1, 2 (a) A min lawng na hngalhmi minthangmi pakhat cu ṭha tein na hngalh tinak a si maw? Fianter. (b) Jesuh kong he aa tlaiin mi nih zeitindah an zumh?

VAWLEICUNG ah a min a thangmi mi tampi an um. Minthangmi cheukhat i an min kha na hngalh men ko hna lai. Asinain an min na hngalhnak men in an kong ṭha tein na hngalh tinak a si lo. Cun an nunnak kong le zei bantuk minung dah an si timi an kong a dikthliar in na hngalh tinak zong a si lo.

² A luancia kum 2,000 hrawngah vawleicung ah a rak nungmi Jesuh Khrih kong kha na theih men ko lai. Asinain Jesuh cu zei bantuk minung dah a si ti kha mi tampi nih an hngal lo. Mi cheukhat nih miṭha pakhat a si an ti, cheukhat nih profet a si an ti i cheukhat nih Pathian a si tiah an zumh. Nangtah zeitindah na ruah?—A Donghnak I Fianternak 12 ah zoh.

3. Jehovah Pathian le Jesuh Khrih kong hngalh cu na caah zeicah a biapit?

³ Jesuh kong biatak hngalh cu na caah a biapi. Zeicah? Baibal nih “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si” tiah a ti caah a si. (Johan 17:3) Jehovah le Jesuh kong biatak na hngalh ahcun vawlei paradis ah zungzal in na nung kho lai. (Johan 14:6) Jesuh kong hngalhnak nih aan bawmh khawh, zeicahtiah zeitindah nun ding, midang he zeitindah i pehtlaih ding timi ah Jesuh  cu zohchunh awk ṭha bik a si. (Johan 13:34, 35) Ṭhen 1nak ah Pathian kong biatak kan rak i ruah cang. Atu ah Jesuh kong Baibal cawnpiakmi kha i ruah u sih.

4. “Messiah” le “Khrih” timi sullam cu zeidah a si?

⁴ Jesuh a chuah hlan, kum tampi lioin Jehovah nih Messiah asiloah Khrih kha ka thlah lai tiah Baibal ah bia aa kam. “Messiah” timi biafang cu Hebru holh a si i “Khrih” timi biafang cu Greek holh a si. Mah biafang pahnih cu Pathian nih biakammi Messiah kha a thim lai i a hleikhunmi rian a pek lai timi sullam a ngei. Messiah nih Pathian biakam vialte kha a tlinter lai. Jesuh nih atu zongah aan bawmh khawh. Asinain Jesuh a chuah hlanah mi tampi nih ‘Messiah cu ahodah a si hnga?’ tiah an rak ruah.

5. Jesuh cu Messiah a si ti kha Jesuh zultu pawl nih an zum maw?

⁵ Jesuh zultu pawl nih Jesuh cu biakammi Messiah a si ti kha an lung a hring lo. (Johan 1:41) Tahchunhnak ah, Simon Piter nih Jesuh kha “Messiah kha na si” tiah a ti. (Matthai 16:16) Jesuh cu Messiah a si ti kha zeitindah kan zumh khawh?

6. Messiah thleidan khawh awkah lungthin ṭha a ngeimi hna kha Jehovah nih zeitindah a bawmh hna?

⁶ Jesuh a chuah hlanpi in mi nih Messiah an thleidan khawh nakhnga a bawmmi a kong tampi kha Pathian profet hna nih an rak ṭial. Mah nih zeitindah a kan bawmh? Na hmuh bal lomi minung pakhat kha mi an tamnak mawṭaw dinhnak ah don an in fial hei ti u sih. Mah pa he aa tlaimi a kong tlawmpal an in chimh ahcun na caah bawmtu a si ko lai. Cu bantukin Jehovah nih profet hna hmangin Messiah nih zeidah a tuah lai, zeidah a ton lai timi kong kha a kan chimh. Mah chimchungbia  a tlinmi nih Jesuh Messiah a si kha hngalhthiam awkah lungthin ṭha a ngeimi hna kha a bawmh hna.

