TUANBIA 2
Aa Dawh Ngaimi Dum
HI hmanthlak i vawlei hi zoh tuah hmanh! Zeizong vialte cu zeitluk in dah an i dawh! Ram le thingkung hna, pangpar le saram vialte hi zoh tuah hna. Vui le chindeih cu na hmu kho hna maw?
Hi tluk aa dawh mi dum cu zeitindah a rak chuah hnga ti na hngal maw? Kan caah Pathian nih vawlei kha zeitindah a rak remh zoh hmanh u sih.
Hmasa bik ah vawlei kha ram hring in a khah ter. Cun a kung hme tete hna le burbuk le thingkung a rak ser hna. Hi a ṭhang lengmang mi thil hna nih hin vawlei cu an rak dawh ter. Cu lawng cu a si lo. An lak i thingkung tampi nih cun a thaw ngai mi ei awk rawl an kan pek.
Cu hnu ah Pathian nih nga kha a rak ser hna i ti chung ah a chiah hna i, van ah zuang ding in vate zong kha a rak ser hna. Uico le chizawh le rang hna zong a rak ser hna. Saram nganpipi le saram hmetete zong a rak ser hna. Nan inn pawng ah zei saram dah an um? Hi vialte hi Pathian nih a kan ser piak caah kan lung aa lawm hnga lo maw?
Hmanung bik ah, vawlei hmun cheukhat kha phun dang ngai in a rak ser. Cu hmun cu Eden dum tiah a rak auh. Cucu baunak um lo in a rak tling. A chung um mi vialte cu aa rak i dawh dih. Cun Pathian nih vawlei vialte cu hi a rak tuah cia mi aa dawh ngai mi dum bantuk ah cang dih seh ti a rak duh.
Asinain hi dum hmanthlak hi zoh ṭhan tuah hmanh. Pathian nih zei a bau rih ti in a hmuh ti na hngal maw? Zoh hmanh u sih.
Genesis 1:11-25; 2:8, 9.