SIANGPAHRANG Nebukhadnezzar nih Israel mifim hna kha Babilon ah a kalpi hna nak in kum 10 a si cang. Cun atu cu zeidah a cang ti kha zoh hmanh u! Jerusalem cu mei in khangh a si. Thah lo mi Israel mi vialte cu Babilon ah thongtla in kalpi dih an si.

Mi hna nih an lam ṭhalo an i thlen lo ahcun mah ti hin a si te lai tiah Jehovah a profet hna nih an rak chim cia mi a si ti kha philh hlah u. Sihmanhsehlaw Israel mi hna nih profet hna chim mi cu anrak ngai lo. Jehovah can ah a hmaan lo mi pathian hna tu kha an biak chin lengmang ko. Cucaah mi hna cu dan tat awk tlak hrimhrim an si ko. Pathian profet Ezekiel nih Israel mi hna an tuah mi thil ṭhalo hna kong cu a kan chimh caah hi cu kan hngalh mi a si.

Ezekiel cu aho a si ti nan hngal maw? Jerusalem a rawh hlan a hnulei kum 10 lio ah kan Siangpahrang Nebukhadnezzar nih Babilon ah a kalpi mi tlangval hna lak ah khan aa tel ve mi pakhat a si. Daniel le a hawile pathum Shadrak, Meshak le Abednego zong kha mah lio ahcun Babilon ah kalpi an rak si ve.

Ezekiel cu Babilon i a um rih ko lio ah, Jehovah nih Jerusalem khua chung biakinn i a cang mi thil ṭhalo hna kha a hmuhsak. Hi cu Jehovah nih khuaruahhar ṭhawnnak in a tuah mi a si. Ezekiel cu Babilon ah a um taktak rih ko, Sihmanhsehlaw Jehovah nih Jerusalem biakinn i a cang mi thil vialte kha a hmuhter. Cun Ezekiel nih a rak hmuh mi cu tuksapur ngaingai a si!

‘Hi biakinn i mi hna nih an tuah mi fih awk tlak thil hna hi zoh tuah. A vanpang hna cu rul le saram dang hna suai mi lawngte in a khat mi zong hi zoh tuah. Cun Israel mi hna nih an biak len ko mi hna zong hi zoh tuah,’ tiah Jehovah nih Ezekiel cu a chimh. Cucaah Ezekiel nihcun hi thil hna cu a hmuh khawh i, a cang mi vialte cu a ṭial dih hna.

‘Israel mi hna hruaitu pawl nih a thli tein zeidah an tuah ti cu na hmu maw?’ tiah Jehovah nih Ezekiel cu a hal. A si, hi zong cu a hmuh khawh ko hna. Annih cu mi 70 an si i, an zapi tein a hmaanlo mi pathian kha an biak hna. Annih nihcun: ‘Jehovah nih a kan hmu lai lo. Kan ram cu a kaltak cang,’ an ti.

Cu hnu ah Jehovah nih Ezekiel cu biakinn chaklei kutka i nu cheukhat kha a hmuhsak hna. Cuka ahcun a hmaan lo mi pathian Tammuz kha an ṭhu i an biak len ko. Cun Jehovah biakinn luhnak i pa hna khi zoh hna hmanh! 25 hrawng an si. Ezekiel nih annih cu a hmuh hna. Annih cu nihchuah lei hoih in an kun i nika kha an biak lengmang!

‘Hi mi hna cu keimah kha an ka upat lo. Thil ṭhalo lawng an tuah lo i, ka biakinn hrimhrim ah an ra i an tauh ko hna!’ tiah Jehovah nih a ti. Cun annih cu hrawh an si tik ah, an caah ka ngaih a chia lai lo,’ ti in bia a kam.

Jehovah nih hi thil hna kha Ezekiel a hmuhsak nak in kum thum hrawng lawng a si rih lio ah Israel mi hna nihcun Nebuchadnezzar kha an rak ral. Cucaah anmah doh awk ah a kal. Kum khat le a cheu hnu ah Babilon mi hna nih Jerusalem ralhau cu an hrawh i khualipi cu mei in ah khangh. Mi tampi cu thah le a cheu cu Babilon ah thongtla in kalpi an rak si.

Zeicahdah Jehovah nih hi tuksapur rawhnak cu Israel mi hna cung ah a tlunter? A si, Jehovah a bia kha an rak ngai lo i a nawlbia kha an rak zulh lo caah a si. Mah nih hin Jehovah nih a chim mi paoh cu tuah zungzal awk ah zeitluk biapi dah a si ti a kan hmuhsak.

A hmasa bik ahcun minung tlawmpal kha Jerusalem ah umnak nawl an pek hna. Siangpahrang Nebukhadnezzar nih Judah mi pakhat Gedaliah an ti mi kha hi mi hna uktu ah a chiah. Sihmanhsehlaw a hnu deuh ah Israel mi a cheu nih Gedaliah cu an thah. Atu cu hi thil ṭhalo a cang mi ruang ah Babilon mi hna an ra lai i an kan thah dih lai ti kha mi hna cu an thin a phang. Cucaah Jeremiah kha anmah he hramhram in an kalpi ve i Izipt ram ah an zam.

Cucaah Israel ram chung ah mi pakhat hmanh an um ti lo. Kum 70 chung ram chung ah mi pakhat hmanh um lo in a lawng ko. Sihmanhsehlaw Jehovah nih kum 70 hnu ah a miphun cu an ram ah ka ratpi ṭhan te hna lai tiah bia a kam. Cu caan karlak ahcun an kalpinak hna Babilon ram chung ah Pathian miphun hna cung ah zei thil hna dah a tlung? Zoh tuah u sih.