NGAKCHIAPA a ngaihchiat le lung re theihning hi zoh hmanh u. Amah cu Josef a si. A u le nih Izipt lei i a kal mi hna sin ah hin amah cu an zuar. Cuka ah cun amah cu sal ah a cang lai. Zeicah a u le nih hi a ṭha lo mi thil hi an tuah? Zeicah kan ti ah cun annih cu Josef kha an nahchuah caah a si.

An pa Jakob nih Josef cu a dawt ngaingai. Aa dawh ngai mi angki fualpi pakhat a ser piak nak thawng in a dawtnak cu a rak langhter. A u le 10 nih Jakob nih Josef a dawt ti kha an hngalh tik ah, an nah a chuak i Josef cu huat hram an thok.

Josef nih mang pahnih a manh. Cu a mang pahnih ah cun a ule nih Josef cu an kun piak. Cu a mang cu Josef nih a ule a chimh tik hna ah, an huatnak cu a karh chinchin.

Nikhat cu Josef a ule vialte nih an pa a tuu kha an cawngh lio ah Jakob nih Josef cu a ule kha zeitindah an um ti va zoh awk ah a fial. Josef cu a u le nih a rat lio kha an hmuh tik ah, an lak i a cheu nih: ‘Amah cu that u sih!’ an ti. Asinain Reuben, an upa bik pa nih: ‘A si lo, mah cu tuah sawh hlah u!’ tiah a ti hna. Cucaah Josef cu an tlaih i a kao cang mi tikhor chung ah an thlak. Cun an ṭhu i zeitindah kan tuah lai ti kha an khang.

Mah liote ahcun Ishmael mi cheukhat an ra. Cutik ah Judah nih an pa aa khat i an nu aa dang mi a unau hna cu: ‘Hi Ishmael mi hna sin ah hin amah cu zuar u sih,’ tiah a ti hna. A chim bantuk in Josef cu ngun tangka phar 20 ah an zuar. An ṭha lo tuk hringhran mu!

A u le nihcun an pa cu zeitindah an chimh te lai? Meheh pakhat an thah i aa dawh ngaingai mi Josef a angki kha cu meheh thi chung ahcun atu le atu an hnim. Cu hnu ah angki cu an pa Jakob sin ah an kalpi i: ‘Hihi kan hmuh ko. Josef a angki a si le si lo zoh tuah hmanh,’ tiah an va ti.

Jakob nihcun a si ko ti kha a hngalh. ‘Sahrang pakhatkhat nih Josef kha a thah ko cang hi ta,’ tiah a ṭap. Cucu Josef a u le nih an pa nih ruat te seh ti an duh mi cu a si. Jakob cu a ngaih a chia ngaingai. Ni tampi chung a rak ṭah. Sihmanhsehlaw Josef cu a rak thi lo. An kalpinak hmun ah a cung ah zei thil dah a rak cang ti zoh hmanh u sih.