1. Pathian kha lam hmaan in kan biak ahcun zei ṭhatnak dah kan hmuh lai?

JEHOVAH PATHIAN cu kan cungah zawnruahnak a ngeih tuk caah dawtnak in lam a kan hruainak khan ṭhatnak hmu hna seh ti a kan duh. Lam hmaan in kan biak ahcun, nuamhnak kan hmu lai i nun chungah tonmi harnak tampi kha kan hrial khawh lai. Cun a thluachuahnak le bawmhnak zong kan hmu lai. (Isaiah 48:17) Pathian kong biatak kan cawnpiak hna a timi biaknak tampi an um. Asinain, Pathian cu ahodah a si i zeidah a kan hal timi kong he aa tlaiin an mi cawnpiaknak cu aa dang tuk hna.

2. Jehovah kha lam hmaan in zeitindah biak khawh a si i, zei tahchunhnak nih dah mah kha hngalhthiam awkah a kan bawmh?

² Jehovah kha lam hmaan in na biak le biak lo zeitindah na hngalh khawh lai? Biaknak dihlak cawnpiaknak hlathlai in tahchunh a herh lo. A hmaanmi biaknak he aa tlaiin Baibal cawnpiakmi taktak zeidah a si ti cawn lawng a herh. Tahchunhnak ah, ram tampi ah tangka deu kongah buainak a um. Tangka deu thleidannak ah rian hei ṭuan law zeitindah na tuah lai? Tangka deu phun kip kha cinken awk naa zuam lai maw? Zuam hlah, tangka taktak hlathlainak tu ah na caan na hman ah a ṭha deuh lai. Tangka taktak kong na hngalh hnu ah tangka deu kha na thleidan khawh lai. Cu bantuk cun, a hmaanmi biaknak zeitindah thleidan a si kha na cawn hnuah, biaknak deu kha na hngalh khawh lai.

3. Jesuh chimmi ningin Pathian lungton awkah zeidah kan tuah lai?

 ³ Jehovah kha a duh ningin biak a biapi. Biaknak kip nih Pathian lung a ton tiah mi tampi nih an zumh, sihmanhsehlaw Baibal nih cutin a chim lo. Khrihfa ka si ti men in a za lo. Jesuh nih “‘Bawipa, Bawipa,’ tiah a ka timi paoh in vancung Pennak chungah an lut dih lai, tinak a si lo, sihmanhsehlaw vancung khua i a ummi ka Pa nih tuah hna seh ti a duhmi a tuahmi lawnglawng kha an lut lai,” tiah a ti. Cu a si caah Pathian lung kan ton nakhnga a kan halmi kha kan cawn lai i kan zulh lai. Jesuh nih Pathian duhnak a tuah lomi kha “ṭhatlonak a tuahtu hna” tiah a ti hna. (Matthai 7:21-23) Tangka deu bantukin a hmaan lomi biaknak cu man a ngei taktak lo. Cu bantuk biaknak cu ṭih hmanh a nung lehlam.

4. Lam pahnih he aa tlaimi Jesuh bia nih zeidah a chim duhmi a si i, cu lam pahnih cu khoika dah an panh?

⁴ Jehovah nih vawlei cung mi vialte kha zungzal nunnak hmuh awkah caanṭha a pek dih hna. Asinain, Paradis i zungzal nunnak hmuh awkah Pathian kha lam hmaan in biak le atu ah a cohlanmi lam ningin nun a hau. Ngaihchiat awk cu mi tampi nih cutin tuah kha an al. Cu ruangah Jesuh nih hitin a ti: “Hell ah a kalmi lam cu a kau i a fawi i mi tampi nih an zulh caah kutka bi chungah khan lut tuah u. Nunnak a phanmi lam cu a har i a kutka cu a bi i mi tlawmte lawnglawng nih an hmuh.” (Matthai 7:13, 14) A hmaanmi biaknak nih zungzal nunnak ah mi a hruai. A hmaan lomi biaknak nih cun rawhnak ah mi a hruai. Jehovah nih mi zeihmanh rawhter a duh hna lo, cucaah khuazei i a ummi paoh kha a kong cawn awk caanṭha a pek hna. (2 Piter 3:9) Cu a si caah Pathian kan biak ning nih nunnak asiloah thihnak a kan hmuhter khawh.

