ṬHEN HLEINGA
A Hmaanmi Lam In Pathian Biaknak
1. A hmaanmi lam in Pathian kan biak khawh nakhnga ahonih dah a kan cawnpiak khawh?
BIAKNAK tampi nih Pathian kong biatak kha kan cawnpiak hna tiah an ti. Asinain mah cu a si kho lomi a si, zeicahtiah biaknak tampi nih Pathian kong biatak le zeitindah biak ding a si timi kong mi an cawnpiak hna tikah aa dang cio. Kannih tah zeitindah a hmaanmi lam in Pathian kha kan biak khawh? Zeitindah Jehovah kan biak awk a si ti a kan cawnpiak khotu cu Jehovah lawnglawng hi a si.
2. A hmaanmi lam in Pathian biak awkah zeitindah na cawn khawh?
2 Jehovah nih a hmaanmi lam in amah kan biak khawh nakhnga Baibal a kan pek. Cucaah Baibal na hlathlai ahcun a cawnpiaknak in ṭhatnak hmuh awkah Jehovah nih aan bawmh lai. Zeicahtiah Jehovah nih aan dawt tuk caah a si.—Isaiah 48:17.
3. Pathian nih zeidah tuah hna seh ti a kan duh?
3 Mi cheukhat nih biaknak dihlak hi Pathian nih a cohlan tiah an ti, asinain Jesuh nih cun cutin a kan cawnpiak lo. Hitin a ti: “‘Bawipa, Bawipa,’ tiah a ka timi paoh in vancung Pennak chungah an lut dih lai tinak a si lo, sihmanhsehlaw vancung i a ummi ka Pa nih tuah hna seh ti a duhmi a tuahmi lawnglawng kha an lut lai.” Cucaah Pathian duhnak kha kan hngalh a hau, cun kan tuah a hau. Mah cu a biapi tukmi a si, zeicahtiah Pathian nawl a ngai lomi kha Jesuh nih “ṭhatlonak a tuahtu” miṭhalo he a tahchunh hna caah a si.—Matthai 7:21-23.
4. Pathian duhnak tuahnak kong he aa tlaiin Jesuh nih zeidah a chim?
4 Pathian duhnak nan tuah tikah zuamcawhnak nan tong lai tiah Jesuh nih ralrin a kan pek. Hitin a ti: “Hell ah a kalmi lam cu a kau i a fawi i mi tampi nih an zulh caah kutka bi chungah khan lut tuah u. Nunnak a phanmi lam cu a har i a kutka cu a bi i mi tlawmte lawnglawng nih an hmuh.” (Matthai 7:13, 14) A harmi lam asiloah a hmaanmi lam in Pathian biaknak nih zungzal nunnak lam ah a kan hruai. A kaumi lam asiloah a hmaan lomi lam in Pathian biaknak nih thihnak lam ah a kan hruai. Asinain Jehovah nih ahohmanh thihter a kan duh lo. Cucaah amah kong biatak cawnnak caanṭha kha mikip a kan pek.—2 Piter 3:9.
A Hmaanmi Lam In Pathian Biaknak
5. A hmaanmi lam in Pathian a biami hna kha zeitindah na thleidan khawh hna?
5 A hmaanmi lam in Pathian a biami hna cu thleidan khawh an si tiah Jesuh nih a ti. An zumhnak le an tuahsernak ṭha tein hlathlainak thawngin thleidan khawh an si. Hitin a ti: “Annih cu an theitlai khan nan rak hngalh ko hna lai. . . . A ngan a dammi thingkung nih theiṭha a tlai.” (Matthai 7:16, 17) Pathian a biami cu a tlingmi an si tinak a si lo. Asinain Pathian salle cu a hmaanmi thil tuah awkah an i zuam zungzal. A hmaanmi lam in Pathian a biami hna thleidan khawh awkah a kan bawmmi kong kha atu zohhmanh u sih.
6, 7. A hmaanmi biaknak cu zeicah Baibal ah hram aa bunh? Jesuh nih zei zohchunh awk ṭha dah a rak chiah?
