1, 2. Thlacamnak kha a sunglawi tukmi laksawng in zeicah na hmuh awk a si, thlacamnak he aa tlaiin Baibal cawnpiakmi cu zeicah hngalh a herh?

A NGAN tukmi vankawlawng [universe] he tahchunh ahcun hi vawlei cu a hme tuk hringhran. Jehovah nih vawlei a zoh tikah miphun zakip chung i mi vialte cu balṭin chung i tidor pakhat tluk men an si. (Salm 115:15; Isaiah 40:15) Van le vawlei he tahchunh tikah kannih cu zeihmanh kan si lo nain Salm 145:18, 19 nih hitin a ti: “A autu vialte hna cu an pawng khin a um hnawh hna, lungtak in a autu vialte hna cu. Amah a ṭihmi paoh cu an herhmi vialte kha a pek hna i an aunak kha a theih i a khamh hna.” Mah cu zeitluk tinvo sung dah a si. Cungnung Bik Sertu Jehovah nih kanmah he naih tein um a duh i kan thlacamnak kha ngaihpiak a kan duh. Thlacamnak cu tinvo sung a si i Jehovah nih kan dihlak in a kan pekmi a sunglawi tukmi laksawng a si.

² Asinain Jehovah nih a duhmi lam in thla kan cam lawngah a kan ngaihpiak lai. Cutin zeitindah kan cam khawh? Thlacamnak he aa tlaiin Baibal cawnpiakmi kha zoh u sih.

3. Jehovah sinah zeicah thla na cam awk a si?

³ Jehovah nih a sinah thla cam seh asiloah bia chim seh ti aan duh. Mah cu zeitindah kan hngalh khawh? Zaangfahnak in Filipi 4:6, 7 kha rel. Mah sawmnak kong hi ruathmanh. Van le vawlei Uktu nih nangmah kong kha hngalh a duh i na intuarnak le na tonmi buaibainak hna kha ka chim seh ti aan duh.

4. Jehovah sinah hmaan tein thlacamnak nih amah he nan i pehtlaihnak kha zeitindah a fehter khawh?

 ⁴ Thlacamnak nih Jehovah he pehtlaihnak ṭha ngeih awkah a kan bawmh. Hawikom a simi hna nih pakhat le pakhat an ruahnak, an lungre theihnak le an intuarnak hna an i chimh lengmang tikah an i hawikomhnak cu a fek chinchin. Jehovah sin thla kan cam tikah cutin a si ve. Baibal hmangin Jehovah nih a ruahnak le a intuarnak hna a kan chimh i hmailei ah a tuah laimi kong zong a kan chimh. Nang zong Jehovah kha hmaan tein bia na ruahnak thawngin na intuarnak taktak kha na chimh khawh. Cutin na tuah tikah Jehovah he nan i pehtlaihnak cu a fek chinchin lai.—Jeim 4:8.

5. Jehovah nih thlacamnak vialte a ngai lo ti kha zeitindah kan hngalh?

⁵ Jehovah nih thlacamnak vialte hi a ngai dih maw? A ngai dih lo. Profet Isaiah chan ah Jehovah nih Israel mi kha  hitin a ti hna: “Zeizat tam hmanhin cam u law kaan ngaihpiak hna lai lo, zeicahtiah nan kut ah thisen aa neh.” (Isaiah 1:15) Kan i ralrin lo ahcun Jehovah sinin a kan hlatter khomi thil hna kan tuah khawh, mah tikah Jehovah nih kan thlacamnak kha a kan ngaihpiak duh lai lo.

6. Zeicah zumhnak cu a biapit tuk? Zumhnak na ngeih kha zeitindah na langhter khawh?

⁶ Jehovah nih kan thlacamnak kan ngaihpiak seh ti kan duh ahcun zumhnak kan ngeih a hau. (Marka 11:24) Lamkaltu Paul nih hitin a ṭial: “Ahohmanh nih zumhnak loin Pathian lungton khawh a si lo; zeicahtiah Pathian a fuhmi paohpaoh nih cun Pathian cu a um i amah a kawlmi cu laksawng a pek hna ti kha an zumh awk a herh.” (Hebru 11:6) Asinain zumhnak kan ngei ti chimnak lawngin a za lo. Nifate kan nunnak ah Jehovah nawl kan ngaihnak thawngin zumhnak kan ngeih kha kan langhter awk a si.—Jeim 2:26 rel.