5. A hmaan tein Pathian a biami hna kha zeitindah kan thleidan khawh hna lai?

⁵ “Nunnak a phanmi lam” cu zeitindah hmuh khawh a  si? Jesuh nih a hmaanmi biaknak cu a chung i a ummi hna nunning ah a lang lai tiah a ti. “Annih cu an theitlai khan nan rak hngalh ko hna lai.” “A ngan a dammi kung nih thei ṭha a tlai” tiah a rak ti. (Matthai 7:16, 17) Phundang cun, a hmaan tein Pathian a biami hna kha an zumhnak le an tuahsernak in thleidan khawh an si. Mitlinglo an si i an palh tawn ko nain, a bu in Pathian duhnak tuah kha an i zuam. A hmaan tein Pathian a biami hna thleidan khawh an sinak hmelchunhnak paruk kha zoh u sih.

6, 7. Pathian salle nih Baibal kha zeitindah an hmuh i, cu he aa tlaiin Jesuh nih zei zohchunh awk dah a rak chiah?

⁶ Pathian salle nih an cawnpiaknak kha Baibal ah a hram an bunh. Baibal nih hitin a ti: “Cathiang hi a dihlak in Pathian thawchuah hnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le dingte in nunnak ding cawnpiaknak caah a ṭhahnemmi a si.” (2 Timote 3:16, 17) Lamkaltu Paul nih Khrihfa hawikhat pawl sinah hitin ca a rak ṭial: “Pathian bia nan sin kan phakpi tikah khan minung bia bantukin si loin Pathian bia bantukin nan rak cohlan, Pathian bia cu a si taktak, nan sin kan phakpi mi cu.” (1 Thesalon 2:13) Cucaah, a hmaanmi biaknak zumhnak le tuahsernak cu minung hmuhnak le phunglam ah aa hngat lo. Pathian thawchuah hnawhmi Bia, Baibal ah a hram aa bunh.

⁷ Jesuh Khrih nih a cawnpiaknak kha Pathian Bia ah a hram a bunhnak thawngin zohchunh awk kha a chiah. Vancung a Pa sin i thla a cam tikah “biatak cu nangmah bia kha a si” tiah a rak ti. (Johan 17:17) Jesuh nih Pathian Bia kha a zumh i, a cawnpiaknak vialte cu Cathiang ningin a si. “Cathiang nih” tiah Jesuh nih atu le atu a rak ti. (Matthai 4:4, 7, 10) Cuticun Jesuh nih Baibal cacang kha a hun lak tawn. Cu bantuk cun, tuchan Pathian mi hna nih anmah ruahnak kha an cawnpiak hna lo. Baibal cu Pathian Bia a si tiah an zumh i an cawnpiaknak kha Baibal ah a hram fek tein an bunh.

8. Jehovah biaknak ah zeidah aa tel?

 ⁸ A hmaanmi Biaknak phung a zulmi hna nih cun Jehovah lawnglawng kha an biak i a min kha mi an theihter hna. Jesuh nih hitin a ti: “Bawipa na Pathian cu va bia law amah rian lawnglawng va ṭuan.” (Matthai 4:10) Cucaah, Pathian salle nih cun Jehovah dah ti lo cu ahohmanh an bia lo. Biak timi ah a hmaanmi Pathian a min le a duhnak mi va theihter aa tel. Salm 83:18 nih hitin a ti: “Nangmah lawnglawng hi BAWIPA [“Jehovah,” NW] na si le vawlei dihlak uktu Cung Nung Bik na si kha hngal hna seh.” Jesuh nih Pathian kong midang theihter awk bawmhnak ah zohchunh awk kha a chiah i a thlacamnak ah “vawlei chungin na kawh hna i na ka pekmi hna sinah hin na min cu ka langhter cang” tiah a rak ti. (Johan 17:6) Cu bantuk cun tuchan i a hmaan tein Pathian a biami hna nih Pathian min le aa tinhmi le a ziaza kha midang an chimh hna.

