1. Hmailei kong kha khoika in dah kan hngalh khawh?

TV IN thawngpang na zoh tikah ‘thil sining hi a chia chin lengmang hnga maw?’ tiah na ruat bal maw? Ngaihchiatnak le ṭhatlonak a tam tuk caah mi cheukhat nih vawlei donghnak a nai cang tiah an zumh. Mah cu a hmaan maw? Hmailei ah a cang hngami thil hngalh khawhnak lam a um maw? A um ko. Minung nih cun hmailei kong kha kan chimchung kho lo nain Jehovah Pathian nih cun a chimchung khawh. Minung le vawlei kong he aa tlaiin hmailei ah a cang hngami kha Baibal ah a chimchung.—Isaiah 46:10; Jeim 4:14.

2, 3. Jesuh zultu hna nih zeidah hngalh an duh, Jesuh nih zeitindah a leh hna?

² Baibal ah vawlei donghnak kong kan rel tikah mah cu hi vawlei taktak hi si loin ṭhatlonak a donghnak tu kha a chimduhmi a si. Jesuh nih mi kha vawlei pumpi a uk hngami Pathian Pennak kong a cawnpiak hna. (Luka 4:43) Zeitik ah dah Pathian Pennak a rat lai ti kha a zultu hna nih hngalh an duh caah Jesuh kha “hihi zeitik ah dah a si lai? Cun na ratnak ding hmelchunhnak le atu chan donghnak ding hmelchunhnak ah zeithil dah a um hna lai” tiah an rak hal. (Matthai 24:3) A nithla cu Jesuh nih a chim hna lo nain hi vawlei donghnak a rat hlante ah zeithil hna dah a cang lai ti kha a chimh hna. Jesuh chimchungmi bia hna cu atu ah an tling.

³ Hi ṭhen ah kan i ruah hngami kong nih vawlei donghnak caan ah kan nung ti kha a langhter. Pakhatnak ah, hi  vawlei thil sining a chiat tuknak a ruang kan hngalhthiam nakhnga vancung ah a cangmi raldohnak kong hngalh a hau.

4, 5. (a) Jesuh Siangpahrang a si hnu tlawmpal ah vancung ah zeithil dah a cang? (b) Biathlam 12:12 ah kan hmuh bantukin Satan vancung in thlak a si tikah vawleicung ah zeithil dah a cang?

⁴ Jesuh cu 1914 in vancung ah Siangpahrang a si cang ti kha Ṭhen 8nak ah kan cawn cang. (Daniel 7:13, 14) Biathlam cauk nih a cangmi kong kha hitin a chim: “Van ah khin raldohnak a um. Mikhael [Jesuh] le a vancungmi hna nih khan limkeng [Satan] cu an doh i limkeng nih cun a vancungmi hna he a rak doh ve hna.” * Satan le a khuachia hna cu an sung i van in vawlei ah thlak an si. Mah tikah vancungmi pawl zeitluk in dah an i nuamh tuk lai khi na mitthlam ah cuanter hmanh. Asinain vawlei mi hna tah zeitin? Minung caah cun ṭihnung a si tiah Baibal nih a ti. Zeicahtiah Khuachia nih “caan tawite lawnglawng ka ngei ti kha a hngalh” caah a thin a hung tuk.—Biathlam 12:7, 9, 12.

⁵ Khuachia nih vawleicung ah thil ṭihnung tampi a chuahter. Pathian nih a rauhhlan ah a ka hrawh cang lai ti a hngalh caah a thin a hung tuk. Ni hmanung bik caan chungah a cang hngami Jesuh chimmi bia kha zohhmanh u sih.—A Donghnak I Fianternak 24 ah zoh.

6, 7. Tuchan ah a cangmi raldohnak le mangṭam he aa tlaiin zeidah kan chim khawh?

⁶ Raldohnak. Jesuh nih “ramkhat le ramkhat an i do lai, pengkhat le pengkhat an i tu lai” tiah a ti. (Matthai  24:7) Tuchan i raltuknak ruangah a thimi cu a luancia caan chungah raltuknak ruangah a thimi nakin a let tampi in an tam deuh. Vawlei thil sining kong a hlathlaimi bu nih 1914 thawkin raltuknak ruangah a thimi hi minung nuai 100 leng an si tiah an ti. 1900 in 2000 kar, kum 100 chungah raltuknak ruangah a thimi cu 1900 hlan i ral ruangah a thimi nakin a letthum in an tam deuh. Raltuknak ruangah mi nuai tampi nih an tonmi ngaihchiatnak le lungfahnak hna kha ruathmanh.

