1. Zeicah vancungmi hna kong kan cawn?

JEHOVAH nih a chungkhar kong kha hngalhter a kan duh. Vancungmi cu Pathian chungkhar ah aa telmi an si. Baibal nih vancungmi kha “Pathian fapa” tiah a auh hna. (Job 38:7) Vancungmi nih zeidah an tuah? Hlanlio ah minung kha zeitindah an bawmh hna? Atu ah tah an kan bawm kho maw?—A Donghnak I Fianternak 8 ah zoh.

2. Vancungmi cu khoika in dah an rat? Vancungmi pa zeizat dah an um?

² Vancungmi cu khoika in dah an rat ti kha kan hngalh a hau. Jehovah nih Jesuh a ser hnuah “Pathian nih Khrih thawng cun van le vawlei i a ummi thil vialte kha a ser hna” tiah Kolose 1:16 nih a ti. Mah ah vancungmi an i tel. Vancungmi pa zeizat dah an um? Baibal nih vancungmi nuai tampi an um tiah a ti.—Salm 103:20; Biathlam 5:11.

3. Job 38:4-7 nih vancungmi hna kong he aa tlaiin zeidah a chim?

³ Jehovah nih vawlei a ser hlanah vancungmi pawl a ser hmasa hna tiah Baibal nih a kan cawnpiak. Vawlei an hmuh tikah vancungmi cu zeitindah an um? An i lawm tuk tiah Job Baibal cauk nih a ti. Annih cu hmunkhat ah Jehovah a biami, a lung aa rualmi chungkhar pakhat an si.—Job 38:4-7.

4. Vancungmi nih minung kongkau hngalh an duh ti kha zeitindah kan hngalh khawh?

⁴ Vancungmi nih minung kongkau, vawlei le minung  ca i Jehovah tinhnak kong hna kha hngalh an duh tuk. (Phungthlukbia 8:30, 31; 1 Piter 1:11, 12) Adam le Evi nih Pathian nawl an ngaih lo tikah vancungmi cu an ngaih a chia tuk lai. Atu ah mi tampi nih Jehovah nawl an ngaih lomi an hmuh tikah an ngaih a chia chinchin lai. Asinain mi pakhatkhat nih aa ngaihchih i Pathian sin a kir ṭhan tikah vancungmi cu an i lawm tuk. (Luka 15:10) Pathian a biami  hna cungah vancungmi cu lungthawhnak an ngei. Cucaah Jehovah nih vawleicung i a salle bawmh awk le huhphenh awkah vancungmi kha a hman hna. (Hebru 1:7, 14) Tahchunhnak cheukhat hi zohhmanh u sih.

5. Vancungmi nih hlanlio Pathian salle kha zeitindah an bawmh hna?

⁵ Jehovah nih Lot le a chungkhar kha Sodom le Gomorrah khua hrawhnak in an luat nakhnga bawmh awkah vancungmi pahnih a thlah hna. (Genesis 19:15, 16) A luancia kum tampi lioah profet Daniel cu chiandeih khor ah an rak thlak nain harnak zeihmanh a tong lo. Daniel nih hitin a rak chim: “Pathian nih chiandeih hna cu an kaa phih awkah a vancungmi kha a run thlah hna.” (Daniel 6:22) A hnuah, lamkaltu Piter thonginn in a luat nakhnga bawmh awkah Jehovah nih vancungmi a rak thlah. (Lamkaltu 12:6-11) Jesuh vawleicung a um lio zongah vancungmi nih an rak bawmh. Tahchunhnak ah, Jesuh tipil a in hnuah “vancungmi kha an ra i an rung bawmh.” (Marka 1:13) Thah a si laite zongah vancungmi pakhat nih “a rung hnemh.”—Luka 22:43.

6. (a) Vancungmi nih tuchan i Pathian miphun an bawmh hna ti kha zeitindah kan hngalh? (b) Zei biahalnak hna dah atu kan i ruah lai?