7. Jesuh Messiah a si kha zei chimchungbia pahnih nih dah a langhter?

⁷ Mah chimchungbia pahnih hi ruathmanh. Pakhatnak ah, Jesuh a chuah hlan, kum 700 lengin Mikah nih Messiah cu khua hmete a simi Bethlehem ah a chuah lai tiah a rak chimchung. (Mikah 5:2) Jesuh cu cuka ah a chuak taktak. (Matthai 2:1, 3-9) Pahnihnak ah, Messiah cu AD 29 ah a chuak lai tiah Daniel nih a rak chimchung. (Daniel 9:25) Mah cu Jesuh biakammi Messiah a si ti fiang tein a langhtermi chimchungbia tampi lakah pahnih lawng an si rih.—A Donghnak I Fianternak 13 ah zoh.

8, 9. Jesuh tipil a in lioah Messiah a si a langhtermi zeithil dah a rak cang?

⁸ Jesuh cu Messiah a si ti kha Jehovah nih fiang tein a langhter. Pathian nih Tipil Petu Johan kha Messiah thleidan khawh awkah hmelchunhnak kaan pek lai tiah bia a kamh. AD 29 ah Johan nih Jesuh kha Jordan tiva i tipil a pek lioah Johan nih mah hmelchunhnak cu a rak hmuh. Baibal nih hitin a chim: “Tipil a in dih cangka cun Jesuh cu ti chung cun a chuak. Van kha aa hung i Pathian Thlarau cu ṭhuro bantukin a rung zuan i a cung i aa fut kha a hmuh. Cun vancung in aw pakhat a rung thang i, ‘Amah hi ka dawtmi ka Fapa a si, Amah cungah hin ka lung a tling,’ tiah a ti.” (Matthai 3:16, 17) Johan nih mah hmelchunhnak kha a hmuh i a theih tikah Jesuh cu Messiah a  si ti kha a hngalh. (Johan 1:32-34) Jehovah nih Jesuh kha a thiang thlarau a toih tikah Jesuh cu Messiah a hung si. Jesuh cu Hruaitu le Siangpahrang si awkah Pathian nih a thimmi a si.—Isaiah 55:4.

⁹ Baibal chimchungbia, Jehovah thengte nih a chimmi bia le Jesuh tipil in lioah Jehovah pekmi hmelchunhnak hna nih Jesuh cu Messiah a si ti kha an  langhter. Asinain Jesuh cu khoika in dah a rat i zei bantuk minung dah a si? Mah kong he aa tlaimi Baibal chimmi kha zoh u sih.

10. Jesuh vawleicung a rat hlan a nunnak he aa tlaiin Baibal nih zeidah a chim?

¹⁰Jesuh cu vawleicung a rat hlan, kum tampi lioin van ah a rak um cang tiah Baibal nih a ti. Mikah nih Messiah “a hram cu kan hnuleipi caan” in a si tiah a ti. (Mikah 5:2) Amah Jesuh theng nih minung in hrin ka si hlanah van ah ka rak um cang tiah voi tampi a chim. (Johan 3:13; 6:38, 62; 17:4, 5 rel.) Vawleicung a rat hlan hmanhin Jesuh cu Jehovah he a hleikhunmi pehtlaihnak an ngei.

11. Zeicah Jesuh cu Jehovah caah a sunlawi tuk?

¹¹ Jesuh cu Jehovah caah a sunglawi tukmi a si. Zeicah? Pathian nih zeizong vialte a ser hlanah a ser hmasa bikmi a si. Cucaah Jesuh cu “Pathian fater” tiah auh a si. * (Kolose 1:15) Cun Jehovah nih dairek in a sermi cu Jesuh lawnglawng hi a si. Cucaah Jesuh cu “Fapa ngeihchunte” tiah auh a si. (Johan 3:16) Jehovah nih thil dang vialte sernak ah a hmanmi cu Jesuh lawnglawng hi a si. (Kolose 1:16) Mah lengah vancungmi le minung sinah bia chim awk le lamhruainak hna pek awkah Jehovah nih a hman ruangah “Bia” ti zongin auh a si.—Johan 1:14.

12. Jesuh le Pathian cu an i khat lo ti kha zeitindah kan hngalh khawh?

¹² Mi cheukhat nih Jesuh le Pathian cu aa khatmi an si tiah an zumh. Asinain Baibal nih cun cutin a kan cawnpiak lo. Baibal nih Jesuh cu sermi a si tiah a ti, mah cu Jesuh  nih hramthawknak a ngei tinak a si. Asinain zeizong vialte a sertu Jehovah cu hramthawknak a ngei lo. (Salm 90:2) Pathian Fapa Jesuh nih zeitikhmanh ah Pathian si dingin aa zuam bal lo. Pa cu Fapa nakin a ngan deuh tiah Baibal nih fiang tein a kan cawnpiak. (Johan 14:28 rel; 1 Korin 11:3) Jehovah lawnglawng hi “Lianngan Bik Pathian” a si. (Genesis 17:1) Jehovah cu van le vawlei ah lianngan bik le a ṭhawng bikmi a si.—A Donghnak I Fianternak 14 ah zoh.

