HI mizawpa hi nan zang a fak maw? Amah min cu Job a si i, hi minu cu a nupi a si. Job kha zeitindah a ti nan hngal maw? ‘Pathian cu chiatserh law thi ko ngat,’ a rak ti. Zeicahdah cuban tuk bia cu a chim i, zeicahdah Job nih cutluk in harnak a rak in ti cu zoh hmanh u sih.

Job cu Jehovah nawl a ngai i a zumhnak a fek mi pakhat a rak si. Amah cu Kanaan ram in aa hlat tuk lo nak Uz ram ah a rak um. Jehovah nih Job cu a rak dawt ngaingai. Sihmanhsehlaw amah a hua mipa pakhat a um ve. Aho a si nan hngal maw?

Amah cu Seitan Rulhreu a si. Seitan cu Jehovah a hua mi a ṭha lo mi vancungmi a si ti cu philh hlah u. Adam le Evi kha Jehovah nawl ngaih lo awk ah a rak hruai khawh hna, cucaah aho paoh Jehovah nawl ngaih lo awk ah ka hruai khawh dih ve hna lai tiah a rak ruah. Sihmanhsehlaw a rak hruai kho hna maw? Hruai kho hlah. An kong kan cawn cia mi zumhfek mi hna pa le nu tampi kha ruat ko hna hmanh u. Pazeizat an min dah nan chim khawh hna?

Izipt ram ah Jakob le Josef an thih hnu in, vawlei cung pumpaluk ah Jehovah sin ah a zumhnak a fek bik mi cu Job a rak si. Mikip ṭhat ter lo awk ah a hruai kho hna lai lo ti kha Jehovah nih Seitan kha hngalh ter a rak duh. Cucaah hitin a sin ah a ti: ‘Job khi zoh hmanh. Ka sin ah zeitluk in dah a zumhnak a feh ti cu zoh tuah.’

Seitan nih cun, ‘A zumhnak cu a fek ko lai hen ta, zeicahtiah thluachuah pei na pek i thil ṭha tampi a ngeih cu. Asinain hi thil vialte hi la ṭhan dih law chiat an serh ko lai,’ tiah a rak al.

Cucaah Jehovah nih: ‘Vaa zuam tuah ngat. A thilri vialte cu va la dih ko. Na duh chung in Job cu harnak va pe ko. Keimah cu chiat a ka serh hnga maw kan zoh tuah lai ta. A thah bel cu that hrimhrim hlah,’ a rak ti.

Hmasa bik cem ah Seitan nih Job a caw le a kalauk hna kha mifir a fir ter hna i a tuu paul cu thah a rak si. Cun a fapa le fanu an zapi 10 kha a thah hna. Cu hnu ah Seitan nih Job cu hi tuksapur zawtnak hin a hrem. Job cu a re a rak thei ngaingai. Cucaah Job a nupi nih cun amah cu: ‘Pathian cu chiat serh law thi ko ngat,’ tiah a rak ti. Sihmanhsehlaw Job nih cucu a rak tuah duh lo. Culeng ah hawikawm deu pathum a sin ah an ra i nangmah cu hmasa lio ah na rak ṭhat lo caah hitin harnak na ing tiah an rak ti fawn. Asinain Job cu a zumhnak a rak fek ṭhiamṭhiam ko.

Mah nih cun Jehovah cu a lung a rak lawmh ter ngaingai i, cucaah a tanglei hmanthlak i nan hmuh bang hin a hnu ah Job cu thluachuah a rak pek ṭhan. A zawtnak in a rak damh. Job nih hmasa nak in aa dawh deuh mi fapa le fanu 10 a ngei ṭhan, cun caw, tuu le kalauk cu hmasa nak in let hnih tam in a ngeih ṭhan hna.

Nannih tah, Job bantuk in Jehovah sin ah nan zumhnak a fek zungzal kho lai maw? A feh a si ah cun, nannih zong Pathian nih thluachuah an pek ve hna lai. Vawlei pumpaluk Eden dum bantuk in aa dawh tik ah nan nih zong zungzal in nan nung kho ve lai.