LAWNG a lenglei ah cun mi hna cu hlan lio bantuk in an rak um ko. Cutiang zong ah cun buanchukcho cu a tlung lai tiah an rak zum rih ṭhiamṭhiam lo. Cu hlan nak hmanh in an rak nihsawh deuh ko hna lai. Asinain tlawmpal hnu ah cun an rak ni kho ti lo.

Ruah lo pi in chikkhat te ah ti le ruah cu sur hram aa rak i thok. Baltin chung in ti nan thlet lio bantuk in khin van in a tlet in a rak tle ko. Noah a rak chim mi cu a hmaan taktak ko! Sihmanhsehlaw atu cu aho hmanh lawng chung ah an rak lut kho ti lo. A caan a rak luan cang ai! Innka cu Jehovah nih fek tein a khar cang.

Tlawmpal ah cun a niam deuh mi vawlei vialte kha ti nih a rak khuh dih hna. Ti cu tiva nganpipi bantuk ah an hung i cang. Thing kung hna zong kha a thluk dih i lung nganpipi zong kha a hrilh a fenh dih i a thawng zong a rak thang ngaingai. Mi hna cu an rak ṭih tuk cang. A san deuh nak hmun kip ah khan an rak kai. Noah a bia kha rak ngai in an ca i innka hun a rak si lio ah khan “Lawng chung ah rak lut u sih law a ṭha tuk hnga nain” tiah an rak i ngaichih ko lai! Sihmanhsehlaw atu cu a luan tuk cang.

Ti cu a rak sang chin lengmang ko. Ni sawmli le zan sawmli chung ngol hrimhrim lo in van in ruah cu a rak sur. Tlang nganpipi hna sin ah khan ti cu a ṭhang chin lengmang i, tlawmpal ah cun tlang sang bik hna hmanh kha a rak khuh dih hna. Cucaah Pathian nih a rak chim bang in lawng leng i a um mi minung le saram vialte cu an rak thi dih. Asinain lawng chung i a um mi vialte cu an him dih.

Noah le a fapale hna nih lawng an rak ser cu a ṭha mi rian a si. Ti nih a cung ah a cawi i, ti cung ah cun a rak vuan lengmang ko. Cun nikhat cu ruah a sur ti lo hnu ah, ni cu tlan hram aa thok. Zoh hmanh u! Khoika paoh ah rilipi pakhat a rak si ko. Hmuh khawh mi thil pakhat lawnglawng a rak um mi cu a cung i aa rak i vuan lengmang mi lawng cu a si ko.

Mikei hna cu an lo dih cang. Minung kha harnak pek awk ah an pawngkam ah an um kho ti lo. An zapi in, an nule le mi ṭha lo a dang vialte he an thi dih cang. Asinain an pale cu tah zeitindah an rak si?

Mikei hna an pale cu kanmah bantuk minung taktak an rak si lo. Vawlei cung ah minung bantuk in nun ve awk ah a rung ṭum mi vancungmi an si. Cucaah buanchukcho a tlun tik ah, a dang minung he an rak thi ve lo. An rak i ser mi minung pum hman kha an ngol i, vancung ah vancungmi bantuk in an kai ṭhan. Sihmanhsehlaw Pathian vancungmi hna innchungkhar ah tel ve nak nawl pek an si ti lo. Cucaah Seitan a vancungmi ah an i cang. Baibal chung ah annih cu khuachia tiah auh an si.

Pathian nih thli a rak hran ter i buanchukcho ti cu ṭum hram aa thok. Thla nga hnu ah lawng cu tlang pakhat cung ah aa din. Ni tampi a rak luan than. Lawng chung i a um mi hna cu lenglei an zoh tik ah tlangpar hna kha an hmuh hna. Ti cu a ṭum chin lengmang.

Cu hnu ah Noah nih a nak mi vate pakhat langak an ti mi kha lawng leng ah a thlah. Tlawmpal a va zuang i a rak kir ṭhan, zeicahtiah futnak ding hmun kha a va hmu lo. A va zuang ṭhan tawn i a rak kir ṭhan lengmang tawn i, lawng cung ah khan aa fu ṭhan tawn.

Cu hnu ah Noah nih vawlei in ti cu a kao cang hnga maw ti hngalh a rak duh i cucaah thuro pakhat kha lawng leng ah a rak thlah ṭhan. Sihmanhsehlaw thuro zong cu umnak ding vawlei a hmuh lo caah, a hung kir ṭhan ve. Noah nih a voihnihnak a thlah tik ah cun a hmur in thinghnah pakhat a rak put. Cutik ah Noah nih ti cu vawlei in a kao cang ti kha a hngalh. Noah nih cu thuro cu a voithumnak a thlah ṭhan i a donghnak ahcun umnak ding a ro mi hmun kha a va hmuh i a va um colh.

Atu cu Pathian nih Noah sin ah bia a rak chim. ‘Lawng in chuak cang. Na innchungkhar le saram vialte zong kha chuahpi dih hna’ a rak ti. Lawng chung ah cun kumkhat reng lo an rak um. Cucaah lawng leng ah an chuak ṭhan i an nun cu zeitluk in dah an i lawmh lai ti cu kan ruah piak khawh ko hna!