1-3. Thihnak he aa tlaiin mi nih zei biahalnak hna dah an tuah, biaknak tampi nih zeitindah an leh hna?

BAIBAL nih “thihnak a um ti lai lo” tiah bia a kan kamh. (Biathlam 21:4) Tlanhnak man nih zungzal nunnak a kan hmuhter khawhning kha ṭhen 5nak ah kan i ruah cang. Asinain atu ah thihnak a um rih ko. (Phungchimtu 9:5) Cucaah hitin biahalnak kan tuah tawn: Kan thih tikah zei ah dah kan can hnga?

² Mah biahalnak a phi cu kan dawtmi pakhatkhat an thih tikah a hleiin a biapi. Cun mah biahalnak hna hi kan tuah khawh men: Khoika ah dah a kal hnga? A kan zohkhenh hnga maw? A kan bawm kho hnga maw? Kan i tong ṭhan ti lai maw?

³ Biaknak tampi nih mah biahalnak hna he aa tlaiin a phi a phunphun an pek. Biaknak cheukhat nih miṭha na si ahcun vancung ah na kai lai i miṭhalo na si ahcun hell mei ah hrem na si lai tiah an cawnpiak hna. Cheukhat nih na thih tikah thlarau pum ah naa thleng lai i a rak thi ciami na chungkhar pawl he nan umṭi lai tiah an cawnpiak hna. Cun a dang nih cun na thih hnuah biaceih na si lai i hrin ṭhan na si lai asiloah a dang pum in na kir ṭhan lai, mah cu midang pakhat in asiloah saram hmanhin a si kho men tiah an cawnpiak hna.

4. Biaknak tampi nih mithi kong he aa tlaiin zei bantuk a hrampi zumhnak dah an cawnpiak hna?

⁴ Biaknak tampi i an cawnpiaknak cu aa dangmi an lo nain mah cawnpiaknak vialte i a hrampi an zumhnak cu pakhat lawng a si. Mah cu mi pakhat a thih tikah a pum cheubang  a nung rih timi cawnpiaknak hi a si. Mah cu a hmaan maw?

5, 6. Kan thih tikah zei ah dah kan can?

⁵ Jehovah nih kan thih tikah zei ah dah kan can ti kha a hngalh caah mi pakhat a thih tikah a nunnak a dih tiah a kan cawnpiak. Thihnak cu nunnak he aa ralkahmi a si. Cucaah mi pakhat a thih hnuah a intuarnak le a hngalhnak hna cu khoika hmun hmanhah a nung ti lo i a taang ti lo. * Kan thih hnuah cun zeihmanh kan hmu kho ti lo, kan thei kho ti lo i kan ruat kho ti lo.

⁶ Siangpahrang Solomon nih “a thimi nih cun zeihmanh an hngal lo” tiah a ṭial. A thimi nih cun dawtnak le huatnak an ngei ti lo, “sheol ahcun rian siseh, ruahnak siseh, hngalhnak siseh, fimnak siseh a um ti lo.” (Phungchimtu 9:5, 6, 10 rel.) Salm 146:4 nih mi pakhat a thih tikah ‘a khuakhannak vialte cu a dong’ tiah a ti.

7. Thihnak he aa tlaiin Jesuh nih zeidah a chim?

⁷ Jesuh nih a hawikom ṭha Lazaruh a thih tikah a zultu pawl kha “kan hawi Lazaruh kha aa hngilh cang” tiah a ti hna. Mah cu Lazaruh cu aa din tiah Jesuh nih a ti duhnak a si lo. Cucaah “Lazaruh kha a thi” tiah a chimh hna. (Johan 11:11-14) Jesuh nih thihnak kha i hngilh he a tahchunh. Lazaruh cu van ah a kai cang asiloah a thi ciami a chungkhar hna sinah a um cang tiah a chim lo. Cun Lazaruh cu hell ah hrem a si ti zongin a chim lo. Midang in asiloah saram in hrin ṭhan a si ti zongin a chim lo. Anih cu mang manh loin thi thlup in aa hngilhmi bantukin thihnak ah aa hngilh.  A dang Baibal caang hna zong nih thihnak kha i hngilh he an tahchunh. Baibal nih Steven cu thah a si tikah “thihnak ah aa hngilh” tiah a ti. (Lamkaltu 7:60, NW) Lamkaltu Paul zong nih Khrihfa cheukhat cu “thihnak ah an i hngilh” tiah a ṭial.—1 Korin 15:6, NW.

