1, 2. Jehovah hawikom cheukhat cu ahote dah an si?

ZEI bantuk minung dah hawikom ah ser na duh? Na duhmi phun an um ko lai. Nan hmuhning, nan duhmi le nan sunsakmi aa lomi pakhatkhat he hawikom si kha na duh ko lai. Na duhmi sining le ziaza a ngeimi he i komh kha na duh ko lai.

² Jehovah nih minung cheukhat kha a hawikom si awkah a thim hna. Tahchunhnak ah, Abraham cu Jehovah hawikom pakhat a si. (Isaiah 41:8; Jeim 2:23) David cu Jehovah duhdawt phun a si caah Jehovah nih “ka duhmi phun” a si tiah a ti. (Lamkaltu 13:22) Mah lengah profet Daniel cu Jehovah caah ‘duh a nung tuk.’—Daniel 9:23, NW.

3. Abraham, David le Daniel cu zeicah Jehovah hawi an si?

³ Abraham, David le Daniel cu zeitindah Jehovah hawi an hung si? Jehovah nih Abraham kha “ka nawl na ngaih caah a si” tiah a ti. (Genesis 22:18) Jehovah cu toidor tein a nawl a ngaimi hna i an hawikom a hung si. Miphun pakhat hmanh a hawikom an hung si kho. Jehovah nih Israel mi kha hitin a ti hna: “Ka bia nan ngaih ahcun nan Pathian ka si lai i ka mi nan si lai.” (Jeremiah 7:23) Cucaah Jehovah hawikom si na duh taktak ahcun a nawl na ngaih a hau.

4, 5. Jehovah nih a hawile kha zeitindah a huhphenh hna?

⁴ Jehovah nih “amahlei i an lung soisel awk a um lomi  hna cungah a ṭhawnnak” langhter awkah caanṭha a kawl tiah Baibal nih a ti. (2 Chanrelnak 16:9) Jehovah nih Salm 32:8 ah a hawile kha hitin bia a kamh hna: “Na zulh awk hnga lam kha kaan hmuhsak lai, kaan cawnpiak lai i lungthin kaan cheuh lai.”

⁵ Satan nih Jehovah he hawikom kan sinak in ngolter a kan duh. Asinain Jehovah nih huhphenh a kan duh. (Salm 55:22 rel.) Jehovah hawikom a simi nih kan lungthin dihlak in Jehovah kan biak. A harmi thil sining hmanhah a cungah zumhawktlak tein kan um. Kannih zong Salm caṭialtu pa bantuk zumhnak kan ngei ve. Jehovah kong he aa tlaiin hitin a ṭial: “Amah cu keimah he naihte ah a um i zeihmanh nih an ka hnin kho lo.” (Salm 16:8; 63:8) Jehovah hawikom kan si ti nakhnga lo Satan nih zeitindah aa zuam?

6. Satan nih minung kha zeitindah sual a puh hna?

⁶ Satan nih Jehovah kha a zuamcawh i lihchim a puh. Adam le Evi kha anmah tein a hmaan, hmaan lo kongah biakhiahnak nawl a pek hna lo caah Pathian cu a ding lo ti phun in a chim. Mah kong kha Ṭhen 11nak ah kan rak cawn cang. Satan nih Pathian hawi si a duhmi minung zong sual a puh hna ti kha Job Baibal cauk nih a langhter. Mi nih Pathian an biakmi cu an dawt ruangah si loin Pathian sinin an hmuhmi thil ruangah a si tiah Satan nih a ti. Cun mikip kha Pathian doh awkah ka tuah khawh hna ti hmanhin a ti. Job sinin zeidah kan cawn khawh i Jehovah nih zeitindah a huhphenh ti kha zohhmanh u sih.

7, 8. (a) Job he aa tlaiin Jehovah nih zeitindah a hmuh? (b) Satan nih Job lungput he aa tlaiin zeitindah a rak chim?

⁷ Job cu ahodah a si? Job cu a luancia kum 3,600  hrawngah a rak nungmi miṭha a si. Jehovah nih mah lio caan ah vawleicung ah amah bantuk minung an um lo tiah a rak ti. Job nih Pathian kha a ṭih i thilṭhalo kha a huat. (Job 1:8) Job cu Jehovah hawikom taktak a rak si.

⁸ Job nih mahca ṭhatnak ruangah Pathian a biakmi a si tiah Satan nih a ti. Satan nih Jehovah kha hitin a ti: “Amah [Job] le a inn le a ngeihmi vialte cu hau in na kulh hna lo maw? Nangmah nih a kut rianṭuannak cu thluachuah na pek i ram chungah hin a ngeihmi thil cu an karh. Sihmanhsehlaw atu cu na kut hei chuah law a ngeihmi thil vialte khi tawng tuah ngat, na hmai hrimhrim ah aan volhpamh ko lai.”—Job 1:10, 11.

