1, 2. Mi nih zei bantuk biahalnak hna dah an tuah tawn?

NGAKCHIA cu an biahal a pang. Thil pakhatkhat na chimh hna tikah ‘Zeicah?’ tiah an in hal ko lai. Na leh len hna zongah ‘Zei ruangah?’ tiah an in hal rih men ko lai.

² Mino kan si ah, upa kan si ah, kan dihlak in biahalnak tuah kan hmang. Zeidah kan ei lai, zeidah kan i hruk lai, zeidah kan cawk lai timi kong hna ah biahalnak kan tuah men ko lai. Asiloah kan nunnak kong le hmailei kong he aa tlaimi a biapimi biahalnak hna zong kan tuah men ko lai. Asinain lungtling lak in a phi kan hmuh lo tikah biahalnak tuah ti loin kan um kho men.

3. Mi tampi nih a biapimi biahalnak hna i a phi kha kan hmu kho lai lo tiah zeicah an ruah?

³ Kan halmi a biapimi biahalnak hna i a phi cu Baibal ah a um maw? Mi cheukhat nih Baibal ah a um ti kha an hngalh ko nain Baibal cu hngalhthiam awkah a har tuk tiah an ruah. Cucaah biaknaklei hruaitu le cawnpiaktu hna lawng nih a phi an hngalh khawh lai tiah an ruah. Cun a cheu cu kan hngal lo ti chim awkah an ning a zak. Nangtah zeitindah na ruah?

4, 5. Zei bantuk a biapimi biahalnak hna dah na hal khawh? Zeicah a phi kha na kawl peng awk a si?

⁴ Zei ruangah dah ka nun? Ka thih tikah zei ah dah ka can lai? Pathian nih zeidah a duh? ti bantuk biahalnak hna i a phi kha hngalh na duh ko lai. A min a thangmi Cawnpiaktu Jesuh nih hitin a ti: ‘Hal peng u law pek nan si lai; kawl peng u law nan hmuh lai; king peng u law innka cu hunpiak nan si lai.’ (Matthai 7:7, NW) Zumhawktlakmi a phi na hmuh hlan tiang na lung dong hlah.

 ⁵ Na “kawl peng” ahcun a phi kha Baibal ah na hmuh lai. (Phungthlukbia 2:1-5) Mah a phi cu hngalhthiam awk zongah a har tuk lo. Mah nih atu ah a nuammi nunnak le hmailei ca i a ṭha tukmi ruahchannak aan pek lai. Mi tampi nih hngalh an duhmi biahalnak pakhat kha i ruah u sih.

6. Sifah harnak hi Pathian nih zeicah umnak nawl a awnh? ti kha mi cheukhat nih zeicah hngalh an duh?

⁶ Pathian nih kan zawn a kan ruat lo tiah mi tampi nih an ruah. Pathian nih kan zawn a ruah taktak ahcun vawlei hi atu bantukin a si hnga lo tiah an ruah. Hmunkip ah raltuknak, huatnak le harnak hna kan hmuh. Cun kan zaw kan fak i kan thi. Cucaah mi cheukhat nih ‘sifah harnak hi Pathian nih zeicah umnak nawl a awnh hnga?’ ti kha hngalh an duh.

7. (a) Biaknaklei hruaitu hna nih Pathian cu zaangfahnak a ngei lo tiah mi kha zeitindah an ruahter tawn hna? (b) Kan tonmi harnak ruangah Pathian mawhchiat awk a si lo ti kha zeicah kan zumh khawh?

⁷ Biaknaklei hruaitu hna nih Pathian cu zaangfahnak a ngei lo tiah mi kha a caan ah an ruahter tawn hna. Thil ṭhalo pakhatkhat a can tikah mah hi Pathian duhnak a si, Pathian nih a chuahtermi a si tiah an ti. Cutin an chimnak thawngin Pathian kha an mawhchiat. Asinain Baibal nih ṭhatlonak hi Pathian nih a chuahtermi a si hrimhrim lo tiah a kan cawnpiak. Jeim 1:13 nih hitin a ti: “Cu bantuk hneksaknak kha mi nih an in tikah, ‘Tukforhnak hi Pathian sinin a ra,’ an ti awk a si lo; zeicahtiah Pathian cu ṭhatlonak nih a tukforh kho lo i amah zong nih ahohmanh a tukforh bal hna lo.” Mah cu Pathian nih thil ṭhalo hna hi umnak nawl a awnh ko nain amah nih a chuahtermi a si hrimhrim lo tinak a si. (Job 34:10-12 rel.) Tahchunhnak pakhat hi zohhmanh u sih.

