1-3. Kan zapi in zei sal dah kan si, Jehovah nih zeitindah a kan luatter lai?

NA TUAH lomi sualnak pakhat ruangah na nunchung thongthlak na si tiah ruathmanh. Mah in luat khawhnak lam zeihmanh a um lo. Cucaah ruahchannak na ngei lo i na tuah khawhmi zong a um lo. Asinain mah lioah mi pakhat cu nangmah luatter awkah ṭhawnnak a ngei i kaan bawmh lai tiah bia aan kamh. Mah tikah zeitindah na um lai?

² Kan dihlak in thihnak sal kan si dih. Zei kan tuah hmanhah luatnak lam a um lo. Asinain Jehovah cu thihnak in luatter awkah ṭhawnnak a ngei. Cucaah kan ral a simi thihnak kha zungzal ca in ka hrawh lai tiah Jehovah nih bia a kan kamh. Baibal nih “tei hmanung bik ding ral cu thihnak a si” tiah a ti.—1 Korin 15:26.

³ Thihnak he aa tlaiin na lungre a theih ti lo tikah zeitluk in dah na hna a ngam lai khi ruathmanh. Asinain Jehovah nih thihnak lawng kha a hlo lai lo. Mithi pawl kha a nunter ṭhan hna lai. Mah cu na caah zeitluk in dah sullam a ngeih lai khi ruathmanh. Jehovah nih ‘a thi ciami cu ka nunter ṭhan hna lai’ tiah bia a kan kamh. (Isaiah 26:19) Mah kha Baibal nih thawhṭhannak tiah a auh.

4. (a) Kan chungkharmi asiloah kan hawikom pakhatkhat an thih tikah zeinihdah hnemhnak a kan pek khawh? (b) Ahote dah Jesuh hawikom ṭha an si?

⁴ Kan innchungkharmi asiloah kan hawikom pakhat  a thih tikah kan ngaihchiatnak le kan lungfahnak cu in awkah a har tuk ko lai. Ruahchannak a ngei lomi kan lo men lai. A thimi nunter ṭhan awkah kan tuah khawhmi zeihmanh a um lo. Asinain Baibal nih hnemhnak taktak a kan pek. (2 Korin 1:3, 4 rel.) Jehovah le Jesuh nih kan dawtmi hna nunter ṭhan kha zeitluk in dah an duh ti a langhtermi tahchunhnak pakhat kha zohhmanh u sih. Jesuh cu vawleicung a um lioah Lazaruh le a farle Martha le Mary sinah a va leng tawn. Annih cu Jesuh i a hawikom ṭha an si. “Jesuh nih Martha le a naunu le Lazaruh kha a dawt hna” tiah Baibal nih a ti.—Johan 11:3-5.

5, 6. (a) Lazaruh a chungkhar le a hawile pawl an ngaihchiatmi a hmuh tikah Jesuh cu zeitindah a um? (b) Thihnak he aa tlaiin Jesuh a intuarnak hngalh cu zeicah thazaang petu a si?

⁵ Nikhat cu Lazaruh a thi. Cucaah Jesuh cu Martha le Mary hnemh awkah a va kal. Jesuh a ra ti thawng kha Martha nih a theih tikah khualeng tiang a va don. Jesuh kha a hmuh tikah hitin a ti: “Bawipa hika ah hin rak um law cu, ka ṭa hi a thi hnga lo.” Martha nih Jesuh cu a phanh a tlai tuk tiah a ruah. Jesuh nih Mary a ṭahmi kha a hmuh. An ngaihchiatmi kha a hmuh tikah Jesuh cu a lung a hno i a ṭap ve. (Johan 11:21, 33, 35) Kan dawtmi pakhatkhat an thih tikah kan intuarmi lungfahnak kha Jesuh nih a intuar ve.

⁶ Jesuh a ngaih a chiatmi cu kan caah thazaang petu taktak a si. Zeicahtiah Jesuh le a Pa Jehovah nih thihnak an huat ti kha mah nih a kan hngalhter. (Johan 14:9) Jehovah  nih thihnak kha zungzal ca in hrawh khawhnak ṭhawnnak a ngei i a rauhhlan ah a hrawh cang lai.

7, 8. Lazaruh thlanlung kharnak kha Martha nih zeicah ṭhialter a duh hna lo, asinain Jesuh nih zeidah a tuah?