6 Kan biaknak cu Baibal ah hram aa bunh awk a si. Baibal nih hitin a ti: “Cathiang hi a dihlak in Pathian thawchuah hnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a ṭhahnemmi a si. Cucaah cun Pathian rianṭuantu a simi cu zeizong zeizong ah tlamtlingmi a si awk le thilṭha phunzakip tuah khawh awkah thilthuam tling tein a ngeimi a si awk a si.” (2 Timote 3:16, 17) Lamkaltu Paul nih Khrihfa hna sinah hitin ca a rak ṭial: “Pathian bia nan sin kan phakpi tikah khan minung bia bantukin si loin Pathian bia bantukin nan rak cohlan, Pathian bia cu a si taktak, nan sin kan phakpimi cu.” (1 Thesalon 2:13) A hmaanmi biaknak cu Pathian Bia, Baibal lawnglawng ah hram aa bunh. Minung ruahnak, phunglam asiloah zei bantuk thil cung hmanhah hram aa bunh lo.
7 Jesuh cawnpiaknak vialte cu Baibal ah hram aa bunh. (Johan 17:17 rel.) Jesuh nih atu le atu Baibal kha a cherhchan lengmang. (Matthai 4:4, 7, 10) Pathian salle zong nih Jesuh kha an i zohchunh i an cawnpiaknak vialte cu Baibal ah hram an bunh.
8. Jehovah biaknak kong he aa tlaiin Jesuh nih zeidah a kan cawnpiak?
8 Jehovah lawnglawng kha kan biak awk a si. Salm 83:18 nih hitin a ti: “Nangmah lawnglawng hi BAWIPA [‘Jehovah,’ NW] na si le vawlei dihlak uktu Cungnung Bik na si kha hngal hna seh.” Jesuh nih a hmaanmi Pathian kong kha mi nih hngal hna seh ti a duh. Cucaah Pathian min kha mi sinah a rak chim. (Johan 17:6 rel.) Jesuh nih hitin a ti: “Bawipa [‘Jehovah,’ NW] na Pathian cu va bia law, amah rian lawnglawng va ṭuan.” (Matthai 4:10) Cucaah Pathian salle nih Jesuh kha kan i zohchunh. Jehovah lawnglawng kan biak i a min kha kan hman. Cun Pathian min kong le a kan tuahpiak laimi kong kha midang kan cawnpiak hna.
9, 10. Pakhat le pakhat kan i dawtnak kha zeitindah kan langhter?
9 Mi cungah dawtnak taktak kan ngeih a hau. Jesuh nih a zultu hna kha pakhat le pakhat i dawt awkah a cawnpiak hna. (Johan 13:35 rel.) Kan ram, kan nunphung cu zei a si zongah asiloah kan rum ah siseh, kan si a fah ah siseh, mah cu a biapimi a si lo. Pakhat le pakhat kan i dawtnak nih unau bantukin lungrual tein a kan umter awk a si. (Kolose 3:14) Cucaah raldohnak ah kan i tel lo i mi zong kan that lo. Baibal nih hitin a ti: “Pathian fale hna le Khuachia fale hna an i dannak cu hihi a si: a hmaanmi thil a tuah lomi cu Pathian fa an si lo; cun a unau a daw lomi zong an si ṭhiamṭhiam lo. . . . Pakhat le pakhat kan i daw lai . . . Mi ṭhalopa ta a simi Kain, a nau a thattu bantuk kha kan si awk a si lo.”—1 Johan 3:10-12; 4:20, 21.
10 Kan caan, kan thazaang le kan ngeihchiah hna kha pakhat le pakhat i bawmhnak ca le tha i peknak caah kan hman. (Hebru 10:24, 25) Cuticun “mi cungah ṭhatnak” kan tuah.—Galati 6:10.
11. Jesuh cu Pathian nih kanmah khamh awkah a hmanmi a si tiah zeicah kan cohlan?
11 Jesuh cu Pathian nih kanmah khamh awkah a hmanmi a si caah a nawl kan ngaih a hau. Baibal nih hitin a ti: “Amah thawng lawnglawng in khamhnak hi hmuh khawh a si. Zeicahtiah vawleicung dihlak ah hin kannih khamhnak caah Pathian nih min a pekmi midang ahohmanh an um lo.” (Lamkaltu 4:12) Ṭhen 5nak ah kan cawn cang bantukin nawlngaimi minung hna tlanhnak caah a nunnak pek dingin Jesuh kha Jehovah nih a rak thlah. (Matthai 20:28) Cun vawlei a uk hnga dingmi Siangpahrang zongin Jehovah nih Jesuh kha a thim. Cucaah zungzal nunnak hmuh kan duh ahcun Jesuh bia ngaih awkah Baibal nih a kan cawnpiak.—Johan 3:36 rel.
