ZEICAHDAH hi mipa hi a puan kha cheu tampi ah a thleh dih hna nan hngal maw? Jehovah nih a fial caah a si. Hi mipa cu Pathian profet Ahijah a si. Profet cu zeidah a si nan hngal maw? Hmailei zeidah a cang lai ti a hlan in Pathian nih a chimh mi a si.

Hi hmanthlak chung ah hin Ahijah cu Jeroboam sin ah bia a chim lio a si. Jeroboam cu inn saknak lei haotu ah Solomon nih a chiah mipa a si. Ahijah nih Jeroboam cu hika lampi i a ton lio ah, Ahijah nih khuaruahhar thil pakhat kha a tuah. Aa aih lio mi puan tharte cu aa phoih i cheu 12 ah a thleh. Cun Jeroboam sin ah: ‘Cheu 10 hi nangmah caah i lak,’ a ti. Zeicah Ahijah nih cheu 10 cu Jeroboam cu a pek hnga nan hngal maw?

Ahijah nihcun Jehovah nih pennak cu Solomon sin in a lak cang lai tiah a chimh. Jehovah nih phun 10 cu Jeroboam sin ah a pek lai a ti. Cu cu Solomon fapa Rehoboam nih a uk awk ahcun phun hnih lawng an tang lai tinak a si.

Solomon cu Ahijah nih Jeroboam a chimh mi bia kha a theih tik ah a thin a hung ngaingai. Cucaah Jeroboam kha thah awk ah aa zuam. Sihmanhsehlaw Jeroboam cu Izipt ram lei ah a zam. Cu hnu tlawmpal ah Solomon cu a thi. Amah cu kum 40 chung siangpahrang a si; asinain atu cu a fapa Rehoboam kha siangpahrang a si cang. Izipt ram in cun Jeroboam nih Solomon a thi cang kha a theih i, cucaah Israel ram ah a hung kir.

Rehoboam cu siangpahrang ṭha a si lo. A pa Solomon nak hmanh khan mi hna cung ah a ṭha lo deuh. Jeroboam le a dang a biapi mi upa cheukhat kha siangpahrang Rehoboam sin ahcun an va kal i mi hna cung ah ṭhat deuh awk ah an va nawl. Sihmanhsehlaw Rehoboam nihcun a ngai duh hna lo. A taktak ahcun a hlan nak hmanh in a ṭhalo deuh chin. Cucaah mi hna nih Jeroboam cu phun 10 hna cung ah siangpahrang ṭuan ding in rian an pek. Asinain Benjamin le Judah phun phunhnih lawng nih Rehoboam cu an siangpahrang ah an i chiah.

Jeroboam nihcun a mi hna kha Jerusalem khua i Jehovah biakinn ah biak awk i vung kal kha a duh hna lo. Cucaah sui cawfa pahnih a ser i a mi phun 10 pawl cu a biakter hna. Cucaah a rauh hlan ah an ram cu sualnak le zang-ennak lawng in a khat.

Phunhnih hna pennak chung zong ah khan harnak a um ve. Rehoboam siangpahrang a cannak in kum nga hlan deuh ahcun, Izipt siangpahrang cu Jerusalem doh awk ah a hung chuak. Jehovah biakinn chung in chawva tampi kha amah nihcun a lak hna. Cucaah an sak lio bantuk in biakinn cu caan tawite lawng a hmun kho.