7. (a) Jehovah sin thla kan cam tikah zeicah toidornak le upatnak kan langhter awk a si? (b) Lungtak tein thla kan cam kha zeitindah kan langhter khawh?

⁷ Jehovah sin thla kan cam tikah toidornak le upatnak in kan cam awk a si. Zeicah? Siangpahrang asiloah uktu sin bia kan chim ahcun upatnak tein kan chawnhbiak ko lai. Jehovah cu Cungnung Bik Pathian a si caah a sin i bia kan chim tikah upatnak le toidornak kan langhter chinchin awk a si lo maw? (Genesis 17:1; Salm 138:6) Mah lengah biafang pakhat kha nolh lengmang loin lungtak tein Jehovah sinah thla kan cam awk a si.—Matthai 6:7, 8.

8. Thil pakhatkhat he aa tlaiin thla kan cam tikah zeidah kan tuah a herh rih?

⁸ Thil pakhatkhat he aa tlaiin thla kan cam tikah kan thlacam ningin a si khawh chung kan tuah awk a si. Tahchunhnak ah, nifa kan herhmi caah Jehovah sin thla kan cam tikah kan tha a thut awk a si lo i a herhmi zeithil paoh  Jehovah nih a kan pek lai kha kan i ruahchan khawh. Cucaah kan ṭuan khawhmi zei rian paoh kha cohlang in fakpi in kan ṭuan awk a si. (Matthai 6:11; 2 Thesalon 3:10) Asiloah a ṭhalomi thil pakhatkhat tei khawh awkah thla kan cam ahcun lemsoinak a chuahter khomi thil sining paohpaoh kha kan hrial awk a si. (Kolose 3:5) Thlacamnak he aa tlaimi biahalnak cheukhat kha atu i ruah u sih.

9. Aho sinah dah thla kan cam awk a si? Johan 14:6 nih thlacamnak kong he aa tlaiin zeidah a kan cawnpiak?

⁹ Aho sinah dah thla kan cam awk a si? Jesuh nih a zultu hna kha “vancung khua i a um kan Pa” sin thlacam awkah a rak cawnpiak hna. (Matthai 6:9) Hiti zongin a ti: “Lam le biatak le nunnak cu keimah hi ka si; keimah sinin ti dah lo cun ahohmanh Pa sin an phan kho lo.” (Johan 14:6) Cucaah Jesuh min in Jehovah sin lawngah thla kan cam awk a si. Jesuh min in thlacam timi cu zei sullam dah a si? Jehovah nih kan thlacamnak a cohlan nakhnga Jehovah nih Jesuh a pekmi dirhmun kan upat kha langhter a hau. Kan cawn cang bantukin sualnak le thihnak in kanmah khamh awkah Jesuh cu vawlei ah a ra. (Johan 3:16; Rom 5:12) Mah lengah Jehovah nih Jesuh kha Tlangbawi Ngan le Biaceihtu zongin rian a pek.—Johan 5:22; Hebru 6:20.

10. Thlacam tikah zeiti theng in um ding ti a herh maw? Fianter.

¹⁰ Thlacam tikah zeiti theng in um ding ti a herh maw? A herh lo, thla kan cam tikah khukbil ding, ṭhut ding asiloah dir ding ti bantukin Jehovah nih a kan hal lo. Asinain upatnak tein Jehovah sin thlacam awkah Baibal nih a kan cawnpiak. (1 Chanrelnak 17:16; Nehemiah 8:6; Daniel 6:10; Marka 11:25) Jehovah caah a biapi bikmi cu thla kan cam tik i kan umtuning hi si loin kan lungthin tu hi a si. Khoika hmun i kan um ah siseh, zeitik caan paohah siseh awchuah in asiloah dai tein thla kan cam kho. Jehovah  sin thla kan cammi kha ahohmanh nih an theih lo hmanhah Jehovah nih a kan theihpiak ti kha kan zumh khawh.—Nehemiah 2:1-6.