12. Zeicah ramkhel lei kongkau ah kan i tel lo?
12 Ramkhel lei ah kan i tel awk a si lo. Jesuh cu ramkhel lei kongkau ah aa tel lo. Rom uktu Pilat hmai i bia an ceih lioah Jesuh nih “kei ka pennak cu hi vawlei ta hi a si lo” tiah a rak ti. (Johan 18:36 rel.) Jesuh bantukin kannih zong Pathian Pennak cungah zumhawktlak tein kan um caah khoika ram i a ummi kan si hmanhah ramkhel lei ah kan i tel lo. Asinain Baibal nih “ram uktu bawi [cozah] kha an nawl va ngai hna u” tiah a ti. (Rom 13:1) Cucaah kan umnak ram i upadi kha lungtho tein kan zulh. Asinain mah upadi cu Pathian nawlbia he aa ralkah ahcun “minung nakin Pathian nawl kan ngaih deuh awk a si” tiah a timi lamkaltu hna kha kan i zohchunh hna.—Lamkaltu 5:29; Marka 12:17.
13. Pathian Pennak kong he aa tlaiin zeidah kan chim?
13 Pathian Pennak lawnglawng nih vawleicung i buaibainak hna hi a tawnghtham khawh lai tiah kan zumh. Jesuh nih “vancung Pennak kong thawngṭha” hi vawleicung khuazakip ah chim a si lai tiah a ti. (Matthai 24:14 rel.) Pathian Pennak nih a kan tuahpiak laimi thil hna cu zei bantuk minung cozah hmanh nih an tuah kho lai lo. (Salm 146:3) Jesuh nih Pathian Pennak ca thlacam awkah hitin a kan cawnpiak: “Na Pennak cu rung tlung ko seh, vancung khua ah na duhnak an tuah bangin vawleicung ah hin tuah si ve ko seh.” (Matthai 6:10) Pathian Pennak nih minung cozah vialte a hrawh dih lai i “cu pennak tu cu zungzal in a hmun lai” tiah Baibal nih a ti.—Daniel 2:44.
14. A hmaanmi lam in Pathian an bia tiah na ruahmi hna cu ahote dah an si?
14 Mah kong hna hlathlai hnuah hitin i hal: ‘An cawnpiaknak Baibal ah hram a bunhmi cu ahote dah an si? Mi sinah Pathian min a chimmi cu ahote dah an si? Pakhat le pakhat cungah dawtnak a langhter i Jesuh cu kanmah khamh awkah Pathian thlahmi a si tiah a zummi cu ahote dah an si? Ramkhel lei ah aa tel lomi cu ahote dah an si? Pathian Pennak lawnglawng nih kan tonmi buaibainak hna a tawnghtham khawh tiah a thanhmi cu ahote dah an si? Mah cu Jehovah Tehte Hna lawng an si.—Isaiah 43:10-12.
Zeidah Na Tuah Lai?
15. Kan biaknak kha Pathian nih cohlang seh ti kan duh ahcun zeidah kan tuah awk a si?
15 Pathian a um ti zumhnak lawngin a za lo. Khuachia hmanh nih Pathian a um ti kha an zumh, asinain annih nih Pathian nawl an ngai lo. (Jeim 2:19) Kan biaknak kha Pathian nih cohlang seh ti kan duh ahcun Pathian a um ti zumh lawng si loin a duhnak zong kan tuah a hau.
16. Zeicah a hmaan lomi biaknak in kan chuah a herh?
16 Pathian nih kan biaknak a cohlan nakhnga a hmaan lomi biaknak in kan chuah a hau. Profet Isaiah nih “thiang tein um u law khua kha chuahtak u” tiah a rak ṭial. (Isaiah 52:11; 2 Korin 6:17) Cucaah a hmaan lomi biaknak he aa pehtlaimi paohpaoh kha kan hrial a hau.