8, 9. Kan tonmi buaibainak ruangah Pathian mawhchiat cu zeicah aa tlak lo? Tahchunhnak pe.

 ⁸ Mino pa pakhat cu a nu le a pa inn ah a um tiah hei ti u sih. A pa nih a dawt tuk i a ṭhami biakhiahnak tuah khawh awkah a cawnpiak. Asinain a pa cawnpiaknak kha a ngai lo, a ralchanh i inn in a chuak. Thil ṭhalo hna kha a tuah caah harnak a tong. Mah tikah a fapa kha inn in chuah lo dingin a thlauh lo caah a pa cu na mawhchiat lai maw? Na mawhchiat lai lo. (Luka 15:11-13) Mah fapa bantukin minung nih Pathian ralchanh awk le thil ṭhalo tuah awk an i thim tikah Pathian nih a thlauh hna lo. Cucaah thil ṭhalo pakhatkhat a chuah tikah Pathian nih a chuahtermi a si lo ti kha kan i cinken awk a si. Cun Pathian mawhchiat awk a sinak a ruang zong a um lo.

⁹ Pathian nih atu tiang sifah harnak umnak nawl a awnh rihmi hi a ruang ṭha a um. Mah kong he aa tlaiin Baibal chimmi kha Ṭhen 11nak ah na hngalh te lai. Asinain Pathian nih a kan dawt ti le kan tonmi buaibainak hna hi Pathian nih a chuahtermi a si lo ti kha kan zumh khawh. A ngai te ti ahcun kan tonmi buaibainak hna a tawngtham khotu cu Pathian lawnglawng hi a si.—Isaiah 33:2.

10. Pathian nih ṭhatlonak vialte a hrawh lai ti kha zeicah kan zumh khawh?

¹⁰ Pathian cu a thiang. (Isaiah 6:3) A tuahmi vialte cu a thianghlim, thurhnawmhnak zeihmanh a um lo i a ṭha. Cucaah Pathian kha kan i bochan khawh. Asinain minung cu cutin kan si lo. A caan ah thil ṭhalo kan tuah. A dingfelmi uktu hna hmanh nih miṭhalo mi hna ruangah a rawkralmi thil remh khawhnak ṭhawnnak an ngei lo. Pathian lawnglawng hi ṭhawnnak tling a ngeimi a si. Minung tonmi harnak vialte kha a hrawh khawh i a hrawh zong a hrawh lai. Ṭhatlonak kha zungzal in a donghter cang lai.—Salm 37:9-11 rel.

11. Na tonmi harnak he aa tlaiin Pathian cu zeitindah a um?

¹¹ Hi vawlei ah a cangmi thil le na tonmi thil hna kha Pathian nih a hmuh tikah zeitindah a um? Pathian nih ‘a hmaanmi thil kha a duh’ tiah Baibal nih a ti. (Salm 37:28) Cucaah Pathian nih a hmaan, hmaanlo kong kha biapi ah a chiah. Mi nih harnak an tonmi kha a duh lo i a huat. Hlanlio vawleicung ah ṭhatlonak in a khahmi kha Pathian nih a hmuh tikah Pathian cu “a ngaih a chia” tiah Baibal nih a ti. (Genesis 6:5, 6) Pathian cu aa thleng bal lo. (Malakhi 3:6) Cucaah Pathian nih “aan zohkhenh hna” tiah Baibal nih a ti.—1 Piter 5:7 rel.

12, 13. (a) Zeicah midang kha kan dawt hna i an zawn kan ruah hna, vawleicung sifah harnak hna he aa tlaiin zeitindah kan intuar? (b) Pathian nih sifah harnak le dinlonak vialte a hloh dih lai tiah zeicah kan zumh khawh?

¹² Pathian nih amah muikeng in a kan ser tiah Baibal nih a ti. (Genesis 1:26) Mah cu Pathian nih a ngeihmi sining hna in a kan serchih tinak a si. Cucaah sualnak a ngei lomi hna nih harnak an tonmi na hmuh tikah na lung a ṭhatlo ahcun Pathian chinchin cu zeitluk in dah a intuar lai ti kha kan hngalh khawh. Zeitin in dah?