11. Zei ca hna ah dah Jehovah sinah thla kan cam khawh?

¹¹ Zei ca hna ah dah thlacam khawh a si? Baibal nih hitin a ti: “Amah duh ningin kan hal ahcun, kan halmi paoh kha [Jehovah nih] a kan pek hrimhrim lai.” (1 Johan 5:14) Cucaah Pathian cohlanmi zeithil paoh kan hal khawh. Pumpak kong he aa tlaiin tah thlacam khawh a si maw? A si. Jehovah sin thlacam cu aa kom tukmi hawikom he bia i ruah bantuk a si. Kan lungthin chungah a ummi vialte kha Jehovah sinah kan chim khawh. (Salm 62:8) A hmaanmi thil tuah khawh awkah thiang thlarau kan pe tiah kan hal khawh. (Luka 11:13) Cun a ṭhami biakhiahnak tuah khawh awkah fimnak le a harmi thil sining hna tei khawh awkah thazaang kan pe tiah Jehovah sinah kan hal khawh. (Jeim 1:5) Kan sualnak ngaihthiam awk zongah kan hal awk a si. (Efesa 1:3, 7) Kan chungkhar mi le unau pawl telin midang ca zongah thla kan cam awk a si.—Lamkaltu 12:5; Kolose 4:12.

12. Kan thlacamnak ah a biapi bikmi cu zeidah a si awk a si?

¹² Kan thlacamnak ah a biapi bikmi cu zeidah a si awk a si? Jehovah le a duhnak kha a biapi bik ah kan chiah awk a si. A kan tuahpiakmi thil vialte caah lungtak in kan lawmh awk a si. (1 Chanrelnak 29:10-13) Jesuh nih vawleicung a um lioah a zultu pawl kha zeitindah thlacam ding timi a rak cawnpiak hna. (Matthai 6:9-13 rel.) A hmasa bik ah Pathian min thiang upat a si nakhnga, phundang cun thianter a si nakhnga thlacam awkah a cawnpiak hna. Cun Pathian Pennak a rat nakhnga le vawleicung ah Jehovah duhnak tuah a si nakhnga thlacam awk zongah a cawnpiak hna. Mah a biapi tukmi ca hna i kan cam dih hnu lawngah kanmah pumpak herhmi caah kan cam awk a si tiah Jesuh nih a ti. Kan  thlacamnak ah Jehovah le a duhnak hmasa bik kan chiahnak thawngin kan caah zeidah a biapi bik ti kha kan langhter.

13. Zeitluk sau in dah thla kan cam awk a si?

¹³ Zeitluk sau in dah thla kan cam awk a si? Mah kong kha Baibal nih a chim lo. Kan thlacamnak cu thil sining cungah i hngat in a tawi kho asiloah a sau kho. Tahchunhnak ah, rawl ei lai ahcun tawi tein thla kan cam men ko lai,  asinain Jehovah sin lawmhnak bia kan chim tik asiloah kan lungretheihnak kong hna kan phuan tik ahcun saupi in thla kan cam men ko lai. (1 Samuel 1:12, 15) Jesuh chan i mi cheukhat bantukin midang lungthin lak duh men ah saupi in thlacam kha kan duh lai lo. (Luka 20:46, 47) Cu bantuk thlacamnak kha Jehovah nih a cohlang lo. Jehovah caah a biapimi cu lungthin tak tein thla kan cammi kha a si.

14. Voi zeizat dah thla kan cam awk a si, mah nih Jehovah kong he aa tlaiin zeidah a kan cawnpiak?

¹⁴ Voi zeizat dah thla kan cam awk a si? Jehovah nih a sinah hmaan tein thlacam awkah a kan sawm. Baibal nih “thlacam zungzal u,” “a zungzal in thlacam u” tiah a kan forh. (Rom 12:12; 1 Thesalon 5:17) Jehovah cu kan thlacamnak ngaih awkah a zungzal in timhcia a si. Dawtnak le siannak a langhtermi ruangah nifate a sinah lawmhnak bia kan chim khawh. Mah lengah lamhruainak, hnemhnak le thazaang  a kan pek nakhnga zong kan hal khawh. Jehovah sin thlacamnak tinvo kha kan sunsak ahcun caanṭha kan hmuh tik paohah thla kan cam lai.