⁶ Tuchan ah vancungmi cu minung sinah an lang ti lo. Asinain Pathian nih a salle bawmh awkah a hman rih ko hna. Baibal nih hitin a ti: “BAWIPA a ṭihmi cu a vancungmi nih khan an zoh hna i ṭihnak chungin an luatter hna.” (Salm 34:7) Zeicah huhphenhnak kan herh? Kanmah harnak pek a duhmi a ṭhawngmi ral kan ngeih caah a si. Annih cu ahote dah an si? Khoika in dah an rat? Kanmah harnak pek awkah zeitindah an i zuam? A phi hngalh awkah Adam le Evi ser an si hnu, tlawmpal ah a cangmi kong kha i ruah u sih.

7. Satan hlennak cu zeitluk in dah a hlawh a tlin?

⁷ Vancungmi pakhat nih Pathian kha a ralchanh i midang nih keimah ka bia hna seh ti a duh kha Ṭhen 3nak ah kan i ruah cang. Mah vancungmi kha Baibal nih Satan Khuachia tiah a auh. (Biathlam 12:9) Satan nih Pathian kha midang zong nih ralchanh ve hna seh ti a duh. Cucaah Evi kha a rak hlen i mah caan thawkin mi tampi zong kha a hlen khawh hna. Asinain Abel, Enok le Noah ti bantuk mi tlawmte cu Jehovah cungah zumhfek tein an um.—Hebru 11:4, 5, 7.

8. (a) Vancungmi cheukhat cu zeitindah khuachia an hung si? (b) Buanchukcho in luat awkah khuachia nih zeidah an rak tuah?

⁸ Noah chan ah vancungmi cheukhat nih Jehovah kha an ralchanh ve. Annih nih vancung kha kaltak in minung pum an i lak i vawlei ah an rak ṭum. Cutin an tuahmi cu nupi ṭhit an duh caah a si tiah Baibal nih a ti. (Genesis 6:2 rel.) Asinain vancungmi caah cu bantuk thil tuah cu a palhmi a si. (Judas 6) Mah a ṭhalomi vancungmi hna bantukin mi tampi cu an ziaza a hun rawkral i an puarhrang. Cucaah Jehovah nih miṭhalo vialte hrawh awkah vawleicung pumpi ah buanchukcho a tlunter. Asinain zumhfekmi a salle tu cu a khamh hna. (Genesis 7:17, 23) Mah a ṭhalomi vancungmi hna cu buanchukcho in luat awkah vancung ah an kir ṭhan. Baibal nih annih kha khuachia tiah a auh hna. Annih cu Satan leiah an ṭang i Khuachia cu an uktu a hung si.—Matthai 9:34.

9. (a) Khuachia pawl van an kai ṭhan tikah zeidah a rak cang? (b) Zei kong dah kan i ruah lai?

⁹ Khuachia pawl nih Jehovah kha an ralchanh caah Jehovah nih a chungkhar ah i tel ṭhan dingin a cohlang ti hna lo. (2 Piter 2:4) Khuachia pawl nih minung pum an i lak kho ti lo nain ‘vawleicung mi vialte kha an hlen’ rih ko hna. (Biathlam 12:9; 1 Johan 5:19) Khuachia nih lam a phunphun  in mi an hlen hnaning kha i ruah u sih.—2 Korin 2:11 rel.

10. Khuachia nih mi kha zeitindah an hlen hna?

¹⁰ Khuachia nih lam tampi hmangin mi an hlen hna. Mi nih khuachia he dairek in asiloah hnam ngeimi le camhthiammi ti bantuk mi pakhatkhat hmangin pehtlaihnak an tuah. Khuachia he pehtlaihnak tuah kha khuachia thiamnak tiah auh a si. Asinain Baibal nih khuachia thiamnak kha sual a phawt i mah he aa pehtlaimi zeithil paoh hrial awkah ralrin a kan pek. (Galati 5:19-21) Zeicah? Ramvaimi pa pakhat nih saram a tlaih khawh nakhnga rap a hman bantukin khuachia nih mi pawl tlaih awk le uk khawh awkah hlennak a phunphun an hman.—A Donghnak I Fianternak 26 ah zoh.