8. Pathian nih minung hi thi dingin a kan sermi a si lo ti kha zeitindah kan hngalh?

⁸ Pathian nih Adam le Evi kha a hnuah thi ṭhan te dingin a sermi hna an si maw? An si lo. Jehovah nih a tlingmi ngandamnak he zungzal in nun awkah a sermi hna an si. Jehovah nih minung a kan ser tikah zungzal nun duhnak lungthin a kan pek. (Phungchimtu 3:11, NW) Nulepa nih an fale an tar i  an thihmi kha an duh lo bantukin Jehovah zong nih a duh ve lo. Pathian nih zungzal nun dingin a kan ser a si ahcun zeicah kan thih kun?

9. Jehovah nih Adam le Evi nawlbia a pekmi hna cu zeicah aa tlakmi a si?

⁹ Eden dum ah Jehovah nih Adam kha hitin a ti: “Dum chung i a ummi thingkung vialte hi an thei na ei dih ko hna lai, sihmanhsehlaw a ṭha le a ṭhalo hngalhnak pe khotu thingkung a tlai bel hi na ei lai lo. Cu thingthei cu na ei hrimhrim lai lo. Na ei ahcun, na ei ni hrimhrim ah na thi lai.” (Genesis 2:9, 16, 17) Mah nawlbia cu zulh awkah a har lo, cun a ṭha le a ṭha lo kongah Jehovah nih Adam le Evi kha chimhnak nawl a ngeih hna. Adam le Evi nih Jehovah bia an ngaihnak thawngin a nawlngeihnak an upat kha an langhter khawh. Cun Pathian nih zeizong vialte a pekmi hna caah an i lawmhnak zong an langhter khawh.

10, 11. (a) Satan nih Adam le Evi kha zeitindah a hlen hna? (b) Adam le Evi nih an tuahmi thil caah zeicah i silhnalh awk a um lo?

¹⁰ Ngaihchiat awk ngai a simi cu Adam le Evi nih Jehovah nawlngaih lo awkah an i thim. Satan nih Evi kha hitin a ti: “Dum chung i a ummi thingthei hi a zeihmanh nan ei lai lo tiah Pathian nih aan ti taktak hna maw?” Mah tikah Evi nih hitin a leh: “Dum laifang i a ummi thingthei khi dah ti lo cu, dum chung i a ummi thingthei vialte hi a zei paoh kan ei khawh ko hna, . . . Pathian nih khi thing khi cu a tlai nan ei lai lo, a tawngh zong nan tawng lai lo, nan tawngh ahcun nan thi lai a kan ti.”—Genesis 3:1-3.

¹¹ Satan nih hitin a ti: “Cucu a hmaan lo, nan thi lai lo. Pathian nih cu bantukin a ti cu, kha thingthei nan ei ahcun nan ei cangka in amah bantukin hngalhnak nan ngei ve lai i a ṭha le a ṭhalo kha nan hngal ve lai ti a hngalh caah a si.” (Genesis 3:4-6) A ṭha le a ṭhalo kongah keimah tein biakhiahnak ka tuah khawh tiah Evi kha Satan nih ruahter  a duh. Mah lengah Pathian nawl a ngaih lo ahcun zeidah a cang lai timi kong he aa tlaiin lihbia a chim. Satan nih nan thi lai lo tiah a ti caah Evi nih thingthei tlawmpal kha a lawh i a ei, cun a va zong kha tlawmpal a pek ve. Jehovah nih thingthei ei a thlauhmi hna kha Adam le Evi nih an hngalh. Asinain thingthei an einak thawngin a fiang i zulh a fawimi nawlbia kha hramhram in an buar. Thingthei an eimi nih dawtnak a ngeimi vancung an Pa an upat lo kha a langhter. An tuahmi thil caah silhnalh khawhnak zeihmanh a um lo.

12. Adam le Evi nih Jehovah nawl an ngaih lomi cu zeicah ngaihchiat tuk awk a si?

¹² Hmasa bik kan nu le kan pa nih Sertu an upat lomi cu zeitluk ngaihchiat awk dah a si. Na cawm i na zohkhenhmi na fapa asiloah na fanu nih aan ralchanh i tuahter na duh lomi thil a tuah ahcun zeitindah na um lai? Na lung a fak tuk lai, a si ko lo maw?

13. Jehovah nih “leidip ah na kir ṭhan lai” a ti tikah zeidah a chimduhmi a si?

¹³ Adam le Evi nih nawl an ngaih lo ruangah zungzal nunnak an sung. Jehovah nih Adam kha “leidip na si i leidip ah na kir ṭhan lai” tiah a ti. (Genesis 3:19 rel.) Adam cu ser a si hlan bantukin leidip ah a kir ṭhan lai tinak a si. (Genesis 2:7) Adam cu sualnak a tuah tikah a thi i a um ti lo.