⁷ Lazaruh an vuinak hmun an phanh tikah lung nganpi in thlanlung an kharmi kha Jesuh nih a hmuh. Mah tikah Jesuh nih “lungpher hi ṭhial tuah u” tiah a ti hna. Asinain Martha nih cutin tuahter a duh hna lo. Zeicahtiah Lazaruh a ruak an vuinak cu nili a si cang. (Johan 11:39) A ṭapa caah Jesuh nih a tuah laimi thil kha Martha nih a hngal lo.

⁸ Jesuh nih “Lazaruh, ra chuak tuah” tiah a ti. Mah tikah a cangmi thil kha Martha le Mary nih an hmuh tikah an khuaruah a har tuk. “Mithi pa cu a kut le a ke ruakpuan zual bu le a hmai khuh puan he khan a hung chuak.” (Johan 11:43, 44) Lazaruh cu a tho ṭhan. A chungkhar le a hawile he an tlonglengṭi ṭhan. Annih nih Lazaruh kha an kuh khawh, an tawngh khawh i bia an ruah khawh. Mah cu khuaruahhar taktak a si. Jesuh nih Lazaruh kha a thawhter ṭhan.

9, 10. (a) Jesuh kha ahonih dah mithi thawhter khawhnak ṭhawnnak a pek? (b) Zeicah thawhṭhannak kong cu kan caah man a ngeih?

⁹ Jesuh nih amah ṭhawnnak in mi kha a thawhtermi hna a si maw? A si lo. Lazaruh a thawhter ṭhan hlanah Jesuh cu Jehovah sinah thla a cam i Jehovah nih thawhter khawhnak ṭhawnnak a pek. (Johan 11:41, 42 rel.) Lazaruh lawnglawng hi thihnak in a tho ṭhanmi a si lo. Baibal nih a zawtnak a zual tukmi, kum 12 a simi ngakchia nute kong a chim. A pa Jairu cu a ngaih a chia tuk i a fanu damter awkah Jesuh kha a nawl. Anih cu a fa ngeihchunhte  a si. Jesuh a nawl cuahmah lioah pa cheukhat an ra i “na fanu cu a thi cang, sayapa cu hnahnawh ti hlah” tiah an ti. Asinain Jesuh nih Jairu kha hitin a ti: “Na thingphang hlah, a zumh bel zum ko.” Mah hnuah Jairu te inn leiah an kal. An inn pawng an phanh tikah mi pawl an ṭahmi kha Jesuh nih a hmuh. Mah tikah Jesuh nih “ṭap hlah u, ngakchia hi a thi lo, aa hngilh i pei a si ko cu” tiah a ti hna. Ngakchianu a nu le a pa nih zeidah a chimduhmi a si hnga tiah an ruah men ko lai. Jesuh nih midang kha leng ah a chuahter hna i ngakchianu a nu le a pa kha ruaksuannak khaan ah a kalpi hna. Jesuh nih ngakchia nute kha a kut in a tlaih i “ngakchia nute, tho, kaan ti” tiah a ti. Ngakchia nute cu a tho i lam a hun kal tikah a nu le a pa zeitluk in dah an i lawmh lai khi ruathmanh. Jesuh nih an fanute cu a thawhter ṭhan. (Marka 5:22-24, 35-42; Luka 8:49-56) Mah ni thawkin an fanute an hmuh tik paohah Jehovah nih Jesuh hmangin an caah a tuahmi thil kha an i cinken peng ko lai. *

¹⁰ Jesuh nih a thawhter ṭhanmi hna cu a hnuah an thi ṭhan. Asinain an kong kan relmi nih ruahchannak a kan ngeihter caah man a ngei tuk. Jehovah nih mithi kha thawhter a duh hna i a thawh zong a thawhter ṭhan hna lai.

11. Phungchimtu 9:5 nih Lazaruh kong he aa tlaiin zeidah a kan cawnpiak?

¹¹ Mithi nih cun “zeihmanh an hngal lo” tiah Baibal  nih a ti. Mah biatak cu Lazaruh kong nih fiang tein a langhter. (Phungchimtu 9:5) Jesuh nih a chim bantukin Lazaruh cu aa hngilhmi bantuk a si. (Johan 11:11) Thlan chung i a um lioah Lazaruh nih ‘zeihmanh a hngal lo.’