13. Baibal nih Jesuh kha “hmuh khawh lomi Pathian mui” tiah zeicah a ti?

¹³ Jehovah le a Fapa Jesuh cu van le vawlei ser an si hlan, kum nuai tampi chung naih tein rian an rak ṭuanṭi. Cucaah pakhat le pakhat an i daw tuk lai ti cu a fiang ko. (Johan 3:35; 14:31) Jesuh nih a pa sining hna kha ṭha tein aa zohchunh caah “hmuh khawh lomi Pathian mui” tiah Baibal nih a ti.—Kolose 1:15.

14. Jehovah Fapa cu minung pakhat in zeitindah hrin a si?

¹⁴ Jehovah Fapa nih vancung kha kaltak in vawleicung ah minung pakhat in chuah awkah lungtho tein a rak ṭum. Mah cu zeitindah a si khawh? Jehovah nih a Fapa nunnak kha ngaknu thiang Mary nauinn chungah a ṭhial. Cucaah Jesuh cu minung pa ngeih a herh lo. Cuticun Mary nih a tlingmi fapa kha a hrin i Jesuh tiah a auh.—Luka 1:30-35.

15. Jehovah kong kha zeitindah tam deuh in na hngalh khawh?

¹⁵ Jesuh a kong, a nunning le a ziaza hna kha Matthai, Marka, Luka le Johan Baibal cauk na relnak thawngin na hlathlai khawh. Mah cauk hna kha Thawngṭha cauk tiah auh an si. Jesuh cu a Pa he an i lawh caah amah kong na relmi nih Jehovah kong hngalh deuh awk zongah aan  bawmh lai. Cucaah Jesuh nih “keimah a ka hmutu paoh nih cun ka Pa kha an hmuh ve ko” tiah a ti khawhnak a si.—Johan 14:9.

16. Jesuh cawnpiaknak cu zeidah a si? Jesuh cawnpiaknak cu khoika in dah a rat?

¹⁶ Mi tampi nih Jesuh kha “Cawnpiaktu saya” tiah an auh. (Johan 1:38; 13:13) A cawnpiaknak lakah a biapi bikmi pakhat cu “Pennak Thawngṭha Bia” hi a si. Mah Pennak cu zeidah a si? Vancung in vawleicung dihlak a uk hngami Pathian cozah kha a si i mah pennak nih Pathian nawl a ngaimi hna kha thluachuah a pek hna lai. (Matthai 4:23) Jesuh cawnpiakmi vialte cu Jehovah sinin a rami an si. Jesuh nih hitin a ti: “Kaan cawnpiakmi hna hi keimah cawnpiakmi a si lo, a ka thlahtu ka Pa sinin a rami cawnpiaknak a si.” (Johan 7:16) Pathian Pennak nih vawleicung pumpi a uk lai timi thawngṭha kha Jehovah nih minung theihter a duh hna ti kha Jesuh nih a hngalh.

17. Jesuh nih khoika ah dah mi a cawnpiak hna? Jesuh nih midang cawnpiaknak rian kha zeicah fakpi in a ṭuan?

¹⁷ Jesuh nih khoika ah dah a cawnpiak hna? Mi a hmuh hnanak hmun paohah a cawnpiak hna. Khuapi, khuate, market, biakinn le inn ti bantuk hmunah a cawnpiak hna. A sinah mi an rat lai kha Jesuh nih a hngak lo. Amah theng an sinah a va kal. (Marka 6:56; Luka 19:5, 6) Jesuh nih cawnpiaknak caah a caan le a thazaang tampi kha a hman. Zeicah? Pathian nih cutin tuahter a duh kha a hngalh caah le a Pa nawl a ngaih zungzal caah a si. (Johan 8:28, 29) Jesuh nih mi kha a zaangfah hna ca zongah phung a chimhmi hna a si. (Matthai 9:35, 36 rel.) Biaknaklei hruaitu hna nih Pathian kong biatak le a Pennak kong mi an cawnpiak lomi hna kha Jesuh nih a  hmuh. Cucaah mi tam khawh chung tam nih thawngṭha an theih khawh nakhnga bawmh a duh hna.