9, 10. A hmaanmi Khrihfa hna nih pakhat le pakhat an i dawtnak kha zeitindah an langhter?

⁹ Pathian mi hna nih cun mah zawn lawng ruat lo dawtnak taktak kha pakhat le pakhat cungah an langhter. Jesuh nih “pakhat le pakhat nan zawn nan i ruah [“nan i dawt,” NW] ahcun mi vialte nih, hi hna hi amah a zultu kha an si, tiah an in hngalh hna lai” tiah a rak ti. (Johan 13:35) Hmasa Khrihfa hna cu pakhat le pakhat cungah cu bantuk dawtnak kha an rak ngei. Pathian duhmi dawtnak nih miphun lei, luhmuhzi lei le nainganzi lei dawntu kha a tei i a fekmi dawtnak in funtomtu a si caah mi kha a hmaanmi unau rual sinah a hnuh hna. (Kolose 3:14) A hmaan lomi biaknak chung mi nih cun cu bantuk dawtnak kha an ngei lo. Cucu zeitindah kan hngalh khawh? Ram le miphun an i dan ruangah pakhat le pakhat an i that. A hmaanmi Khrihfa nih cun an Khrihfa hawi si hna seh, midang si hna seh thah awkah hriamnam an i put lo. Baibal nih hitin a ti: “Pathian fale hna le Khuachia fale hna an i dannak cu hihi a si: a hmaanmi thil a tuah lomi cu Pathian fa an si lo; cun a unau a daw lomi zong an si ṭhiamṭhiam lo. . . . Pakhat le pakhat kan i daw lai . . . Mi ṭhalopa  ta a si mi Kain, a nau a thattu bantuk kha kan si awk a si lo.”—1 Johan 3:10-12; 4:20, 21.

¹⁰ A taktak ti ahcun dawtnak taktak cu midang va thah lo lawng a si lo. A hmaanmi Khrihfa nih cun pakhat le pakhat i bawmh awkah mah zawn ruat loin an caan, an thazang le an thilri kha an hman. (Hebru 10:24, 25) An lungre a theih tikah pakhat le pakhat an i bawm i midang kha lungthiang tein an pehtlaih hna. “Mi cungah ṭhatnak tuah” awkah an nunnak ah Baibal ruahnak cheuhmi kha an hman.—Galati 6:10.

11. Zeiruangah Jesuh Khrih kha Pathian khamhnak lam in cohlan a biapit?

¹¹ A hmaanmi Khrihfa hna nih Jesuh Khrih kha Pathian khamhnak lam in an cohlan. Baibal nih hitin a ti: “Amah thawng lawnglawng in khamhnak hi hmuh khawh a si. Zeicahtiah vawlei cung dihlak ah hin kannih khamhnak caah Pathian nih min a pekmi midang ahohmanh an um lo.” (Lamkaltu 4:12) Ṭhen 5 nak ah kan rak hmuh bantukin Jesuh nih nawlngaimi minung hna caah tlanhnak man in a nunnak kha a rak pek. (Matthai 20:28) Mahlengah Jesuh cu vawlei a uk hnga dingmi vancung Pennak ah Pathian thimmi Siangpahrang zong a si. Zungzal nunnak hmuh kan duh ahcun Jesuh bia ngaih le a cawnpiaknak zulh kha Pathian nih a kan duh. Cu ruangah Baibal nih “Fapa a zummi paoh cu zungzal nunnak an ngei, Fapa nawl a ngai lomi paoh cu nunnak an ngei bal lai lo” tiah a ti.—Johan 3:36.

