SIANGPAHRANG Jeroboam a thih hnu in, chaklei Israel phun 10 pawl pennak a uktu siangpahrang hna cu a ṭha lo mi lawngte an si. Cu hna lak i a ṭha lo bik mi cu Siangpahrang Ahab a si. Zeicah ti nan hngal maw? A biapi bik cu a ṭha lo mi a nupi Jezebel ruang ah a si.

Jezebel cu Israel minu a si lo. Amah cu Sidon siangpahrang fanu a si. Amah cu a hmaan lo mi pathian Baal kha a biak i, Ahab le Israel mi tampi zong kha Baal cu a biakter ve hna. Jezebel nih Jehovah cu a huat i a profet tampi kha a thah hna. Profet cheukhat cu thah an si lo nak hnga caah lungkua te hna ah an i thup. Jezebel nih thil zeimaw a duh a si ah cun, a duh mi cu hmuh awk ah mi zong a thah ko hna lai.

Nikhat cu Siangpahrang Ahab cu a ngaih a chia ngaingai. Cucaah Jezebel nih: ‘Zeicah nihin cu na ngaih a chiat ko?’ tiah a hal.

‘Naboth nih a ka chimh mi bia ruang ah a si. A mitsur dum kha cawk ka duh nain, kaan zorh kho lai lo a ka ti,’ tiah a leh.

‘Na ngai chia hlah, Keimah nih kan hmuhter khawh ko lai,’ tiah Jezebel nih a ti.

Cucaah Jezebel nih Naboth a umnak khua i bawi hna sin ah khan cakuat a ṭial. ‘Naboth nih Pathian le siangpahrang kha chiat a serh hna ti in mi ṭhiṭhalo hna kha puhter hna u law, Naboth kha khuapi leng ah chuahpi u law lung in thi lak in chep u,’ tiah a ti hna.

Jezebel nih Naboth a thi cang ti a theih cangka, Ahab sin ahcun: ‘Atu cu va kal law a mitsur dum cu vaa lak ko cang,’ tiah a chimh. Cu baktuk tuksapur a si mi rian a ṭuan caah Jezebel cu dan tat awk tlak a si nan ti ve lo mei?

Cucaah a caan a zat tik ah, Jehovah nih Jehu an ti mipa kha amah dan tat awk ahcun a rak thlah. Jezebel nih Jehu a ra lio ti thawng a theih tik ah, a mit kha zeilo aa thuh i dawh tein aa ṭamh. Sihmanhsehlaw Jehu cu a ra i, Jezebel kha thlalangawng ah a hmuh tik ah, siangpahrang inn chung i a um mi hna kha a auh hna i: ‘Amah kha vun hlonh u!’ tiah a ti hna. Hmanthlak i nan hmuh bantuk hin mi hna nihcun a bia cu an ngaih i an tuah. Thlalangawng cun vawlei ah an vun hlonh i a thi. Hi cu a ṭha lo mi siangpahrangnu Jezebel a donghnak a si.