18. Jesuh ngeihmi a ziaza hna lakah zeidah na duh bik?

¹⁸ Jesuh cu mi cungah dawtnak le zawnruahnak a ngeimi a si. Anih cu a nun a nem i fawi tein naih khawhmi a si. Ngakchia hmanh a sinah um an duh. (Marka 10:13-16) Jesuh cu a dingmi a si i ziaza rawhralnak le dinlonak kha a huat. (Matthai 21:12, 13) Jesuh chanah nu pawl cu tinvo tlawmte lawng an ngei i upatnak in pehtlaih an si lo. Asinain Jesuh nih cun upatnak le hmaizahnak in a pehtlaih zungzal hna. (Johan 4:9, 27) Jesuh cu aa toidormi zong a si. Tahchunhnak ah, voikhat cu lamkaltu pawl an ke kha a ṭawl hna, mah cu sal nih an tuah tawnmi a nautami rian a si.—Johan 13:2-5, 12-17.

19. Mi nih an herh taktakmi kha Jesuh nih a hngalh i bawmh a duh hna ti kha zei tahchunhnak nih dah a langhter?

¹⁹ Mi nih an herh taktakmi kha Jesuh nih a hngalh i bawmh a duh hna. Khuaruahhar lam in mi damter awkah Pathian ṭhawnnak a hman tikah mah cu fiang tein a lang. (Matthai 14:14) Tahchunhnak ah, thinghmui zawtnak a ngeimi pa cu a ra i “na duh ahcun na ka thianter khawh ko” tiah a ti. Mah pa a intuarnak le a harnak kha Jesuh nih a hmuh tikah a ngaih a chia tuk i bawmh a duh. Cucaah Jesuh nih a kut a samh i mah pa kha a tawngh i “nangmah thianter kha ka duh, va thiang cang” tiah a ti. Mah tikah a zawmi pa cu a dam. (Marka 1:40-42) Mah pa cu zeitindah a um lai ti khi na mitthlam ah na cuanter kho maw?

20, 21. Jesuh cu Pathian nawlngaihnak ah zeitindah zohchunh awk ṭha bik a si?

²⁰ Jesuh cu Pathian nawlngaihnak ah zohchunh awk ṭha bik a si. Zei bantuk thil a can hmanhah, a ral nih zeitin  an tuah hmanhah a Pa cungah zumhfek tein a um. Tahchunhnak ah, Satan nih a tukforh lio hmanhah Jesuh cu zumhfek tein a um. (Matthai 4:1-11) Jesuh a rualchan cheukhat nih Messiah a si kha an zum lo i “a hrut cang” tiah an ti ko nain Pathian rian kha zumhfek tein a ṭuan peng. (Marka 3:21) A ral pawl nih puarhrang ngaiin an pehtlaih lioah Jesuh cu Pathian cungah zumhfek tein a um i a ral pawl kha harnak a pe hna lo.—1 Piter 2:21-23.

²¹ Jesuh cu puarhrang ngaiin an pehtlaih i an thah lio hmanhah Jehovah cungah zumhfek tein a um. (Filipi 2:8 rel.) A thih ni ah a intuarmi kha na mitthlam ah cuarter hmanh. An tlaih, a hmaan loin sual an puh, ziknawh a eimi biaceihtu hna nih sual an phawt, mibu nih an nihsawh, ralkap nih an hrem i tung cungah thir in an khenh.  A thih lai ah “aa lim cang” tiah a ti. (Johan 19:30) A thih hnu, nithumnak ni ah Jehovah nih thlarau pum in a thawhter ṭhan. (1 Piter 3:18) Zarh tlawmpal hnuah Jesuh cu van ah a kai ṭhan i “Pathian orhlei kam ah khan a ṭhu.” Cun Pathian nih Siangpahrang nawlngeihnak a pek lai caan kha a hngak.—Hebru 10:12, 13.

22. Jesuh cu a Pa cungah zumhfek tein a um caah zei tinvo dah kan hmuh?

²² Jesuh cu a Pa cungah zumhfek tein a um zungzal caah Jehovah tinhnak bantukin vawleicung paradis ah zungzal nun khawhnak ding tinvo kan hmu. A hnu ṭhen ah Jesuh thihnak nih zeitindah zungzal nunnak a kan hmuhter timi kong kan i ruah lai.