14. Zeicah kan thih?

¹⁴ Adam le Evi nih Pathian nawl rak ngai hna sehlaw atu tiang an nung rih ko hnga. Asinain Pathian nawl an ngai lo,  sualnak an tuah i a donghnak ah an thi. Sualnak cu ṭih a nung tukmi zawtnak he aa lo. Mah sualnak ro kha hmasa bik kan nu le kan pa sinin kan co. Kan dihlak in misual in hrin kan si caah kan thihmi a si. (Rom 5:12) Asinain mah cu minung ca i Pathian tinhmi a si lo. Pathian nih minung hi thihter a kan duh lo. Cucaah Baibal nih thihnak kha “ral” tiah a ti.—1 Korin 15:26.

15. Mithi kong biatak nih zeitindah a kan luatter?

¹⁵ Thihnak he aa tlaimi biatak nih a hmaan lomi ruahnak tampi in a kan luatter. Baibal nih mithi cu fahnak asiloah ngaihchiatnak an tong ti lo tiah a kan cawnpiak. Kanmah nih kan chawn kho hna lo i anmah zong nih an kan chawn kho lo. Kanmah nih kan bawm kho hna lo i anmah zong nih an kan bawm kho lo. Mithi nih harnak an kan pek khawh lo caah kan ṭih hna awk a si lo. Asinain biaknak tampi nih a thimi cu kaakhatkhat ah an nung rih, cucaah biaknaklei hruaitu asiloah mithiang in an hmuhmi hna kha tangka kan pek hna ahcun a thimi kha kan bawmh khawh hna tiah an cawnpiak hna. Mithi kong biatak hngalhnak nih cu bantuk hlennak hna in a kan luatter.

16. Biaknak tampi nih mithi kong he aa tlaiin zeitindah a hmaan loin an cawnpiak hna?

¹⁶ Satan nih kanmah hlen awk le a thimi pawl an nung rih ti ruahter awkah a hmaanlomi biaknak kha a hman. Tahchunhnak ah, biaknak cheukhat nih kan thih tikah kan pum cheubang cu kaakhatkhat ah a nung rih tiah an cawnpiak hna. Na biaknak ah cutin an in cawnpiak hna maw asiloah Baibal nih tah cutin a kan cawnpiak maw? Mi pawl kha Jehovah he an i hlat nakhnga Satan nih lihbia a hman.

17. Jehovah nih hell mei ah mi a hrem hna timi cawnpiaknak nih zeicah Jehovah thang a chiatter?

¹⁷ Biaknak tampi i an cawnpiaknak cu khuaruahhar a si.  Tahchunhnak ah, biaknak cheukhat nih miṭhalo pawl cu hell mei ah a zungzal in hrem an si tiah an cawnpiak hna. Cu bantuk cawnpiaknak nih Jehovah thang a chiatter. Pathian nih cu bantuk lam in mi a hrem bal lo. (1 Johan 4:8 rel.) Chimh a ngai lomi a fa kut kha mei ah a khangmi pa khi zeitindah na hmuh lai? Mah pa kha a puarhrang tukmi in na hmuh ko lai. Amah he i theihhngalh kha na duh lai lo. Jehovah kong he aa tlaiin Satan nih cutin ruahter a kan duh.

18. Mithi kha zeicah kan ṭih hna awk a si lo?

¹⁸ Biaknak cheukhat nih minung hi kan thih tikah thlarau ah kan i cang tiah an cawnpiak hna. Cun a thimi hna thlarau cu ṭhawnnak a ngeimi hawikom asiloah ṭih a nungmi ral ah an i cang kho. Cucaah kan upat hna awk le kan ṭih hna awk a si tiah an cawnpiak hna. Mi tampi nih mah lihbia kha an zumh. A thimi kha an ṭih hna caah Jehovah biak canah anmah tu kha an biak hna. Mithi nih cun zeihmanh an hngal lo i zei intuarnak hmanh an ngeih ti lo caah kan ṭih hna awk a si lo ti kha i cinken. Jehovah cu a kan Sertu a si. A hmaanmi Pathian a si i amah lawnglawng kha kan biak awk a si.—Biathlam 4:11.

19. Mithi kong biatak hngalhnak nih zeitindah a kan bawmh khawh?

¹⁹ Mithi kong biatak kan hngalh caah a hmaan lomi biaknak hlennak in kan luat. Mah biatak nih kan nunnak kong le hmailei ruahchannak kong he aa tlaiin Jehovah biakam kha hngalhthiam awkah a kan bawmh.

20. A hnu ṭhen ah zei kong dah kan i ruah lai?

²⁰ A luancia kum tampi lioah Pathian sal Job nih hitin biahalnak a rak tuah: “Mi cu a thih ahcun a nung ṭhan kho lai maw?” (Job 14:14) A thi cangmi pakhat cu a nung ṭhan kho taktak hnga maw? Baibal in Pathian nih a phi a kan pekmi cu lungthawh awk ngai a si. Mah kong kha a hnu ṭhen ah kan i ruah lai.