12. Hi vawlei ta si lonak ah zeidah aa tel?

¹² A hmaan tein Pathian a biami hna cu hi vawlei ta an si lo. Rom uktu Pilat hmai i bia an ceih lioah Jesuh nih “kei ka pennak cu hi vawlei ta hi a si lo” tiah a rak ti. (Johan 18:36) Jesuh zultu taktak cu khuazei an um hmanh ah, vancung Pennak tang i aa dormi an si caah hi vawlei nainganzi kongah khoika lei hmanh ah an ṭang bal lo. Ram buainak zongah an i tel lo. Jehovah a biami hna cu nainganzi party ah an i tel lo, me zong an pe lo. Pathian a bia taktakmi pawl cu nainganzi kongah khoika lei hmanh ah an ṭang lo nain upadi tu cu an zulh. Zeiruangah a si? Pathian Bia nih “ram uktu bawi”  kha “an nawl va ngai hna u” tiah a ti caah a si. (Rom 13:1) Pathian halmi le ram cozah halmi aa ralchan tikah a hmaan tein Pathian a biami hna nih “minung nakin Pathian nawl kan ngaih deuh awk a si” tiah a timi lamkaltu pawl nawl kha an i cawn.—Lamkaltu 5:29; Marka 12:17.

13. Jesuh zultu taktak pawl nih Pathian Pennak kha zeitindah an hmuh i, cucaah zeidah an tuah?

¹³ Pathian Pennak lawnglawng hi minung caah ruahchannak  a si tiah Jesuh zultu taktak nih an chim. Jesuh nih hitin a rak chimchung: “Cun miphun vialte hna ca i tehte si awkah Vancung Pennak kong Thawng Ṭha hi khuazakip ah chim a si lai cun cu hnu lawng ahcun donghnak cu a si lai.” (Matthai 24:14) Minung tonmi harnak tei khawh awkah uktu minung i bochan loin, Pathian Pennak lawng minung caah ruahchannak a si tiah Jesuh Khrih zultu hna nih an thanh. (Salm 146:3) “Na Pennak cu rung tlung ko seh, vancung khua ah na duhnak an tuah bangin vawlei cungah hin tuah si ve ko seh” tiin cu a tlingmi cozah caah Jesuh nih thlacam a kan cawnpiak. (Matthai 6:10) Cu vancung Pennak nih cun “hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai” tiah Pathian Bia ah chimchung a rak si.—Daniel 2:44.

14. Zei biaknak nih dah a hmaanmi biaknak caah halmi a tlinh tiah na ruah?

¹⁴ Kan rak i ruahmi kong kha hram bunh in hitihin i hal: ‘Zei biaknak nih dah an cawnpiaknak vialte kha Baibal ah a hram an bunh i Jehovah min mi an theihter? Zei bu dah Pathian cawnpiakmi dawtnak a ngei, zei bu dah vawlei ta a si lo i Pathian Pennak lawng minung caah ruahchannak taktak a si tiah a thanh? Vawlei cung biaknak vialte lakah zei biaknak nih dah cu halmi vialte cu a tlinh?’ Jehovah Hngaltu an si ti cu a fiang ko.—Isaiah 43:10-12.

15. Pathian nih amah a um zumh lengin zeidah a kan hal?

¹⁵ Pathian lungton awkah amah zumh men in a za lo. Khuachia hmanh nih Pathian a um kha an zumh tiah Baibal nih a ti. (Jeim 2:19) Asinain Pathian duhnak kha an tuah lo i a lung an tong lo. Cucaah Pathian lungton awkah Pathian a um kan zumh lengah a duhnak kan tuah lai. A hmaan lomi biaknak in kan chuak lai i a hmaanmi biaknak kha kan zumh lai.

16. A hmaan lomi biaknak he kan i pehtlaih ahcun zeidah kan tuah awk a si?

¹⁶ Lamkaltu Paul nih a hmaan lomi biaknak he i pehtlai  hlah u tiah a rak langhter. Hitin a rak ṭial: “Annih cu nan kaltak hrimhrim hna lai i an sin cun nan i ṭhen hrimhrim lai. A thianglomi kha zeihmanh tawng hlah u law kan cohlan hna lai.” (2 Korin 6:17; Isaiah 52:11) Cucaah a hmaanmi Khrihfa hna nih a hmaan lomi biaknak he aa pehtlai mi zei paohpaoh kha an hrial.

