HI TLANGVALPA, mi nih an nihsawh mi hi zoh hmanh u. Amah cu aho a si nan hngal maw? Jeremiah a si. Amah cu a biapi ngai mi Pathian profet pakhat a si.

Josiah nih ram chung i siasalvialte hrawh hram a thok hnu tlawmpal ah, Jehovah nih Jeremiah cu amah profet si awk ah a chimh. Asinain Jeremiah nihcun profet pakhat si awk ah ka no tuk rih tiah a rak ruah. Sihmanhsehlaw Jehovah nih kan bawmh ko lai tiah a ti.

Jeremiah nih Israel mi hna cu thil ṭhalo tuah ngol awk ah a chimh hna. ‘Miphun dang hna an biak mi pathian hna cu a hmaan lo mi an si,’ a ti. Sihmanhsehlaw Israel mi tampi nihcun a hmaan mi Pathian Jehovah nak in siasal tu kha biak an rak duh deuh. Jeremiah nih mi hna kha an ṭhatlonak ruang ah Pathian nih dan an tat hna lai tiah a chimh tik hna ah, annih nihcun a nih tu in an nihsawh lehlam.

Kum tampi a luan cang. Josiah cu a thi i, thla thum hnu ah a fapa Jehoiakim cu a siangpahrang a hung si. Jeremiah nihcun mi hna cu: ‘Nan lam ṭhalo kha nan i thlen lo ahcun Jerusalem cu hrawh a si lai,’ tiah ralrin a pek rih lengmang ko hna. Tlangbawi hna nih Jeremiah cu an tlaih i: ‘Hi bia na chim ruang ah nangmah cu thah na si lai,’ tiah an au hnawh. Cun Israel bawi hna kha: ‘Kan khualipi ralchan in bia a chim caah Jeremiah cu thah awk a si,’ an ti hna.

Atu ah Jeremiah cu zeidah a tuah cang lai? Amah nihcun a ṭih lo! An zapi sin ah: ‘Nan sin ah hi bia hi chim awk ah Jehovah nih a ka thlah mi a si. Nan nunnak lam ṭhalo hi nan i thlen lo ahcun, Jehovah nih Jerusalem cu a hrawh ko lai. Sihmanhsehlaw hihi hngal u: Nan ka thah ahcun, sualnak a ngei lo mi kha nan thah a si ko lai,’ a ti hna.

Bawi hna nih Jeremiah cu an luatter, sihmanhsehlaw Israel mi hna cu an lam ṭhalo kha an i thleng hlei lo. A hnu ah Babilon siangpahrang Nebukhadnezzar cu a ra i Jerusalem cu a hung tuk. A donghnak ah Nebukhadnezzar nih Israel mi hna cu a sal ah a tlaih dih hna. Mi thong tampi kha Babilon ah a hruai hna. Hngalh bal lo mi hna nih na hngalh bal lo mi ram ah in kalpi hna sehlaw zeidah a lawh hnga ti cu ruat tuah hmanh u!