¹³ Baibal nih “Pathian cu dawtnak a si” tiah a ti. (1 Johan 4:8) Pathian nih a tuahmi zeizong vialte hi dawtnak forhfialnak thawngin a si. Pathian nih dawtnak a ngeih caah kannih zong dawtnak kan ngei kho ve. Mah hi ruathmanh: Ṭhawnnak hei ngei law vawleicung i sifah harnak le dinlonak vialte hi na hloh lai, a si ko lo maw? Dawtnak na ngeih caah na hloh hrimhrim ko lai. Pathian tah zeitin? Anih cu ṭhawnnak a ngei i a kan dawt caah sifah harnak le dinlonak vialte hi a hloh hrimhrim lai. Hi cauk a thawknak ah langhtermi Pathian biakam hna cu an tling hrimhrim  lai ti kha kan zumh khawh. Asinain mah biakam pawl zumh khawh awkah Pathian kong tam deuh in na hngalh a hau.

14. Pathian min cu ahodah a si, a min kan hman ding a si kha zeitindah kan hngalh?

¹⁴ Mi pakhat he hawikom si na duh tikah hmasa bik ah zeidah na chimh tawn? Na min a si ko lo maw? Pathian tah min a ngei maw? Biaknak tampi nih a min cu Pathian asiloah Bawipa a si tiah an ti, asinain mah cu min a si lo. Mah cu “siangpahrang” asiloah “uktu” ti bantuk upatnak min a si. Pathian nih a min cu Jehovah a si tiah a ti. Salm 83:18 nih hitin a ti: “Nangmah lawnglawng hi BAWIPA [Jehovah, NW] na si le vawlei dihlak uktu Cungnung Bik na si kha hngal hna seh!” Baibal ṭialtu hna nih Pathian min kha voi 7,000 leng an rak hman. Cucaah Jehovah nih a min hngalhter le hmanter aan duh ti a lang. Pathian nih a hawi na si khawh nakhnga a min aan chimh.

15. Jehovah timi cu zei sullam dah a ngeih?

¹⁵ Pathian min Jehovah timi cu sullam a ngei tukmi a si. Pathian nih a biakam vialte le aa tinhnak vialte a tlinter khawh timi sullam a ngei. Pathian cu  zeihmanh nih a dawn kho lo. Mah min cu Jehovah lawnglawng nih a ngeih khawhmi a si. *

16, 17. (a) “Lianngan Bik” (b) ‘Zungzal Siangpahrang’ (c) Sertu timi upatnak min hna nih Pathian kong zeidah an langhter?

¹⁶ Salm 83:18 nih Jehovah kha ‘nangmah lawnglawng Cungnung Bik na si’ tiah a ti. Biathlam 15:3 zong nih hitin a ti: “Bawipa, a Lianngan Bik Pathian, zeitluk in dah na thil  tuahmi hi an lianhngan i khuaruahhar an si. Miphun vialte Siangpahrang [‘zungzal Siangpahrang,’ NW], na lam cu zeitluk in dah a dikmi le a hmaanmi a si!” “Lianngan Bik” timi upatnak min nih zeidah a langhter? Jehovah cu van le vawlei ah a ṭhawng bik, tluktu ngei lo a si kha a langhter. ‘Zungzal Siangpahrang’ timi upatnak min nih a um zungzalmi a si kha a langhter. Salm 90:2 nih “nangmah cu zungzal in, hramthawknak zong um lo donghnak zong um loin Pathian na si” tiah a ti. Mah cu khuaruahhar taktak a si ko lo maw?

¹⁷ Jehovah lawnglawng hi Sertu a si. Biathlam 4:11 nih hitin a ti: “Nangmah cu sunparnak le upatnak le lianhngannak kha hmuh awkah aa tlakmi na si. Zeicahtiah zeizong vialte kha nangmah nih na ser hna i nangmah duhnak bangin annih cu ser an si i nunnak an ngei.” Vancung  ah a ummi vancungmi le arfi rual hna, thingkung hna le rili i a tlongmi nga hna cu an dihlak in Sertu Jehovah nih a sermi hna an si.

18. Mi cheukhat nih Pathian hawi kan si kho lai lo tiah zeicah an ruah? Mah kong he aa tlaiin Baibal nih zeitindah a kan cawnpiak?

