HIKA i pangakchia pahnih hna cu an i dang ngai a si lo mei? An min nan hngal hna maw? Sakappa cu Esau a si i, tuu a zohkhen mipa cu Jakob a si.

Esau le Jakob cu Isak le Rebekah an faphir pahnih an si. An pa Isak nih cun Esau kha a dawt ngaingai, zeicahtiah amah cu sakap thiam mi a si i inn i ei awk ah sa tampi a rak chuahpi tawn caah a si. Sihmanhsehlaw Rebekah nih cun Jakob kha a dawt deuh, zeicah tiah amah cu midai, dai tein a um mi ngakchiapa a rak si.

An pu Abraham cu a rak nung rih ko i, amah nih Jehovah kong a rak chimh tawn mi hna cu Jakob nih zeitluk in dah ngaih a rak duh lai ti cu kan ruah piak khawh ko. Abraham cu a kum 175, faphir unau hna kum 15 an ti ah a rak thi.

Esau cu a kum 40 a si ah Kanaan ram minu pahnih kha a ṭhit hna. Khi nu hna cu Jehovah bia mi an si lo caah mah nih cun Isak le Rebekah cu an ngaih a chiat ter ngai hna.

Nikhat cu Esau kha anau Jakob cung ah a thin a hun ter ngai mi thil pakhat a rak tlung. Isak nih a fa upa deuh kha thluachuah a peknak caan a rak tling. Esau cu Jakob nak in a upat deuh caah, Esau nih cun cu thluachuahnak cu hmuh awk ah aa rak i ruahchan. Sihmanhsehlaw Esau nih thluachuahnak hmuh khawh nak nawl cu tuan deuh lio ah khan Jakob sin ah a rak zuar cang. Cu leng ah cu ngakchia pahnih an rak chuah lio ah khan Jehovah nih cun Jakob nih thluachuahnak cu a hmuh lai tiah a rak chim cang. Cu bang in a rak si taktak. Isak nih thluachuahnak cu Jakob kha a rak pek.

A hnu ah Esau nih mah kong cu a hun theih tik ah Jakob cung ah a thin a hung ngaingai. A thin a hun tuk caah Jakob kha ka thah lai tiah a rak ti. Rebekah nih mah kong cu a theih tik ah, a thin a rak phang ngaingai. Cucaah a vapa Isak kha : ‘Jakob zong nih Kanaan minu hna hi a ṭhit ve sual hna ah cun a si kho lai lo,’ tiah a rak ti.

Khi tik ah Isak nih a fapa Jakob cu a auh i: ‘Kanaan minu chung in nupi na ṭhi lai lo. Haran ah na pu Bethuel a inn ah va kal law a fa pa Laban a fanule pakhat khat kha va ṭhi hna,’ tiah a ti.

Jakob nih a pa bia cu a ngaih i, a rualchan an umnak Haran lei ahcun a rak kal colh ve.