1. Minung ca i Pathian tinhnak cu zeidah a si?

MINUNG ca i Pathian tinhnak cu a ṭha tuk. Pathian nih hmasa bik mipa le minu, Adam le Evi kha a ser hna i aa dawh tukmi dum ah a chiah hna. Aa tinhnak cu Adam le Evi nih tefa ngeih in vawleicung pumpi paradis ah canter awk le saram pawl zohkhenh awkah a si.—Genesis 1:28; 2:8, 9, 15; A Donghnak I Fianternak 6 ah zoh.

2. (a) Pathian nih aa tinhnak a tlinter lai ti kha zeitindah kan hngalh khawh? (b) Zungzal nunnak he aa tlaiin Baibal nih zeidah a chim?

² Paradis ah kan um lai tiah na ruat bal maw? Jehovah nih ‘kaa tinhmi kha ka tlinter lai. Hi bia cu keimah nih ka chim i a tling lai’ tiah a ti. (Isaiah 46:9-11; 55:11) Pathian nih aa tinhmi cu a tlinter hrimhrim lai, zeithil hmanh nih a dawn kho lai lo. Jehovah nih vawlei a ser tikah tinhnak a ngei. “Vawlei cu thetse ram, ram pakpalawng ah a ser lo.” (Isaiah 45:18) Minung kha vawleicung pumpi ah um hna seh ti a duh. Pathian nih zei bantuk minung dah um hna sehlaw zei can dah um hna seh ti a duh? Baibal nih hitin a ti: “A dingmi cu ram chungah him tein an um lai i ram [“vawlei,” NW] cu zungzal in anmah ta a si lai.”—Salm 37:29; Biathlam 21:3, 4.

3. Minung an zawt i an thih ruangah zei biahalnak dah na tuah khawh men?

³ Asinain atu ah mi cu an zaw, an fak i an thi. Hmun tampi ah pakhat le pakhat an i do i an i that. Mah cu Pathian tinhmi a si lo ti cu a fiang ko. Cu a si ah zeithil dah  a cang, zeicah? Mah kong cu Baibal lawng nih a fianter khawh.

4, 5. (a) Eden dum ah rul hmangin Evi sin bia a chimmi cu ahodah a si? (b) Miṭha pakhat cu zeitindah mifir pakhat ah aa thlen?

⁴ Pathian nih “Khuachia asiloah Satan” tiah timi ral pakhat a ngei tiah Baibal nih a chim. Satan nih Eden dum ah Evi sin biachim awkah rul kha a hman. (Biathlam 12:9; Genesis 3:1) Rul kha bia a chim khomi bantukin Satan nih a rak tuah.—A Donghnak I Fianternak  7 ah zoh.

⁵ Cu a si ah Satan Khuachia hi Pathian nih a sermi a si maw? A si lo. Pathian nih Adam le Evi ca vawlei a rak sersiam lioah vancung ah a ummi vancungmi pakhat cu a lungput aa thleng i Khuachia a hung si. (Job 38:4, 7) Mah cu zeitindah a si khawh? Miṭha pakhat cu zeitindah aa thlen i mifir a hung si khawh? Anih cu mifir pakhat in hrinmi a si lo. Asinain amah ta a si lomi thil pakhat kha a duh tuk. Mah kong kha a ruah peng caah a duhnak cu a ṭhawng chinchin. A hnu i caanṭha a hmuh tikah mah thil kha a fir. Cuticun amahle amah mifir pakhat ah aa ser.—Jeim 1:13-15; A Donghnak I Fianternak  8 ah zoh.

6. Vancungmi pakhat cu zeitindah Pathian ral a hung si?

⁶ Satan zong cutin a si ve. Jehovah nih Adam le Evi kha a ser hna hnuah tefa ngei u law nan tefa cu “vawleicung khuazakip ah khat hna seh” tiah a ti hna. (Genesis 1:27, 28) ‘Minung vialte nih Jehovah biak loin keimah tu ka bia hna sehlaw zeitluk in dah a ṭhat lai’ tiah mah vancungmi cu khua a rak ruat ko lai. Mah kong kha a ruah deuhdeuh tikah a ṭhalomi a duhnak cu a ṭhang deuhdeuh ve. Mi nih amah kha ka bia hna seh ti a duh. Cucaah Evi kha a rak hlen. (Genesis 3:1-5 rel.) Cutin a rak tuahnak thawngin anih cu Satan Khuachia, Pathian ral a hung si.