12. Lazaruh cu a tho ṭhan taktak ti kha zeitindah kan hngalh khawh?

¹² Jesuh nih Lazaruh a thawhtermi kha mi tampi nih an hmuh. A ral pawl hmanh nih mah khuaruahhar thil a tuahmi kha an hmuh. Lazaruh cu a nung ṭhan, mah nih thawhṭhannak a um taktak ti kha a langhter. (Johan 11:47) Mi tampi nih Lazaruh kha an va zoh i Jesuh cu Jehovah thlahmi a si ti kha an hun zumh. Asinain Jesuh a ral pawl nih cun cutin an zum lo, cucaah Jesuh le Lazaruh kha thah hmanh an timh hna.—Johan 11:53; 12:9-11.

13. Jehovah nih mithi pawl a nunter ṭhan hna lai tiah zeicah kan zumh khawh?

¹³ Jesuh nih “thlan chung i a ummi mithi vialte” an tho ṭhan lai tiah a ti. (Johan 5:28) Cucaah Jehovah nih aa cinkenmi mithi vialte cu an tho ṭhan lai. Jehovah nih a tho ṭhan hngami pakhat cio i an kong a dikthliar kha aa cinken. Mah cu a si kho taktak hnga maw? Van ah arfi nuai tampi a um. Asinain arfi pakhat cio i an min kha Jehovah nih a hngalh tiah Baibal nih a ti. (Isaiah 40:26 rel.) Arfi pakhat cio i an min hmanh aa cinken khawh ahcun a thawhter ṭhan hngami hna i an kong a dikthliar kha fawi tein aa cinken khawh lai ti cu a fiang. Jehovah cu zeizong vialte sertu a si caah mithi pawl nunter ṭhan khawhnak ṭhawnnak a ngei ti kha kan hngalh.

14, 15. Thawhṭhannak he aa tlaiin Job bia nih zeidah a kan cawnpiak?

¹⁴ Zumhfekmi Job zong nih thawhṭhannak kha a zumh. Hitin biahalnak a tuah: “Mi cu a thih ahcun a nung ṭhan kho lai maw?” Mah hnuah Jehovah kha hitin  a ti: “Na ka auh lai i kaan leh lai, na kut tuahmi thil cu hmuh na ka duh lai.” Jehovah nih mithi a thawhter ṭhan hna lai caan aa ngaih tuk ti kha Job nih a hngalh.—Job 14:13-15.

¹⁵ Thawhṭhannak ruahchannak nih zeitindah aan umter? ‘A thi cangmi ka chungkharmi le ka hawikom hna tah an tho ṭhan ve hnga maw?’ tiah na ruat ko lai. Jehovah nih mithi thawhter a duh tuk ti hngalh cu kan caah hnemtu taktak a si. A tho ṭhanmi hna cu khoika ah dah an um lai, ahote dah a thoṭhan lai timi Baibal chimmi kha zohhmanh u sih.

16. Vawleicung ah a tho ṭhanmi hna nih zei bantuk nunnak dah an hmuh lai?

¹⁶ Hlanlio i a rak tho ṭhanmi hna cu hi vawleicung ah an chungkhar le an hawikom pawl he an tlong lengṭi ṭhan. Hmailei zongah cutin a si ve lai, asinain mah nakin a ṭha deuh lai. Zeicah? Vawleicung ah a tho ṭhanmi hna cu zeitikhmanh ah an thi ṭhan ti lai lo i zungzal nunnak an hmu lai. Atu bantukin vawleicung hmun dangdang cio ah an um lai. Mah tikah raltuknak, sualnak le zawtnak hna an um ti lai lo.

17. Ahote dah a tho ṭhan lai?

¹⁷ Ahote dah a tho ṭhan lai? Jesuh nih “mithi vialte nih a aw an theih lai caan kha a ra lio, cun an thlan khan an chuak lai” tiah a ti. (Johan 5:28, 29) Cun Biathlam 20:13 nih hitin a ti: “Rili nih a chung i a thimi kha a hun chuah hna. Thihnak le mithi khua zong nih khan an hrenmi mithi kha an hun chuah ve hna.” Cucaah a thimi nuai tampi cu an tho ṭhan lai. Lamkaltu Paul  zong nih “miṭha he miṭhalo” he an tho ṭhan lai tiah a ti. (Lamkaltu 24:15 rel.) Mah cu zei sullam dah a si?

18. A tho ṭhan hnga dingmi “miṭha” timi cu ahote dah an si?

¹⁸ “Miṭha” timi ah Jesuh vawleicung a rat hlan i zumhfekmi Jehovah salle an i tel. Noah, Abraham, Sarah, Moses, Ruth le Esther ti bantuk zumhfekmi hna zong  hi vawleicung ah an tho ṭhan lai. Hebru dal 11 ah mah zumhfekmi nu le pa cheukhat kong na rel khawh. Tuchan ah a thimi, zumhfekmi Jehovah salle tah zeitin? Annih zong “miṭha” an si caah an tho ṭhan ve lai.