¹⁸ Mi cheukhat nih Jehovah i khuaruahhar a simi a sining kong hna an rel tikah an ṭih i ‘Pathian cu a ṭhawng tukmi le a lianngan tukmi a si i a caah cun zeihmanh ka si lai lo’ tiah an ruah. Asinain Pathian nih cuticun ruahter a kan duh maw? A duh hrimhrim lo. Jehovah nih rak ka naih hna seh ti a kan duh. “Pathian cu aho kan sin hmanh hin aa hlat lo” tiah Baibal nih a ti. (Lamkaltu 17:27) Pathian nih rak ka naih u law ‘kaan naih ve hna lai’ tiah bia a kan kamh.—Jeim 4:8.

19. (a) Pathian hawi zeitindah na hung si khawh?(b) Jehovah ngeihmi zei sining kha dah na duh bik?

¹⁹ Pathian cu zeitindah na naih khawh lai? Jesuh nih “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si” tiah a ti. (Johan 17:3) Jehovah le Jesuh kong hngalh awkah kan cawn zungzal a hau. Mah nih zungzal nunnak a kan hmuhter khawh. Tahchunhnak ah, “Pathian cu dawtnak a si” ti kha kan cawn cang. (1 Johan 4:16) Asinain a dang sining tampi zong a ngei rih. Jehovah cu ‘zaangfahnak le velngeihnak in a khatmi, fawi tein a thin hunter khawh lomi, a fekmi dawtnak tampi mi cungah a langhtermi’ a si tiah Baibal nih a ti. (Exodus 34:6) Jehovah cu ‘a ṭha i ngaihthiamnak in a khat.’ (Salm 86:5) A lung a sau i zumhawktlakmi a si. (2 Piter 3:9, Biathlam 15:4) Baibal na rel tikah Jehovah i duh a nung tukmi a sining hna tam deuh in na hngalh lai.

20-22. (a) Pathian cu mit in hmuh khawh a si lo caah amah naih ding kha zeitindah kan ruah khawh? (b) Mi cheukhat nih Baibal na hlathlaimi kha ngolter an in duh ahcun zeidah na tuah awk a si?

 ²⁰ Pathian cu mit in hmuh khawh a si lo caah amah naih ding kha zeitindah na ruah? (Johan 1:18; 4:24; 1 Timote 1:17) Baibal in Jehovah kong na hlathlai tikah a um taktakmi mi pakhat bantukin na hngalh ko lai. (Salm 27:4; Rom 1:20) Jehovah kong tam deuh in na cawn tikah na dawt deuhdeuh lai i nan i naih deuhdeuh ve lai.

²¹ Jehovah cu kan Pa a si kha na hun hngalhthiam lai. (Matthai 6:9) Pathian nih nunnak a kan pek lengah a nuammi nunnak ngeihter zong a kan duh, mah cu dawtnak a ngeimi pa nih a fale caah a duhpiakmi hna a si. (Salm 36:9) Baibal nih Jehovah he hawikom kan si kho tiah a kan cawnpiak. (Jeim 2:23) Van le vawlei Sertu, Jehovah nih a hawikom siter aan duhmi hi ruathmanh!

²² Mi cheukhat nih Baibal na hlathlaimi kha ngolter an in duh men ko lai. Mah cu na biaknak aa thleng lai ti an phan caah a si kho men. Asinain Jehovah he hawikom sinak kha ahohmanh i dawnhter hna hlah. Jehovah cu na Hawikom ṭha bik a si.

23, 24. (a) Zeicah biahalnak kan tuah zungzal awk a si? (b) A hnu ṭhen ah zei kong dah kan i ruah lai?

²³ Baibal na hlathlai tikah na hngalhthiam lomi kong hna a um ko lai. Mah tikah biahalnak tuah awk le bawmhnak hal awkah na ningzak hlah. Jesuh nih ngakchia bantukin toidornak ngeih awk a si tiah a ti. (Matthai 18:2-4) Ngakchia cu an biahal a pang. Pathian nih a phi hmu seh ti aan duh. Cucaah na cawnmi cu biatak a si le si lo hngalh awkah Baibal in ṭha tein hlathlai.—Lamkaltu 17:11 rel.

²⁴ Jehovah kong cawnnak ah a ṭha bikmi lam cu Baibal hlathlainak hi a si. A hnu ṭhen ah Baibal cu a dang cauk hna he aa lawh lonak a ruang kha kan hmuh lai.