zawn i “pathian” timi hi “a ṭhawngmi” tinak a si, Cung Nung Bik tinak a si lo.

Mi a tam deuh nih Baibal hmanmi Grik holh kha an hngal lo. Cucaah lamkaltu Johan chim duhmi taktak kha zeitindah na hngalh khawh lai? Hi tahchunhnak hi ruathmanh: Sayapa nih a  siangngakchia pawl kha thil pakhat kong a cawnpiak hna. Mah kha a siangngakchia pawl nih sullam phun dangdang cio in an hngalh. Zeitindah siangngakchia nih a phi an hmuh khawh lai? An saya kha tam deuh in fianter chap awkah an hal khawh? A konglam tam deuh in hngalhnak nih mah kong kha hngalhthiam deuh awkah a bawmh hna lai ti cu a fiang ko. Cu bantuk cun, Johan 1:1 a sullam kha hngalhthiam awkah Jesuh sining he aa tlaimi a konglam tam deuh kha Johan thawngṭha cauk ah hmuh khawh a si. Cu kong he aa tlaimi a konglam tamdeuh hngalhnak nih a hmaanmi ri chah khawh awkah a kan bawmh lai ti cu a fiang ko.

Tahchunhnak ah, Johan a ngan 1 a hme 18 chung i a konglam dang hna kha ruat tuah hmanh: “Ahohmanh nih [Lian Ngan Bik] Pathian cu an hmu bal lo.” Asinain, Fapa, Jesuh cu minung nih an rak hmuh bal, Johan nih hitin a chim: “Bia [Jesuh] cu minung ah a cang i kan lakah khua a rung sa. A sunparnak cu kan hun hmuh.” (Johan 1:14) Cu a si ahcun Fapa cu Lian Ngan Bik Pathian cheubang zeitindah a si khawh lai? Johan nih Bia cu “Pathian sinah a rak um” ti zong in a langhter. Sihmanhsehlaw mi pakhat cu pakhat pa sin i a um lio ah zeitindah pakhat pa cu a si khawh lai? Cupin ah Johan 17:3 i aa ṭial bantukin Jesuh nih vancung a Pa he an i dannak kha fiang tein a langhter. A pa kha ‘a hmaanmi Pathian pakhat lawng a simi’ tiah a ti. Johan thawngṭha cauk a donghnak ah Johan nih a tawinak in hitin a chim: ‘Ka ṭialnak chan cu, nannih nih Jesuh cu Messiah, Pathian Fapa a si ti kha nan zumh nakhnga caah a si.’ (Johan 20:31) Jesuh kha Pathian tiah ti loin Pathian Fapa a si tiah a ti kha hngal. Johan thawngṭha cauk ah aa telmi mah a konglam tamdeuh nih khan Johan 1:1 kha zeitin hngalhthiam ding a si kha a langhter. Bia timi Jesuh cu reng sang a hmu ti phun in “pathian pakhat” a si nain Lian Ngan Bik Pathian he an i khat lo.

Saya le siangngakchia tahchunhnak kha ruat ṭhan hmanh. A konglam tam deuh in Saya nih a fianter hnu hmanh ah an lung a hring peng rih hei ti u sih. Zeidah an tuah khawh? Cu kong hngalh chap awkah saya dang pakhat lei ah an i mer kho. Mah saya nih hmasa saya chimmi kha a hmaan tiah a ti ahcun siangngakchia tam deuh cu an lung a hring ti lai lo. Cu bantuk cun Jesuh le Lian Ngan Bik Pathian he aa pehtlai in Baibal ṭialtu Johan chimmi kha  a si hrimhrim ko tiah na zumh lo ahcun a konglam hngalh chap awkah Baibal ṭialtu dang pakhat sinah naa mer kho. Tahchunhnak ah, Matthai ṭialmi hi ruathmanh. Hi chan donghnak he aa tlaiin Jesuh chimmi kha hitin a rak ṭial: “Cu ni le cu caan cu zeitik ah dah a si lai, ti kha ahohmanh nih an hngal lo; vancung mi zong nih an hngal lo, Fapa zong nih a hngal hlei lo, Pa lawnglawng nih a hngalh.” (Matthai 24:36) Hi bia nih Jesuh Lian Ngan Bik Pathian a si lo kha zeitindah a fianter?

Fapa nakin Pa nih a hngalh deuh tiah Jesuh nih a ti. Jesuh cu Lian Ngan Bik Pathian cheubang a si a si ahcun, a Pa hngalhmi kha a rak hngalh ve hnga. Cucaah Pa le Fa cu an i tluk kho lo. Asinain mi cheukhat nih ‘Jesuh cu sining phun hnih a ngei. Hi bia hi minung sining in a chimmi a si’ tiah an ti men lai. Cuti a si ahcun thiang thlarau tah zeidah a si? Thiang thlarau cu Pa bantukin Pathian cheubang pakhat a si ahcun, Pa nih a hngalhmi kha thiang thlarau zong nih a hngalh tiah zeicah Jesuh nih a rak ti lo?

Baibal na hun hlathlai deuhdeuh ah cu kong he aa tlaimi Baibal cang tampi kha na hun hngalh deuhdeuh lai. Cu nih cun Pa, Fa, thiang thlarau kong biatak kha an zumhter lai.—Salm 90:2; Lamkaltu 7:55; Kolose 1:15.