7. (a) Adam le Evi cu zeicah an thih? (b) Zeicah kan tar i kan thih?

 ⁷ Adam le Evi nih Pathian nawlngaih loin thingthei kha an rak ei. (Genesis 2:17; 3:6) Jehovah kha an ralchanh i sualnak an tuah caah Jehovah nih a chim bantukin an thi. (Genesis 3:17-19) An fale zong misual an si caah an thi ve. (Rom 5:12 rel.) Adam le Evi tefa misual an sinak a ruang kha hngalhthiam awkah mah tahchunhnak hi zohhmanh. A depmi uhkang in changreu an ser ahcun changreu ah a depnak tete a um ve ko lai. Adam nih Pathian nawl a ngaih lo tikah anih cu misual a hung si. Kannih cu Adam tefa kan si caah kan dihlak in misual kan si ve. Mah ruangah minung cu kan tar i kan thihmi a si.—Rom 3:23; A Donghnak I Fianternak 9 ah zoh.

8, 9. (a) Satan nih Adam le Evi kha zeidah zumhter a duh hna? (b) Jehovah nih ralchanhtu hna kha zeicah a thah colh hna lo?

⁸ Satan nih Adam le Evi kha Pathian nawlngaih lo dingin a hlen hna tikah Jehovah a ralchanhmi a hung si. Jehovah cu lih a chimmi uktu ṭhalo a si i an caah thilṭha a duhpiak hna lo tiah Adam le Evi kha zumhter a duh hna. Pathian nih minung kha zeidah tuah ding timi chimh a hau lo, a ṭha le a ṭhalo kongah Adam le Evi nih anmah tein biakhiahnak an tuah awk a si tiah Satan nih a ti. Mah tikah Jehovah nih zeidah a tuah lai? Dotu pawl kha a thah khawh hna i ralchanhnak kha a donghter khawh. Asinain cutin a tuah ahcun Satan mi lihchim a si kha a langhter kho lai maw? A langhter kho lai lo.

⁹ Cucaah Jehovah nih dotu pawl kha a that colh hna lo. Mah canah minung kha anmah tein i uk awkah caan caankhat chung a awnh hna. Mah nih Satan mi lihchim a si ti le minung caah a ṭha bikmi Jehovah nih a hngalh ti kha fiang tein a langhter lai. Ṭhen 11nak ah mah kong kha tam deuh in kan i ruah te lai. Asinain Adam le Evi biakhiahnak he aa tlaiin zeitindah na ruah? Pathian nawlngaih loin  Satan an zumhmi cu an caah a phu maw? Adam le Evi nih an ngeihmi vialte hi Jehovah nih a pekmi hna a si. A tlingmi nunnak a pek hna, aa dawh tukmi umnak a pek hna i lungsinak a pemi rian zong a pek hna. Asinain Satan nih cun an caah a ṭhami zeithil hmanh a pe bal hna lo. Cuka hmun ah rak um ve law nangtah zeidah na tuah lai?

10. Kan dihlak in zei a biapimi thim awk dah kan ngeih?

 ¹⁰ Tuchan zongah cu bantukin thim ding kan ngei ve i kan nunnak cu mah kan i thimmi cungah aa hngat. Jehovah kha kan Uktu in a nawlngaih awkah kan i thim kho i Satan mi lihchim a si langhternak ah kan bawmh khawh. Asiloah Satan kha kan uktu in kan i thim khawh. (Salm 73:28; Phungthlukbia 27:11 rel.) Hi vawleicung ah mi tlawmte lawnglawng nih Pathian nawl an ngaih. A tak ti ahcun Pathian cu hi vawlei uktu a si lo. Pathian a si lo ahcun ahodah a si kun?

11, 12. (a) Satan nih Jesuh a tukforhnak bia in zeidah kan hngalh khawh? (b) Satan cu hi vawlei uktu a si ti kha zei Baibal caang hna nih dah an langhter?