9. Jehovah nih Satan kha zei tuahnak nawl dah a pek?

⁹ Jehovah nih thiṭha a pek caah pei Job nih a biakmi a si ko cu tiah Satan nih a ti. Mah lengah Job nih Jehovah a biak ti nakhnga lo ka tuah khawh ti zongin a ti. Satan ruahnak le Jehovah ruahnak cu aa lo, lo nain Job nih Pathian a daw taktak maw, daw taktak lo ti hneksaknak nawl kha Jehovah nih Satan a pek.

10. Satan nih Job kha zeitindah a hneksak, Job nih zeitindah a lehrulh?

¹⁰ Satan nih Job ngeihmi saṭil vialte kha a fir asiloah a hrawh dih. Cun a salle tam deuh kha a thahpiak hna. Job cu zeizong vialte a sung dih. Mah lengah thlichia ruangah a fale pahra cu an thi. Asinain Job cu Jehovah cungah zumhawktlak tein a um. “Hi vialte ah hin Job nih sualnak a tuah lo i Pathian cu a mawhchiat lo.”—Job 1:12-19, 22.

11. (a) Satan nih Job cungah zeidah a tuah rih? (b) Job nih zeitindah a lehrulh?

¹¹ Satan cu a lung a dong lo. Hitin a chimnak thawngin Pathian kha a zuamcawh: “A ruh le a sa kha tawng tuah hna ngat, na hmai hrimhrim ah aan volhpamh  ko lai.” Cucaah Satan nih Job kha a fakmi hma a inter. (Job 2:5, 7) Asinain Job cu Jehovah cungah zumhawktlak tein a um ṭhiamṭhiam ko. Hitin a ti: ‘Ka thih tiang ka zumhfehnak cu ka hlaw lai lo.’—Job 27:5, NW.

12. Satan mi lihchim a si kha Job nih zeitindah a langhter?

¹² Job nih Satan zuamcawhnak asiloah harnak a innak a ruang he aa tlaiin zeihmanh a hngal lo. A tonmi harnak hna cu Pathian ruangah a si tiah a ruah. (Job 6:4; 16:11-14) Cutin a ruah ko bu hmanhin Jehovah cungah zumhfek tein a um zungzal. Atu cu lunghrin awk a um ti lo. Job cu mahca ṭhatnak a kawlmi a si lo. Pathian a dawt caah Pathian hawi a si. Satan zuamcawhnak hna cu lihbia lawng te an si.

13. Job a zumhfeknak i a phichuak cu zeidah a si?

¹³ Job nih vancung ah a cangmi kong kha a hngal lo nain Pathian cungah zumhawktlak tein a um i Satan miṭhalo a si kha a langhter. Cucaah Jehovah nih Job kha a zumhfehnak ruangah thluachuah a pek.—Job 42:12-17.

14, 15. Mi vialte kha Satan nih zeitindah a kan zuamcawh?

¹⁴ Job kong in a biapimi thil na cawn khawh. Tuchan zongah Jehovah kan biakmi cu mahca ṭhatnak hmuh an duh ruangah a si tiah Satan nih a ti. Job 2:4 ah Satan nih hitin a chim: “Mi nih cun a ngeihmi vialte cu a nunnak caah cun a sian ko lai.” Cucaah Satan nih Job lawng si loin mi vialte kha mahca ṭhatnak a kawlmi in sual a kan puh. Job a thih hnu, kum tampi hnuah Satan nih Jehovah kha a zuamcawh peng rih i a salle zong sual a puh peng rih hna. Tahchunhnak ah, Phungthlukbia 27:11 ah hitin kan hmuh: “Ka fapa, fim law ka lung ka lawmhter tuah, cuticun a ka soitu [asiloah thangchiattu] kha ka leh khawh hna lai.”

 ¹⁵ Jehovah nawlngaih awk le a hawikom si awkah naa thim khawh i Satan mi lihchim a si kha na langhter khawh. Pathian hawikom si awkah na nunnak ah thlennak nganpi tuah a hauh hmanhah mah cu na tuah khawhmi lakah a ṭha bikmi biakhiahnak a si. Mah biakhiahnak cu a biapi tuk. Buaibainak na ngeih tikah Jehovah cungah zumhawktlak tein na um lai lo tiah Satan nih a ti. Pathian cungah zumhawktlak tein kan um nakhnga lo a kan hlen. Zeitin in dah?

16. (a) Jehovah sinin pialter awkah Satan nih zei lam hna dah a hman? (b) Jehovah na biak ti nakhnga lo Khuachia nih zeitindah aa zuam?

¹⁶ Satan nih minung kha Pathian sinin pialter awkah lam tampi a hman. Anih cu “seh awk kawl ah chiandeih bangin a vak cuahmah ko.” (1 Piter 5:8) Baibal na hlathlai i na hngalhmi ningin nun naa zuammi kha hawikom, rualchan asiloah midang nih an in ralchanh tikah na khuaruahhar hlah. * (Johan 15:19, 20) Mah lengah Satan nih “ceunak vancungmi bantuk aa siter khawh.” Cucaah Jehovah nawl kan ngaih nakhnga lo hlen aa zuam. (2 Korin 11:14) Pathian sinin kan pial nakhnga Satan nih a hmanmi a dang lamkhat cu Pathian biak awkah kaa tlak lo timi ruahnak kha a si.—Phungthlukbia 24:10.