19. “Miṭhalo” timi cu ahote dah an si? Jehovah nih zei caanṭha dah a pek hna lai?

¹⁹ “Miṭhalo” timi ah Jehovah kong cawnnak caanṭha a hmu lomi mi nuai tampi an i tel. Annih cu an thi cang ko nain Jehovah nih a philh hna lo. Jehovah nih a thawhter ṭhan hna lai i amah kong cawn awk le biak awkah caanṭha an hmu lai.

20. Mithi vialte cu zeicah thawhter an si lai lo?

²⁰ Mah cu a thimi vialte an tho ṭhan dih lai tinak a si maw? A si lo. Jesuh nih mi cheukhat cu an nung ṭhan lai lo tiah a ti. (Luka 12:5) Mi pakhat cu a tho ṭhan lai maw, tho ṭhan lai lo ti kha ahonih dah bia a khiah lai? Jehovah cu Biaceihtu ngan bik a si ko nain Jesuh kha “a nungmi he, a thimi he an biaceihtu ah a ser”. (Lamkaltu 10:42) Thlennak tuah a duh lo i miṭhalo in biaceih a simi hna cu an tho ṭhan lai lo.—A Donghnak I Fianternak 19 ah zoh.

21, 22. (a) Vancung thawhṭhannak timi nih zeidah a chimduhmi a si? (b) Thlarau pum in a tho hmasa bikmi cu ahodah a si?

²¹ Baibal nih mi cheukhat cu vancung nunnak an hmu lai tiah a ti. Vancung thawhṭhannak ah aa telmi hna cu minung pum in an tho ṭhan lai lo. Thlarau pum in vancung ah an tho ṭhan lai.

²² Cu bantuk thawhṭhannak phun in a tho hmasa bikmi cu Jesuh a si. (Johan 3:13) Jesuh cu thah a si in a nithumnak ni ah Jehovah nih a thawhter ṭhan. (Salm 16:10; Lamkaltu 13:34, 35) Jesuh cu minung pum in thawhter ṭhan a si lo. Lamkaltu Piter nih Khrih cu “pum  cun thihnak a huat, sihmanhsehlaw thlarau cun a nung” tiah a rak fianter. (1 Piter 3:18) Jesuh cu a ṭhawngmi thlarau pakhat in a tho ṭhan cang. (1 Korin 15:3-6) Asinain Baibal nih mah thawhṭhannak cu hmanung bik a si lo tiah a ti.

23, 24. Jesuh nih a chimmi “tuurun hmete” cu ahote dah an si, pa zeizat dah aa i tel lai?

²³ Jesuh nih a thih hlante ah a zultu pawl kha “nan caah hmun va timh awkah ka rak kal lai” tiah a ti hna. (Johan 14:2) Mah cu Jesuh zultu cheukhat zong vancung thawhṭhannak ah an i tel ve lai tinak a si. Pa zeizat dah an i tel lai? Annih cu mi tlawmte an si lai caah Jesuh nih “tuurun hmete” tiah a auh hna. (Luka 12:32) Lamkaltu Johan nih “Zion Tlang [vancung] i Tuufa a dir ko kha ka hmuh; a sinah cun 144,000 an um” tiah a ti.—Biathlam 14:1.

²⁴ 144,000 i aa telmi Khrihfa hna cu zeitik ah dah an thawh ṭhan lai? Vancung ah Khirh uknak aa thawk hnuah a si lai tiah Baibal nih a ti. (1 Korin 15:23) Kannih cu mah caan chungah kan nung i 144,000 ah aa telmi tam deuh cu van ah an kai cang. Vawlei ah a taang rihmi hna le tuchan ah a thimi hna cu an thihle cangka vancung nunnak in an tho ṭhan colh lai. Asinain mi tam deuh cu vawleicung Paradis i nun awkah hmailei ah an tho ṭhan te lai.

25. A hnu ṭhen ah zei kong dah kan i ruah lai?

²⁵ A rauhhlan ah Jehovah nih mi vialte kha thihnak in a luatter hna lai i thihnak a um ti lai lo. (Isaiah 25:8 rel.) Van a kaimi hna cu zeidah an tuah lai? Annih cu Pennak cozah pakhat ah Jesuh he uktu an ṭuanṭi lai tiah Baibal nih a ti. Mah cozah kong kha a hnu ṭhen ah tam deuh in kan cawn lai.