MINUNG 50,000 dengmang Babilon in Jerusalem lei khuallam hlapi ahcun an kal. Sihmanhsehlaw an hung phanh tik ahcun, Jerusalem cu a rawk dih hir hiar i burbuk nganpi bantuk a si ko. Israel mi hna cu zeipaoh a thar in an thok ṭhan dih a herh.

An sak hmasa bik mi lak ah pakhat cu biakṭheng a si. Cucu Jehovah sin ah saram le laksawng dang an thawinak hmun a si. Thla tlawmpal hnu ah Israel mi hna nih biakinn sak hram an thok. Sihmanhsehlaw an pawngkam ram hna i a um mi an ral pawl nih Israel mi hna an sak mi cu an duh lo. Cucaah ngolter awk ah an hro hna. A donghnak ah hi an ral hna nih Persia siangpahrang thar kha an biakinn sak ngolter awk ah nawlbia an serter.

Kum tam nawn a kal cang. Atu cu Israel mi hna Babilon in an chuah nak in kum 17 a si cang. Jehovah nih a profet Haggai le Zekhariah kha a thlah hna i mi hna kha an biakinn saknak rian thok ṭhan awk ah a chimh ter hna. Mi hna nih Pathian bawmhnak kha an i bochan i, profet hna bia kha an ngaih. Nawlbia nih nan sa lai lo a ti nain an thok ṭhan.

Cucaah Persia bawi pakhat Tattenai an ti mi cu a ra i, ‘Aho nawl in dah biakinn cu nan sak ṭhan?’ tiah a hal hna. Israel mi hna nih kannih cu Babilon ram i kan um lio ah Sairas nih: ‘Atu cu va kal u law Jerusalem le nan Pathian Jehovah biakinn kha va sa u,’ a kan ti tiah an chimh.

Tattenai nih Babilon ah ca a kuat hna i, cu lio caan ah a thi cang mi Sairas nih a chim taktak maw tiah a hal hna. A rauh hlan ah Persia siangpahrang thar sin in cakuat pakhat cu a rak phan ṭhan. Sairas nih cun a rak chim taktak ko ti in a hun leh. Cucaah siangpahrang nih cun: ‘Israel mi hna cu an Pathian biakinn cu sa ko hna seh. Cun nangmah zong anmah bawmh awk ah nawl kan pek,’ a hun ti. Kum li hrawng ah an biakinn sak cu a dih i, Israel mi hna cu an i lawm ngaingai.

Kum tampi a dih ṭhan rih. Atu cu biakinn an lim nak in kum 48 a si deng cang. Jerusalem i mi hna cu an si a fak i, khualipi le Pathian a biakinn cu an rak i dawh hrimhrim lo. Babilon i a rak um mi Israel mipa Ezra nih Pathian biakinn ṭamh a herhnak kong cu a hun hngalh. Cucaah zeidah a tuah ti nan hngal maw?

Ezra cu Persia siangpahrang Artazaksis kha a va ton i, hi a ṭha mi siangpahrang nih Ezra cu Jerusalem lei kalpi awk ah laksawng tampi a pek. Cucaah Ezra nih Babilon i a um mi Israel mi hna kha cu laksawng pawl cu Jerusalem lei kalpi awk ah bawmhnak a hal hna. Minung 6,000 hrawng nih kan in kalpi ko lai an ti. Kalpi awk ah sui le ngun le a dang thil mansung tampi an rak ngei.

A karlak lam ah mi ṭhalo tampi an um caah Ezra cu a thin a phang. Cu mi hna nihcun an sui le an ngun kha chuh in anmah kha an thah khawh hna. Cucaah Ezra nih mi hna kha hmanthlak i nan hmuh bang hin hmunkhat ah a pumh hna. Jerusalem lei an kalnak lam ah a zohkhenh hna nak hnga Jehovah sin ah thla an cam.

Jehovah nih annih cu a zohkhenh taktak hna. Thlali chung an kal hnu ah himdam tein Jerusalem cu an phan. Mah nih hin, bawmh awk ah amah aa bochan mi hna cu Jehovah nih a zohkhenh khawh hrimhrim hna ti a langhter lo mei?