11. Hmailei kong chimchungnak cu zeidah a si, mah kha zeicah kan hrial awk a si?

¹¹ An hmanmi hlennak phunkhat cu hmailei kong chimchungnak a si. Mah cu hmailei kong asiloah hngalh lomi thil kong hngalh khawh awkah khuachia ṭhawnnak hman kha a si. Mah ah arfi zoh in tuaknak, phe in tuaknak, thlalang fim zoh in tuaknak, kutṭial zoh in tuaknak le mang in tuaknak hna aa tel. Mi tampi nih cu bantuk thil hna cu ṭih a nung lo tiah an ruah nain ṭih a nung tukmi an si. Tahchunhnak ah, khuachia le hmailei kong chimtu cu an i pehtlai ti kha Baibal nih a langhter. Lamkaltu 16:16-18 ah “lim khuavang” nih ngaknu pakhat cu “hmailei thil um ding” kha a chimter khawh tiah a ti. Lamkaltu Paul nih khuachia a ṭhawlpiak hnuah mah minu te nih hmailei kong a chim kho ti lo.

12. (a) Mithi he pehtlaih i zuam cu zeicah ṭih a nun? (b) Pathian salle cu khuachia thiamnak aa telmi phungphai hna ah zeicah an i tel lo?

¹² Khuachia mi hlennak a dang phunkhat cu mithi he  i chawnh kha a si. Khuachia nih mithi hna he i chawnh khawh a si, a thimi hna thlarau cu a nung rih i anmah he pehtlaihnak tuah khawh a si asiloah harnak an kan pek khawh tiah zumhter an kan duh. Tahchunhnak ah, a hawikom asiloah a chungkhat a thimi pakhatkhat cu a thimi he bia i ruah khawh awkah thitlawn thiam sinah a kal men lai. Mah tikah thitlawn thiammi nih a thimi i a kong asiloah a aw in bia a chim men lai. (1 Samuel 28:3-19) Ruak vuining tampi cu mithi thlarau a nung rih timi zumhnak cungah hram aa bunh. Mah ah ruakvui pumhnak, an thih camtuak, mithi caah raithawi, nuhmei sinak phungphai le ih loin hngahnak hna aa tel. Khrihfa a simi cu, cu bantuk phungphai hna ah an i tel lo ruangah an chungkharmi asiloah an khuami hna nih an soi hna, an thangchiat hna i anmah he zeithil hmanh tuahṭi an duh lo. Asinain Khrihfa hna nih mithi cu khoika hmanhah an nung ti lo ti kha an hngalh. Mithi he pehtlaihnak tuah khawh a si lo i harnak zong an kan pe kho lo. (Salm 115:17) Cucaah i ralrin a hau. Zeitikhmanh ah mithi he pehtlaihnak tuah hlah asiloah khuachia thiamnak aa telmi phungphai hna ah i tel hlah.—Deuteronomi 18:10, 11 rel; Isaiah 8:19.

13. Hlanah khuachia a rak ṭihmi mi tampi cu zeitindah an um cang?

¹³ Khuachia nih mi kha a hlen hna lengah a ṭhih zong a ṭhih hna. Atu ah Satan le a khuachia pawl nih hrawh kan si lai caan a nai cang ti an hngalh caah hlan nakin an ṭhalo chinchin. (Biathlam 12:12, 17) Asinain khuachia a rak ṭihmi mi tampi cu atu ah an ṭih ti lo. Khuachia ṭihnak in zeitindah an luat?

14. Kumzabu pakhatnak i Khrihfa hna bantukin khuachia he i pehtlaih lo awkah zeidah kan tuah khawh?

¹⁴ Baibal nih khuachia dohning le anmah he i pehtlaih ti loin um khawhning kha a kan cawnpiak. Tahchunhnak  ah, Efesa khuami cheukhat cu biatak an hngalh hlanah khuachia he pehtlaihnak a tuahmi an si. Asinain mah kha hlawt dingin bia an khiah tikah zeidah an rak tuah? Baibal nih hitin a chim: “Camh a rak hmang tawnmi hna nih khan an cauk kha hmunkhat ah an pumh hna i zapi hmaiah khan an khangh hna.” (Lamkaltu 19:19) Khrihfa si an duh caah camhthiamnak he aa tlaimi an cauk vialte kha an hrawh. Tuchan zongah cu bantukin tuah a hau. Jehovah biak a duhmi nih khuachia he aa pehtlaimi zeithil paoh an hlawt a hau. Mah ah khuachia thiamnak kha ṭih a nung lomi le lungthawh awk ngai a lawhtermi cauk, mekazin, baisakup, poster, music le game hna an i tel. Mah lengah thil ṭihnung in i huhphenhnak caah hmanmi thil vialte zong aa tel.—1 Korin 10:21.