17, 18. “A Liannganmi Babilon” cu zeidah a si i, zeicah a rannak in ‘amah chung khan chuah’ awk a si?

¹⁷ A hmaan lomi biaknak vialte hi “A Liannganmi Babilon” cheubang an si tiah Baibal nih a ti. * (Biathlam 17:5) Cu min nih Noah chan Buanchukcho hnu i a hmaan lomi biaknak aa thawknak hlanlio Babilon kha a kan theihter ṭhan. Tuchan a hmaan lomi biaknak vialte i a tamdeuh cawnpiaknak le phunglam hna cu hlanlio Babilon in aa thawkmi a si. Tahchunhnak ah, Babilon mi nih cun thumkomh pathian kha an biak. Tuchan biaknak tampi i a bik in mi an cawnpiakmi hna cu Thumkomh pathian a si. Sihmanhsehlaw Baibal nih cun a hmaanmi Jehovah Pathian cu pakhat lawng a si i Jesuh Khrih cu a Fapa a si tiah fiangte in a kan cawnpiak. (Johan 17:3) Babilon mi nih minung kan thih hnuah a chuakmi a thi kho lomi thlarau kan ngei i hrem hmun ah sifah harnak a tong kho tiin an zumh. Tuchan zongah a thi kho lomi thlarau cu mei alh ah sifah harnak a ing kho timi zumhnak kha biaknak a tam deuh nih mi an cawnpiak hna.

¹⁸ Hlanlio Babilon biaknak cu vawlei cung dihlak ah a karh caah, tuchan Babilon khualipi kha vawlei cung a hmaan lomi biaknak vialte in tlak ngaiin langhter khawh a si. Cu a hmaan lomi biaknak vialte cu ruah lopi in a rawk lai tiah Pathian nih a rak chimchung. (Biathlam 18:8) Babilon khualipi he aa tlaimi zei paoh he i ṭhen a biapit ning kha na hngal maw? Caan a um lioah a rannak in ‘amah chung khan chuak’ seh ti kha Jehovah Pathian nih an duh.—Biathlam 18:4.

19. Jehovah na biak ruangah zeidah na hmuh lai?

 ¹⁹ A hmaan lomi biaknak kha na kaltak ruangah cheukhat nih an in kom ti men lai lo. Asinain, Jehovah miphun he amah na biaknak thawngin na sunghmi nak a let tampi in na hmuh ṭhan lai. Jesuh hnu zulh awkah thil dang a kaltakmi hmasa a zultu pawl bantukin, thlarau lei u le nau tampi na ngei lai. Dawtnak taktak a langhtermi a nuai in a simi Khrihfa taktak hna i vawlei pumpi chungkhar nganpi ah naa tel ve lai. “A ra dingmi chan” ah a ṭha tukmi zungzal nunnak ruahchannak zong na ngei lai. (Marka 10:28-30) A caan a cut tikah, na zumhnak ruangah an kom ti lomi hmanh Baibal cawnpiakmi kha kawl in Jehovah zumtu a hung si kho.

20. A hmaanmi biaknak phung a zulmi hna caah zei hmailei ruahchannak dah a um?

²⁰ Pathian nih a rauh hlan ah hi chan ṭhalo hi a donghter cang lai i a Pennak uknak tang i a ummi a dingmi vawlei thar in a rolh cang lai tiah Baibal nih a kan cawnpiak. (2 Piter 3:9, 13) Cu vawlei cu a va ṭha hringhran lai dah! Cu a dingmi vawlei thar ahcun biaknak pakhat, a hmaanmi biak ning phunkhat lawng a um lai. Atu te hin a hmaan tein Pathian a biami hna he i hawikomh awkah a herhmi thil tuah cu fim a si hnga lo maw?