¹¹ Hi vawlei uktu taktak cu ahodah a si ti kha Jesuh nih a hngalh. Voikhat cu Satan nih “vawleicung peng le ram vialte le an sunparnak vialte kha a hmuhsak dih.” Cun Jesuh kha hitin a ti: “Na khuk naa bil i na ka biak ahcun hi vialte hi kaan pek dih lai.” (Matthai 4:8, 9; Luka 4:5, 6) Hitin i hal: ‘Mah pennak hna cu Satan ta an si lo ahcun Jesuh sinah cu bantuk bia a chim kho hnga maw?’ A chim kho lai lo. Vawleicung cozah vialte cu Satan ta an si.

¹² Hitin na ruah men ko lai: ‘Satan cu zeitindah vawleicung uktu a si khawh? Jehovah cu van le vawlei a sertu Cungnung Bik Pathian a si lo maw?’ (Biathlam 4:11) Jehovah cu Cungnung Bik a si ko nain Jesuh nih Satan kha “hi vawlei uktu” tiah fiang tein a rak auh. (Johan 12:31; 14:30; 16:11) Lamkaltu Paul nih Satan kha “hi vawlei khuazing ṭhalo” tiah a rak auh. (2 Korin 4:3, 4) Lamkaltu Johan zong nih “vawlei hi a pumpi in mi ṭhalopa kut tangah a um” tiah a rak ṭial.—1 Johan 5:19.

13. Zeicah vawlei thar kan herh?

¹³ Hi vawlei cu ṭih a nung chin lengmang. Kan pawngkam ah raltuknak, ziaza rawhralhnak, chungthu lengnal sinak le zaangennak hna in an khat. Minung nih zeitin an i zuam hmanhah mah buaibainak hna hi an hlo kho lo. Asinain a rauhhlan ah Pathian nih Armageddon raltuknak chungah hi vawlei ṭhalo hi a hrawh cang lai i a dingmi vawlei thar in a airolh cang lai.—Biathlam 16:14-16; A Donghnak I Fianternak 10 ah zoh.

14. Pathian nih a Pennak Uktu si awkah ahodah a thim? Jesuh kong he aa tlaiin Baibal nih zeidah a chimchung?

¹⁴ Jehovah nih vancung Pennak asiloah cozah i Siangpahrang dingah Jesuh Khrih kha a thim. A luancia kum tampi lioin Baibal nih Jesuh cu “Daihnak Bawi” tiah ti a si lai i a uknak cu zeitikhmanh ah a dong lai lo tiah a rak chimchung. (Isaiah 9:6, 7) Mah pennak he aa tlaiin Jesuh nih a zultu pawl kha hitin thlacam awkah a cawnpiak hna: “Na Pennak cu rung tlung ko seh, vancung khua ah na duhnak an tuah bangin vawleicung ah hin tuah si ve ko seh.” (Matthai 6:10) Ṭhen 8nak ah Pathian Pennak nih zeitindah hi vawlei cozah vialte hi a airolh lai ti kha kan i ruah te lai. (Daniel 2:44 rel.) Cun Pathian Pennak nih vawlei kha paradis ah a canter lai.—A Donghnak I Fianternak  11 ah zoh.

15. “Vawlei thar” timi cu zeidah a si?

¹⁵ Baibal nih hitin a ti: “Kannih cu Pathian nih a kan kamhmi van thar le vawlei thar, dinnak a umnak hmun kha kan hngak.” (2 Piter 3:13; Isaiah 65:17) Baibal nih “vawlei” tiah a ti tikah vawleicung i a ummi minung kha a chimduhmi a si tawn. (Genesis 11:1, NW) Cucaah dinnak a umnak hmun “vawlei thar” timi nih Pathian mithmai ṭha a hmumi minung kha a chimduhmi a si.

16. Pathian nih vawlei thar ah a ummi hna kha zei laksawng dah a pek hna lai, mah laksawng hmuh awkah zeidah kan tuah a herh?

 ¹⁶ Jesuh nih vawlei thar ah a um dingmi cu “zungzal nunnak” pek an si lai tiah bia aa kam. (Marka 10:30) Mah laksawng hmuh awkah zeidah kan tuah a herh? A phi hmuh awkah zaangfahnak in Johan 3:16 le 17:3 kha kau law rel. Vawlei Paradis nunnak kong Baibal chimmi kha atu i ruah u sih.