17, 18. “A Liannganmi Babilon” timi cu zeidah a si, amah chungin a rannak in chuah cu zeicah a biapit tuk?
17 A hmaan lomi biaknak timi cu zeidah a si? Baibal cawnpiaknak he aa ralkahmi lam in Pathian biak awkah a cawnpiakmi biaknak paohpaoh kha a si. Baibal nih a hmaan lomi biaknak vialte kha “A Liannganmi Babilon” tiah a auh. (Biathlam 17:5) Zeicah? Noah chan i Buanchukcho hnuah a hmaan lomi cawnpiaknak vialte cu Babilon khua in aa thawkmi a si. Mah a hmaan lomi cawnpiaknak hna cu vawleicung pumpi ah a karh. Tahchunhnak ah, Babilon mi nih thumkomh pathian kha an biak. Tuchan zongah biaknak tampi nih Pathian cu Thumkomh pathian a si tiah an cawnpiak hna. Asinain Baibal nih a hmaanmi Pathian Jehovah cu pakhat lawnglawng a si i Jesuh Khrih cu a Fapa a si tiah fiang tein a kan cawnpiak. (Johan 17:3) Babilon mi nih minung hi kan thih hnuah kaakhatkhat ah kan nung rih i hell ah hremnak kan tong kho ti zongin an zumh. Mah cu a hmaan hrimhrim lo.—A Donghnak I Fianternak 14, 17 le 18 ah zoh.
18 Pathian nih a rauhhlan ah a hmaan lomi biaknak vialte ka hrawh lai tiah a rak chimchung. (Biathlam 18:8) Zeicah a hmaan lomi biaknak in chuah cu a biapit tuk ti kha na hngal maw? Jehovah Pathian nih a caan a um liote ah a rannak in chuak seh ti aan duh.—Biathlam 18:4.
Pathian miphun he hmunkhat ah Pathian na biaknak thawngin vawleicung pumpi chungkhar ah na hun i tel kho
19. Jehovah biak dingin biakhiahnak na tuah tikah Jehovah nih zeitindah aan zohkhenh khawh?
19 A hmaan lomi biaknak chuahtak in Jehovah na biak tikah na hawile asiloah na chungkharmi cheukhat nih an in theithiam men lai lo i harnak hmanh an in pek khawh men. Asinain Jehovah nih cun aan hlaw bal lai lo. Pakhat le pakhat cungah dawtnak taktak a langhtermi vawleicung pumpi unaurual lakah na hun i tel lai i Pathian vawlei thar ah zungzal nun ding ruahchannak na ngei lai. (Marka 10:28-30) Jehovah biak awkah biakhiahnak na tuahmi kha aan ralchanhmi na hawile le na chungkharmi hna hmanh a hnuah Baibal hlathlai awkah biakhiahnak an tuah khawh men.
20. A hmaanmi lam in Pathian biak cu zeicah a biapit?
20 A rauhhlan ah Pathian nih ṭhatlonak vialte hi a hrawh dih cang lai i vawlei kha a Pennak in a uk cang lai. (2 Piter 3:9, 13) Mah caan cu zeitluk in dah a nuamh lai. Mikip nih a hmaanmi lam in Jehovah kha an biak lai. Cucaah atu in a hmaanmi lam in Pathian biak cu a biapi tuk.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna nih Midang kha Biaknak i Thlen dingin Nan Hnek Hna Maw?
Biaknak i thlen dingin mi leem ding caah maw Jehovah Tehte Hna nih zapi sinah phung nan chim? Midang kha biaknak i thlen dingin hramhram in nan hnek hna maw?
DOCUMENTARIES
Jehovah Tehte Hna—Zumhnak in Rianṭuannak, Ṭhen 1: Muihnak in Luatnak
Mah video hi zei bantuk ralchanhnak an ton hmanhah Baibal biatak ceunak chungah a nungmi hna i an tuanbia a si. An kong nih zumhawktlak tein Pathian biak zungzal khawh awkah aan bawmh lai.
