KAN ngeih mi thil ṭha vialte hi Pathian sin in a ra mi an si. Chun ah ceunak a kan pe tu ding ah nika kha a ser i, zan zong ah ceunak tlawmpal kan hmuh khawh nak ding ah thlapa le arfi a ser hna. Cun kan umnak ding caah vawlei kha a kan ser piak fawn.

Sihmanhsehlaw nika, thlapa, arfi le vawlei cu Pathian nih a ser hmasa bik mi thil an si lo. Zeidah a ser hmasa bik cem ti cu na hngal maw? Amah he aa lo mi minung hna kha Pathian nih hmasa bik cem ah cun a rak ser hna. Pathian cu kan mit in kan hmuh khawh lo bantuk in, cu minung hna zong cu kan hmu kho ve hna lo. Baibal ah cun cu minung hna cu vancungmi tiah ti an si. Pathian nih vancung ah amah he um ṭi awk ah vancungmi cu a rak ser hna.

Pathian nih a ser hmasa bik mi vancungmi cu aa phundang ngaingai. Amah cu Pathian Fater a si i, a Pa he rian a rak ṭuan ve. Thil dang vialte sernak ah Pathian kha a rak bawmh. Nika, thlapa, arfi le kanmah kan vawlei a rak ser lio ah Pathian Kha a rak bawmh ve.

Mah lio ah cun vawlei cu zeidah a rak lawh hnga? A hramthok ah cun aho hmanh vawlei ah an rak um kho lo. Zei hmanh rak um lo in rili pakhat lawng nih vawlei vialte cu a rak khuh dih. Cucaah kan caah thil kha remh hram a thok hna. Zeitindah a rak remh?

Hmasa bik cem ah cun vawlei nih ceunak a rak herh. Cu a si caah Pathian nih ceunak cu nika in vawlei ah a tlan ter. Chun caan le zan caan a um khawh nak ding ah a rak tuah. Cu hnu ah rili ti chung in vawlei kha lang seh tiah a rak tuah rih.

A hramthok ah cun vawlei cung ah zei hmanh a rak um lo. Hika hmanthlak i na hmuh mi bantuk hi a rak si. Pangpar, thingkung le saram hna zong an rak um lo. Rili chung ah nga zong an rak um lo. Saram le minung um khawh nak ding ah vawlei kha can ter awk ah Pathian nih rian dang tampi a ngei rih.