Babilon ram chung i sal an can lio ah, Israel mi hna cu an zumhnak kong ah hneksaknak tampi an rak ton. Shadrak, Meshak le Abednego cu meiphu chung ah an rak paih hna, sihmanhsehlaw Pathian nih annih cu a nung in a khamh ṭhan hna. Cu hnu ah, Babilon cu Media mi le Persia mi hna nih an tei hnu ah, Daniel cu chindeih thong chung ah an rak thlak nain, Pathian nih chindeih cu an ka kha a phih hna i amah cu a khamh ve ṭhiamṭhiam.

A donghnak ah, Persia siangpahrang Sairas nih Israel mi hna cu a luatter hna. Sal i Babilon i an kalpi hna nak in kum 70 hnu bak ah an ram ah cun an kir ṭhan. Jerusalem ah an kir ṭhan hnu in an tuah hmasa bik mi cu Jehovah a biakinn sak a si. Asinain an ral hna nih an rian cu ṭuan kho lo ding in an tuah colh hna. Cucaah Jerusalem i an kirnak in kum 22 hnu lawng ah biakinn sak cu an lim khawh.

Adang pakhat kan hngalh rih mi cu biakinn ṭamh awk i Jerusalem ah Ezra a kalnak kong a si. Cucu biakinn sak an limnak in kum 47 hrawng hnu ah a si. Ezra nih Jerusalem a tlawnnak in kum 13 hnu ah, Nehemiah nih a rawk cang mi Jerusalem ralhau remh ṭhan awk ah a va bawmh hna. Ṭhen NGANAK nihcun cu caan tiang kum 152 chung tuanbia kong a chim.