⁷ Mangṭam. Jesuh nih “mangṭam . . . a tlung lai” tiah a ti. (Matthai 24:7) A hlan nakin atu ah rawl tam deuh chuah a si ko nain mi tampi cu ei awk a za in an ngei lo. Zeicah? Rawl cawknak tangka asiloah cinthlaknak hmun an ngeih lo caah a si. Mi tampi cu khuasaknak caah nikhat ah dollar pakhat hmanh an ngei lo. Vawlei Ngandamnak Bu nih kum fatin ngakchia a nuai in an thih lengmangmi hi vitamin an chambau ruangah a si tiah an ti.

8, 9. Lihnin le zawtnak he aa tlaiin Jesuh chimchungbia a tlin kha zeinihdah a langhter?

⁸ Lihnin. Jesuh nih “lihnin . . .  a tlung lai” tiah a ti. (Luka 21:11) Kum fatin a tha a ṭhawngmi lihnin voi tampi aa hnin. 1900 thawkin lihnin ruangah mi nuaihnih leng an thi cang. Fimthiamnak a ṭhanchomi nih lihnin he aa tlaiin a hlankan in ralrin pek khawh awkah a bawmh ko nain mi tampi cu an thi ṭhiamṭhiam.

⁹ Zawtnak. Jesuh nih “zawtnak a tlung lai” tiah a chimchung. Ṭih a nungmi zawtnak hna cu khulrang in an karh lai i mi tampi kha a thah hna lai. (Luka 21:11) Siibawi pawl nih zawtnak tampi thlopning kha an hngalh ko nain damh khawh lomi zawtnak tampi a um rih. TB, raifanh le hngal-eu zawtnak ti bantuk zawtnak ruangah mi nuai tampi kum fatin an thi tiah report pakhat nih a chim. Siibawi pawl nih zawtnak thar phun 30 an hmuh chap i cheukhat cu damh khawh an si lo.

10. 2 Timote 3:1-5 i chimchungbia cu zeitindah tuchan ah a tlin?

¹⁰ 2 Timote 3:1-5 nih hitin a ti: “Ni hmanung bik kha an phak tikah harnak caan a si lai ti kha philh hlah.” Lamkaltu Paul nih ni  hmanung bik caan chungah mi tampi nih an ngeih hngami ziaza kha a langhter. Paul nih mi cu hi bantukin an si lai tiah a ti

• mahzawn lawng aa ruatmi

• a hak a kaumi

• nulepa nawl a ngai lomi

• zumhawktlak lomi

• chungkhar a daw lomi

• duhpaoh in khua a sami

• ṭih a nungmi

• Pathian nakin nuamhnak a duh deuhmi

• Pathian a daw bantukin an i umter i a nawl a ngai duh lomi

11. Salm 92:7 ningin miṭhalo nih zeidah an ton cang lai?

¹¹ Na pawngkam i mi tampi cu, cu bantuk ziaza a ngeimi an si maw? Vawleicung pumpi i mi tampi cu mah ziaza hna a ngeimi an si. Asinain Pathian nih a rauhhlan ah thil pakhat a tuah cang lai. Hitin bia a kan kamh: ‘Miṭhalo kha belh bantukin an ṭhang i thil ṭhalo a tuahmi hna kha thluachuah an hmu; sihmanhsehlaw rawhralnak an hmu ko lai.’—Salm 92:7.

12, 13. Donghnak caan chungah Jehovah nih zeidah a kan cawnpiak?

¹² Ni hmanung bik caan ah sifah harnak in a khat lai tiah Baibal nih a chimchung. Asinain thilṭha a um lai ti zongin Baibal nih a chim.

¹³ Baibal hngalhthiamnak. Profet Daniel nih donghnak caan he aa tlaimi kong a rak ṭial. ‘A hmaanmi hngalhnak a karh lai’ tiah a rak ṭial. (Daniel 12:4) Pathian nih a miphun kha Baibal fiang deuh in hngalhthiam chin awkah a bawmh hna. A hleiin 1914 thawkin Jehovah nih cutin a tuah. Tahchunhnak ah, a min a biapitnak, vawlei ca i aa tinhnak, Jesuh Khrih tlanhnak man, kan thih tikah zei ah dah kan can ti le thawhṭhannak kong hna kha a kan cawnpiak. Kan tonmi buaibainak vialte hi Pathian Pennak lawng nih a tawnghtham khawh ti kha kan hngalh. A nuammi nunnak zeitindah hmuh khawh a si ti le Pathian lung a tongmi lam in zeitindah nun khawh a si ti zong kan hngalh. Asinain Pathian salle nih an hngalhmi in zeidah an tuah? Mah kha a dang chimchungbia pakhat nih a phi a pek.—A Donghnak I Fianternak 21 le 25 ah zoh.

