HI ṭhiangṭhunh a si lo ah fung in a corh mi pangpar le a hmin mi almond thei a tlai mi hi zoh tuah u. Hi cu Aaron a ṭhiangṭhunh a si. Pangpar le a hmin mi thei cu Aaron a ṭhiangṭhunh ah zankhat chung te ah an par i an tlai. Zeicahdah ti cu zoh tuah u sih.

Israel mi hna cu ramcar chung ah caan sau nawn an rak vakvai cang. Mi cheukhat nih Moses cu hruaitu si awk a tlak lo i, Aaron zong tlangbawi ngan si awk ah a tlak lo tiah an ruah. Cutin a ruat mi pakhat cu Korah a si i, Dathan, Abiram le mi hna lak i hruaitu 250 zong an si ve. An zapi in an ra i Moses sin ah: ‘Zei cahdah kan cung ah nan i hlorh?’ tiah an ti.

Moses nih Korah le a hnu zultu vialte hna cu: ‘Thaizing zingka ah meikheng kha la hna u law an chung ah rimhmui kha chia u. Cu hnu ah Jehovah biakṭheng ah ra chuak u. Jehovah nih aho dah a thim ti cu kan zoh te lai,’ tiah a ti hna.

A thaizing ah Korah le amah hnu zultu 250 cu biakṭheng ah cun an ra chuak. Mi dang tampi zong mah hna ṭanpi awk ah cun an ra ve. Jehovah cu a thin a hung ngaingai. ‘Hi mi ṭhalo hna thlam hna hin i ṭhen u. An thil zong zeihmanh tong hlah u,’ tiah Moses nih a ti. Mi hna nih cun an ngaih i, Korah, Dathan le Abiram an thlam in hlapi ah an rak i ṭhial.

Cun Moses nih: ‘Hi thawng hin Jehovah nih aho dah a thim ti cu nan hngalh lai. Vawlei cu a kaa a an lai i hi mi ṭhalo hna cu a dolh hna lai,’ tiah a ti.

Moses nih cu bia a chim dih cangka vawlei cu a kak i a kaa a an. Korah thlam le a thil vialte le Dathan le Abiram le an sin i a um mi vialte hna cu vawlei nih a dolh hna i cu hnu ah vawlei cu aa cip ṭhan. Mi hna nih vawlei tang i a tla mi hna ai thawng an theih tik ah: ‘Tli u! Vawlei nih a kan dolh ve sual lai!’ tiah an au.

Korah le a hnu zultu 250 cu biakṭheng pawng ah cun an um rih ko. Cucaah Jehovah nih mei a thlah i, an zapi in an kang dih. Cu hnu ah Jehovah nih Aaron a fapa Eleazar kha a thi mi hna an meikheng kha la hna law biakṭheng khuh ah deng hna tiah a chimh. Hi biakṭheng khuh cu Israel mi hna sin ah Aaron le a fapale hna dah ti lo cu aho hmanh Jehovah caah tlangbawi an ṭuan kho lai lo ti ralrin pek nak caah a rak si.

Sihmanhsehlaw Jehovah nih tlangbawi ca i a thim mi hna cu Aaron le a fapale lawng an si ti cu fian ter a rak duh. Cucaah Moses kha: ‘Israel phunkhat cio in an hruaitu pakhat cio nih an ṭhiangṭhunh rak pu cio hna seh. Levi phun caah cun Aaron nih a ṭhiangṭhunh kha rak pu seh. Cun cu ṭhiangṭhunh hna cu biakamnak kuang hmai i tonnak thlam chung ah khan na chiah hna lai. Tlangbawi ca i ka thim mi a ṭhiangṭhunh cu a par lai,’ tiah a ti.

A thaizing ah Moses nih a va zoh tik ah cun, Aaron a ṭhiangṭhunh cu hi pangpar hna hi a par i a hmin mi almond thei an tlai! Cucaah Aaron a ṭhiangṭhunh kha zeicahdah Jehovah nih a par ter ti nan hngal cang maw?