17. Zeicah Jehovah nawl kan ngaih?

¹⁷ Jehovah nawl kan ngaih tikah Satan mi lihchim a si kha kan langhter. Nawlngaih awkah zeinihdah a kan bawmh lai? Baibal nih hitin a ti: “BAWIPA na Pathian cu na lung vialte le na ruahnak vialte le na ṭhawnnak vialte  in na dawt lai.” (Deuteronomi 6:5) Jehovah kan dawt caah a nawl kan ngaih. Jehovah kan dawtnak a ṭhan deuhdeuh tikah a duhnak tuah kha kan duh deuhdeuh ve lai. Lamkaltu Johan nih hitin a ṭial: “Pathian kan dawt ti cu a nawl kan zul tinak a si ko. Cun a nawlbia cu kan caah a har tuk lo.”—1 Johan 5:3.

18, 19. (a) Jehovah nih a palh tiah a timi thil cheukhat cu zei hna dah an si? (b) Kan tuah khawh lomi thil Jehovah nih a kan hal lo ti kha zeitindah kan hngalh?

¹⁸ Jehovah nih a palh tiah a kan chimhmi thil cheukhat cu zei hna dah an si? Mah he aa tlaiin “ Jehovah Nih A Huatmi Kha Hua” timi rinli kulh ah zoh. Mah lak i thil cheukhat cu a ṭhalomi an lo theng men lai lo. Asinain Baibal caang hna na rel tik le ṭha tein na ruah tikah Jehovah nawlbia zulh cu fim a si ti kha na hngalhthiam lai. Na nunnak ah thlennak cheukhat tuah a hau tiah na ruah men lai. Cutin tuah cu a caan ah a har men ko lai  nain Pathian hawi sinak nih daihnak le nuamhnak aan hmuhter lai. (Isaiah 48:17, 18) Mah thlennak hna cu kan tuah khawh ko ti kha zeitindah kan hngalh khawh?

¹⁹ Jehovah nih kan tuah khawhmi lengin a kan hal bal lo. (Deuteronomi 30:11-14) Kan hawikom taktak a simi Jehovah nih kanmah le kanmah kan i hngalhmi nakin ṭha deuh in a kan hngalh. Kan thazaang le kan derthawmnak hna kha a hngalh. (Salm 103:14) Lamkaltu Paul nih hitin tha a kan pek: “Pathian nih a biakamnak cu a zulh ko lai i nan in khawh leng tiangin tukforhnak cu nan cungah a tlunter lai lo. Tukforhnak nan in tikah in khawhnak thazaang aan pek hna lai i chuah khawhnak lam zong aan serpiak hna lai.” (1 Korin 10:13) A hmaanmi thil kan tuah khawh nakhnga a herhmi thazaang Jehovah nih a kan pek lai ti kha kan zumh khawh. A harmi thil sining hna inkhawh awkah Jehovah nih ‘thil ti khawhnak ṭhawnnak’ a kan pek lai. (2 Korin 4:7, NW)  Paul nih hneksaknak tampi a in hnuah hitin a rak chim khawh: “Khrih nih ṭhawnnak a ka pekmi thawngin zeithil hmanh hung chuak hna sehlaw ka ton khawh ko hna.”—Filipi 4:13.

20. Pathian duhmi zei ziaza hna dah kan ngeih awk a si, zeicah?

²⁰ Jehovah hawi si kan duh ahcun Jehovah a huatmi thil huatnak lawngin a za lo. A duhmi thil zong kan duh ve a hau. (Rom 12:9) Mah kong kha Salm 15:1-5 nih a langhter. (Rel.) Jehovah hawile nih Jehovah a sining hna kha an i zohchunh i “dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, toidornak le mahle mah i tei khawhnak” hna an langhter.—Galati 5:22, 23.

21. Pathian duhmi ziaza pawl langhter awkah zeitindah na cawn khawh?

²¹ Mah sining hna langhter awkah zeitindah na cawn khawh? Baibal hmaan tein relnak le hlathlainak thawngin Jehovah duhmi thil hna hngalh awkah na cawn a hau. (Isaiah 30:20, 21) Cutin na tuah tikah Jehovah na dawtnak cu a ṭhang deuhdeuh lai i a nawl ngaih kha na duh deuhdeuh lai.

22. Jehovah bia na ngaih ahcun zei ṭhatnak dah na hmuh lai?

²² Na nunnak ah tuah a herhmi thlennak kha thilhlun i phoih i thilthar i hruk he tahchunh khawh a si. Baibal nih ‘mihlun i phoih in mithar i hruk’ awkah a kan forh. (Kolose 3:9, 10) Jehovah nawlngaih in thlennak tuah cu a fawi lai lo nain Jehovah nih “laksawng” kaan pek hna lai tiah bia a kan kamh. (Salm 19:11) Cucaah Jehovah nawlngaih awkah i thim law Satan mi lihchim a si kha langhter. Hmailei hmuh laimi laksawng ruangah si loin mahzawn ruat lo dawtnak ruangah Jehovah kha bia. Mah tikah Pathian hawikom taktak na hung si lai.