14. Pennak kong thawngṭha chimnak cu zeitluk in dah a kauh, ahote nih dah phung an chim?

¹⁴ Vawleicung pumpi phungchim rian. Donghnak caan he aa tlaiin Jesuh nih hitin a chim: “Miphun vialte hna ca i tehte si awkah vancung Pennak kong Thawngṭha hi khuazakip ah chim a si lai.” (Matthai 24:3, 14) Pennak kong thawngṭha cu ram 230 leng ah holh phun 700 lengin chim a si cang. Vawleicung pumpi i “phun kip, ram kip” in a rami Jehovah Tehte Hna nih Pennak timi cu zeidah a si i mah nih minung caah zeidah a tuah lai  ti hngalhthiam awkah mi an bawmh hna. (Biathlam 7:9) Baibal cawnpiakmi taktak kong hngalh a duhmi hna kha man loin Baibal an cawnpiak hna. Huatnak le hremnak hna an tong ko nain Jesuh nih a rak chimchung bantukin phungchim rian kha zeihmanh nih a ngolter kho hna lo.—Luka 21:17.

15. (a) Ni hmanung bik caan ah kan nung ti kha na zum maw, zei ruangah? (b) Jehovah nawl a ngaimi le a ngai lomi hna nih zeidah an ton lai?

¹⁵ Ni hmanung bik caan ah kan nung ti kha na zum maw? Donghnak caan he aa tlaimi Baibal chimchungbia tampi cu a tling cang. A rauhhlan ah Jehovah nih thawngṭha chimnak rian kha ngol awkah bia a khiah cang lai i “donghnak” a ra cang lai. (Matthai 24:14) Donghnak timi cu zeidah a si? Pathian nih ṭhatlonak vialte a hrawh lai caan, Armageddon kha a si. Jehovah nih Amah le a Fapa a ralchanhmi vialte hrawh awkah Jesuh le a ṭhawngmi vancungmi hna kha a hman hna lai. (2 Thesalon 1:6-9) Satan le a khuachia pawl nih mi kha an hleng kho ti hna lai lo. Pathian nawl a ngai i a Pennak a cohlangmi hna nih Pathian biakam a tlinmi kha an hmuh lai.—Biathlam 20:1-3; 21:3-5.

16. Donghnak a naih tuk cang caah zeidah na tuah a herh?

¹⁶ Satan ukmi hi vawlei cu a rauhhlan ah a dong cang lai. Cucaah ‘Zeidah ka tuah awk a si?’ tiah kanmahle kanmah i hal cu a biapi tuk. Baibal kha na si khawh chungin cawn awkah Jehovah nih aan duhpiak. Cucaah teima tein hlathlainak tuah. (Johan 17:3) Mi nih Baibal an hngalhthiam nakhnga bawmh awkah Jehovah Tehte Hna cu zarh fatin pumhnak an ngei. Mah pumhnak hna ah  hmaan tein i pumh awkah i zuam. (Hebru 10:24, 25 rel.) Thlennak tuah na herh kha na hngalh ahcun cutin tuah awkah ṭihnak ngei hlah. Thlennak na tuah ahcun Jehovah he nan i pehtlaihnak a fek chinchin lai.—Jeim 4:8.

17. Donghnak a rat tikah mi tampi cu zeicah an khuaruah a har lai?

¹⁷ Miṭhalo pawl hrawhnak cu “zan ah mifir an rat” bantukin mi tampi an i rin lo lio caan ah a ra lai tiah lamkaltu Paul nih a ti. (1 Thesalon 5:2) Donghnak caan ah kan nung ti a langhtermi thil sining hna kha mi tampi nih zei ah an rel lai lo tiah Jesuh nih a rak chimchung. Hitin a ti: “Mi Fapa [asiloah donghnak] a rat cu Noah chan i thil umtuning bantuk kha a si lai. Tilian a tlun hlanah khan cun Noah lawng chung i a luh ni tiang khan an ei an ding, an i ṭhi an i um i tilian a hung tlun taktak i a fenh dih hna hlan tiang kha cu zeihmanh an hngal lo. Mi Fapa a rat tikah cun cu bantuk cun a si lai.”—Matthai 24:37-39.

18. Jesuh nih zeidah ralrin a kan pek?

¹⁸ Jesuh nih hitin ralrin a kan pek: “Zudin, sa-einak le khuasak tintuk harnak lawng kha ruat hlah u, cuti nan si ahcun cu Ni nih cun ruahlopi ah aan tlun hnawh sual hna lai. Zeicahtiah cu Ni nih cun vawleicung i a ummi vialte hi rap bantukin a foih hna lai. Hi a tlung hnga dingmi thil vialte hi him tein chuak lakin nan tan khawh nakhnga, thazaang nan ngeih nakhnga le Mi Fapa hmaiah nan dir khawh nakhnga ralring tein um u law [lungtak tein] thla va cam zungzal ko u.” (Luka 21:34-36) Jesuh ralrin peknak bia ngaih cu zeicah a biapit? A rauhhlan ah Satan vawlei hrawh a si cang lai caah a si. Jehovah le Jesuh mithmai ṭha a hmumi lawng donghnak in an luat lai i vawlei thar ah zungzal in an nung lai.—Johan 3:16; 2 Piter 3:13.