DAVID nih Goliath kha a thah hnu in Israel ralbawingan bik Abner nih amah cu Saul sin ah a kalpi. Saul cu David cung ah a lung aa lawm ngai ngai. A ralkap haotu ah a ser i siangpahrang inn chung ah a umter.

A hnu ah, Filistin mi hna dohnak in ralkapbu cu an hung kir tik ah nu hna nih: ‘Saul nih a thongthong in a thah hna, sihmanhsehlaw David nih a sangsang in,’ tiah hla an sak. Saul nak in David kha an thangṭhat deuh caah Saul cu a nah a chuak. Sihmanhsehlaw Saul fapa Jonathan cu a nah a chuak lo. David kha a dawt ngai ngai i Divid zong nih a dawt ngai ve. Cucaah zungzal in hawikom kan si lai tiah biakamnak an tuah.

David cu tingtang tum a thiam ngai mi a si i, Saul nih a tum mi cu a duh ngai. Sihmanhsehlaw nikhat cu a nahchuahnak nih Saul cu tuksapur a si mi thil pakhat a tuahter. David nih a tingtang a tum lio ah Saul cu a fei kha aa lak i: ‘David kha vanpang he ka hlinh chih lai!’ tiah a chim i a khawh. Sihmanhsehlaw David nih a penh manh i fei nih a kheng lo. A hnu ah Saul nih David cu a fei in a voihnihnak a nganh ṭhan. Cucaah atu cu kaa ralrin a hau ti kha David nih a hngalh cang.

Saul nih a tuah mi biakamnak kha nan hngal ti maw? Amah nihcun a fanu kha Goliath a that mi cu nupi caah ka pek hna lai tiah a ti. A hnu bik ah Saul nih David cu ka fanu Mikhal he nan i ṭhi ko lai, sihmanhsehlaw Filistin mi 100 na thah hmasa hna lai tiah a ti. Ruat hmanh u! Saul nih cun Filistin mi hna nih David cu an thah ko lai, tiah aa rak i ruahchan. Asinian, an that kho lo, cucaah Saul nih a fanu cu David nupi si awk ah a pek.

Nikhat cu Saul nih Jonathan le a sal vialte kha David thah aduhnak kong a chimh hna. Sihmanhsehlaw Jonathan nih a pa cu: ‘David cu harnak pe hlah. David nih na cung ah zei sualnak hmanh a tuah bal lo. A tuah mi vialte cu nangmah ṭhatnak ca lawngte a si ko. Goliath a rak thah lio ah khan a nunnak pek in pei a rak kal cu, mah kha na rak hmuh lio ah na lung aa rak i lawm lo mei?’ tiah a ti.

Sual nih Jonathan bia cu a ngaih i, David cu harnak ka pe lai lo tiah bia aa kam. Cucaah David cu an ratpi ṭhan i Saul a inn chung ah hmasa bang in rian a ṭuan ṭhan. Asinain nikhat cu David nih tingtang a tum lio ah, Saul nih a fei cun David cu a khawh ṭhan. David nih a penh i fei cu vanpang ah aa hlinh. Hi cu a voithumnak a si! Atu cu ka zam a hau ko cang ti kha David nih a hngalh cang.

Cu zan ahcun David cu amah inn ah a kal. Sihmanhsehlaw Saul nih mi cheukhat kha amah thah awk ah a thlah hna. Mikhal nih a pa ruahnak kha a hngalh. Cucaah a va kha: ‘Tuzan ah na zam lo ahcun, thai zing cu na thi ko cang lai,’ tiah a chimh. Cu zan ahcun Mikhal nih David cu thlalangawng in chuah awk ah a bawmh. Kum sarih chung David cu Saul nih a hmuh khawh nak hnga lo hmunkhat hnu hmunkhat ah aa thup lengmang.