15. Satan le a khuachia pawl doh khawh awkah zeidah tuah a herh rih?

¹⁵ Efesa Khrihfa hna nih khuachia thiamnak he aa tlaimi cauk pawl an khangh hnu, kum tlawmpal ah “thlarau sual ṭhawnnak hna” kha an ‘doh’ a hau rih tiah lamkaltu Paul nih a ṭial. (Efesa 6:12) Efesa Khrihfa hna nih an cauk pawl an khangh hnu hmanhah anmah harnak pek awkah khuachia cu an i zuam rih. Cucaah zeidah an tuah a herh rih? Paul nih hitin a ti hna: “Zumhnak kha phaw caah i ken zungzal u law, cu phaw cun Khuachia nih mei bantuk a simi thal in aan kah hna tikah nan rak hmih [asiloah kham] khawh hna lai.” (Efesa 6:16) Ralkap pakhat cu raltuknak ah aa kenmi phaw nih a huhphenh khawh bantukin kan zumhnak nih a kan huhphenh khawh ve. Jehovah nih a kan huhphenh khawh ti kha kan zumh taktak ahcun Satan le a khuachia kha kan doh khawh hna lai.—Matthai 17:20.

16. Jehovah kan zumhnak kha zeitindah kan fehter khawh?

¹⁶ Jehovah kan zumhnak kha zeitindah kan fehter khawh? Nifate Baibal rel a hau i kanmah huhphenh awkah  Jehovah kan i bochan a hau. Jehovah cungah a fekmi zumhnak kan ngeih ahcun Satan le a khuachia hna nih harnak an kan pe kho lai lo.—1 Johan 5:5.

17. Zeinihdah khuachia sinin a kan huhphenh khawh rih?

¹⁷ Efesa Khrihfa hna nih zeidah an tuah a herh rih? Annih cu khuachia thiamnak in a khatmi khua ah a ummi an si. Cucaah Paul nih “zeitik caan paohah thlacam u” tiah a ti hna. (Efesa 6:18) A zungzal in Jehovah huhphenhnak hal an herh. Kannih tah zeitin? Kannih zong khuachia thiamnak in a khatmi vawlei ah kan um. Cucaah Jehovah huhphenhnak hmuh awkah thla kan cam awk a si i thla kan cam tikah Jehovah min kan hman awk a si. (Phungthlukbia 18:10 rel.) Satan hlennak in kan luat nakhnga thla kan cam peng ahcun Jehovah nih a kan leh lai.—Salm 145:19; Matthai 6:13.

18, 19. (a) Satan le khuachia pawl dohnak ah zeitindah teinak kan hmuh khawh? (b) A hnu ṭhen ah zei biahalnak a phi dah kan hmuh lai?

¹⁸ Khuachia thiamnak he aa tlaimi thil vialte kan hrial i huhphenhnak hmuh awkah Jehovah kan i bochan ahcun Satan le khuachia pawl kha kan doh khawh hna lai. Annih kha ṭih an hau lo. (Jeim 4:7, 8 rel.) Jehovah cu khuachia pawl nakin a let tampi in a ṭhawng deuh. Annih kha Noah chan ah dan a tat hna i hmailei ah a hrawh hna lai. (Judas 6) Satan dohnak ah kanmah lawng kan si lo ti kha i cinken. Kanmah huhphenh awkah Jehovah nih vancungmi a hman hna. (2 Siangpahrang 6:15-17) Jehovah bawmhnak thawngin Satan le khuachia pawl dohnak ah teinak kan hmu hrimhrim lai ti kha kan zumh khawh.—1 Piter 5:6, 7; 2 Piter 2:9.

¹⁹ Asinain sifah harnak a chuahtertu Satan le khuachia pawl hi zeicah Pathian nih atu tiang a hrawh cang hna hnga lo? Mah biahalnak a phi kha a hnu ṭhen ah kan hmuh lai.