KUMKHAT hnu kumkhat a rak liam—kum 10, kum 20, kum 30, kum 39! Israel mi hna cu ramcar chung ah cun an um ṭhiamṭhiam rih ko. Sihmanhsehlaw hi kum hna chung vialte cu Jehovah nih a mi hna cu a rak zohkhenh lengmang ko hna. Chun ah minmei tung in le zan ah mei tung in a hruai hna. Cu caan chung vialte cu an thilpuan a rak ṭet kho lo i, an ke zong a rak fak lo.

Izipt ram in an chuahnak in kum 40 nak thlakhatnak thla an hung phan. Israel mi hna cu Kadesh ah an riak. Hi hmun cu a hnu lei kum 40 lio i mingiatu 12 Kanaan ram va ngiatthlai awk i an rak thlahnak hna hmun kha a si. Hi Kadesh ah cun Moses u nu Miriam cu a thi. Hmasa bantuk in atu zong hnahnawhnak a chuak ṭhan.

Mi hna cu ti an hmu lo. Cucaah Moses sin ah an zai i: ‘Rak thi cang u sih law a ṭha deuh ko hnga. Zeicahdah Izipt ram in hi zei hmanh a khoh lo nak hmun ṭhalo ah hin na hun kan hruai? Rawl si seh, theipi siseh, mitsur siseh, taleti siseh an um lo i din awk ti zong a um fawn lo,’ an ti.

Moses le Aaron nih thla cam awk ah biakṭheng i an kal tik ah khan Jehovah nih Moses cu: ‘Mi hna kha hmunkhat ah pum hna. Cun annih an zapi hmai ah khika i a um mi lungpi sin ah bia na chim lai,’tiah a chimh.

Cucaah Moses nih mi hna cu hmunkhat ah a pum hna i: ‘Nannih Pathian a zum lo mi hna, ngai tuah u! Aaron le keimah nih hi lungpi chung in nan caah ti kan chuah ter lai maw?’ tiah a ti hna. Cu hnu ah Moses nih lungpi cu a ṭhiangṭhunh in voihnih a tuk i, lungpi chung cun ti cu tiva bantuk in a hung chuak. Mi he satil he vuai tein din awk ah ti an rak hmuh.

Sihmanhsehlaw Jehovah cu Moses le Aaron cung ah a thin a rak hung. Zeicah ti nan hngal maw? Zeicahtiah Moses le Aaron nih lungpi chung in ti kan chuah ter lai an rak ti caah a si. Sihmanhsehlaw a ngaite ti ah cun Jehovah nih a chuah ter mi a si. Hi kong ah Moses le Aaron nih a hmaan mi bia kha an chim lo caah, Jehovah nih dan kan tat hna lai a ti hna. ‘Ka miphun kha Kanaan ram chung ah nan luhpi hna lai lo,’ a ti.

A rauh hlan ah Israel mi hna cu Kadesh cun an chuak. Tlawmpal hnu ah Hor tlang an hung phan. Cuka ah tlangpar ah Aaron cu a thi. Amah cu a thih lio ah kum 123 a si. Israel mi hna cu an ngaih a chia ngai i, cucaah Aaron caah mi hna cu ni 30 chung an ṭap. A fapa Eleazar kha Israel mi hna i a pahnihnak tlangbawi ngan a rak si.