17, 18. Vawleicung pumpi ah daihnak le himnak a um lai ti kha zeitindah kan hngalh khawh?

¹⁷ Ṭhatlonak, raldohnak, mangṭam le zaangennak hna a um ti lai lo. Hi vawleicung ah zei bantuk miṭhalo hmanh an um ti lai lo. (Salm 37:10, 11) Pathian nih “vawleicung pumpi ah ral cu a daihter dih” lai. (Salm 46:9; Isaiah 2:4) Mah tikah vawleicung cu Pathian a dawmi le a nawl a ngaimi in an khat lai. Zungzal in daihnak a um lai.—Salm 72:7.

¹⁸ Jehovah miphun cu him tein khua an sa lai. Baibal chan ah Israel mi cu Pathian nawl an ngaih tikah Pathian nih a huhphenh hna i him tein khua an rak sa. (Levitikas 25:18, 19) Paradis ah cun zeithil hmanh asiloah ahohmanh kan ṭih ti hna lai lo. A zungzal in himnak kan hmu lai.—Isaiah 32:18; Mikah 4:4 rel.

19. Vawlei thar ah ti le rawl tampi a um cang lai tiah zeicah kan zumh khawh?

¹⁹ Ti le rawl tampi a um cang lai. “Ram chungah rawl tampi in um ko seh; . . . tlang i a ummi rawl kung ṭha bantuk nih tlang vialte cu tuam dih hna seh.” (Salm 72:16) Jehovah nih “thluachuah a kan pek” lai i “vawlei nih rawl kha a chuahter” lai.—Salm 67:6.

20. Vawleicung pumpi cu paradis ah aa cang lai ti kha zeitindah kan hngalh khawh?

²⁰ Vawleicung pumpi cu paradis ah aa cang lai. Mikip nih aa dawh tukmi inn le dum an ngei cang lai. (Isaiah  65:21-24; Biathlam 11:18 rel.) Vawleicung pumpi cu Eden dum bantukin aa dawh tuk cang lai. Jehovah nih kan herhmi zeithil paoh a kan pek zungzal lai. Baibal nih hitin a chim: “Zaa lak in a pek hna i an dihlak in an herhmi kha tling tein an hmuh.”—Salm 145:16.

21. Minung le saram karlak ah daihnak a leng cang lai ti kha zeitindah kan hngalh?

²¹ Minung le saram karlak ah daihnak a leng cang lai. Saram nih minung kha harnak an pe ti hna lai lo. Atu i ṭih a nungmi saram hna hi ngakchia tete hmanh nih an ṭih ti hna lai lo.—Isaiah 11:6-9; 65:25 rel.

22. A zawmi hna caah Jesuh nih zeidah a tuah cang lai?

²² Ahohmanh an zaw ti lai lo. Jesuh nih vawleicung a um lioah mi tampi kha a rak damter hna. (Matthai 9:35; Marka 1:40-42; Johan 5:5-9) Asinain Pathian Pennak Siangpahrang in Jesuh nih vawlei a uk tikah mikip kha a damter hna lai. Mah tikah ahohmanh “ka zaw tiah an zai ti lai lo.”—Isaiah 33:24; 35:5, 6.

23. A thimi hna caah Pathian nih zeidah a tuah lai?

²³ A thimi hna an nung ṭhan lai. Pathian nih a thimi mi tampi kha ka nunter ṭhan hna lai tiah bia aa kam. “Minung hi miṭha he miṭhalo he thihnak in kan tho ṭhan dih lai.”—Johan 5:28, 29 rel; Lamkaltu 24:15.

24. Paradis nunnak kong he aa tlaiin zeitindah na ruah?

²⁴ Kan dihlak in thim awk pakhat kan ngei. Jehovah kong cawn awk le biak awkah kan i thim kho asiloah kan duhmi thil kha kan tuah khawh. Jehovah biak awk kan i thim ahcun a ṭha tukmi hmailei ruahchannak kan ngei lai. Mipa pakhat nih a thih hnuah rak ka philh te hlah tiah Jesuh kha a ti tikah Jesuh nih “Paradis ah keimah sinah na um lai” tiah bia a rak kamh. (Luka 23:43) Jesuh Khrih kong le Jesuh nih Pathian biakam zeitindah a tlinter lai timi kong kha tam deuh in hlathlai u sih.