15. Thlacam donghnak ah zeicah “Amen” tiah kan ti awk a si?

¹⁵ Thlacam donghnak ah zeicah “Amen” tiah kan ti awk a si? “Amen” timi biafang sullam cu “si hram ko seh” asiloah “cuticun si ko seh” tinak a si. “Amen” tiah kan timi nih kan thlacamnak hi lungthin tak in cammi a si hrimhrim ti kha a langhter. (Salm 41:13) Zapi ca mi pakhat nih thla a cam tikah a thlacamnak kan hna a tla ti langhternak caah a donghnak ah awchuah in siseh, awchuah loin siseh, “Amen” kan ti awk a si tiah Baibal nih a kan cawnpiak.—1 Chanrelnak 16:36; 1 Korin 14:16.

16. Kan thlacamnak hi Jehovah nih a kan let taktak maw? Fianter.

¹⁶ Kan thlacamnak hi Jehovah nih a kan let taktak maw? A kan leh taktak ko. Baibal nih Pathian kha “kan thlacamnak a kan lettu” tiah a ti. (Salm 65:1) Lungtak tein thla a cammi mi nuai tampi i an thlacamnak kha Jehovah nih a ngaih i lam a phunphun in a leh hna.

17. Kan thlacamnak leh awkah Jehovah nih vancungmi le vawleicung i a salle kha zeitindah a hman hna?

¹⁷ Jehovah nih kan thlacamnak leh awkah vancungmi le vawleicung i a salle kha a hman hna. (Hebru 1:13, 14) Baibal hngalhthiam awkah Pathian sin thla a cammi hna cu an thlacam a dih tlawmpal ah Jehovah Tehte Hna nih an rak len hna timi hmuhtonnak tampi a um. Vawleicung pumpi i “thawngṭha” chimnak ah vancungmi an i tel ve ti kha Baibal nih a langhter. (Biathlam 14:6 rel.) Cun kan tonmi buaibainak asiloah kan herhmi bawmhnak kong he aa tlaiin Jehovah sin thla kan cam tikah Khrihfa unau pawl sinin bawmhnak kan hmu tawn.—Phungthlukbia 12:25; Jeim 2:16.

18. Jehovah nih kan thlacamnak leh awkah thiang thlarau le Baibal kha zeitindah a hman?

 ¹⁸ Jehovah nih kan thlacamnak leh awkah a thiang thlarau zong a hman. Kan tonmi buaibainak tawnghtham khawh dingin thla kan cam tikah Jehovah nih thiang thlarau hmangin lamhruainak le thazaang a kan pek men lai. (2 Korin 4:7) Cun Jehovah nih kan thlacamnak leh awk le a ṭhami biakhiahnak tuah khawh awkah Baibal zong a hman. Baibal kan rel tikah kan caah bawmtu a simi Baibal caang hna kan hmuh khawh. Khrihfabu pumhnak ah Khrihfa upa pakhat phungchimnak in asiloah pakhatkhat nih a phi an peknak in kan herhmi a konglam hna hngalh awkah Jehovah nih a kan bawmh khawh.—Galati 6:1.

19. Jehovah nih kan thlacamnak a kan let lo tiah zeicah kan ruah khawh?

¹⁹ A caan ah ‘Jehovah nih zeicah atu tiang ka thlacamnak a ka leh hnga lo?’ tiah na ruat men ko lai. Asinain Jehovah nih zeitik ah le zeitin ka leh ah dah a ṭhat bik lai ti a hngalh kha i cinken. Kan herhmi kha a hngalh. Jehovah sin kan halmi cu kan duh taktakmi a si ti le a cungah zumhnak kan ngei taktak ti langhter awkah caan caankhat chung thla kan cam a hau men lai. (Luka 11:5-10) A caan ah Jehovah nih kan i ruahchan lomi lam in kan thlacamnak kha a kan leh. Tahchunhnak ah, harnak pakhatkhat he aa tlaiin thla kan cam tikah kan harnak lakpiak si loin inkhawhnak tu ngeih awkah thazaang a kan pek men lai.—Filipi 4:13 rel.

20. Jehovah sinah zeicah thla kan cam zungzal awk a si?

²⁰ Jehovah sin thlacamnak tinvo kan ngeihmi cu zeitluk in dah a sunglawimi a si. Jehovah nih kan thlacamnak a kan ngaihpiak lai ti kha kan zumh khawh. (Salm 145:18) Jehovah sinah lungtak tein thla kan cam deuhdeuh tikah kan i pehtlaihnak cu a fek deuhdeuh ve lai.