MEDIA le Persia miphun hna nih Babilon an laknak in kum hnih dengmang a si cang. Atu cu zeidah a tlung cang zoh hmanh u! A si, Israel mi hna cu Babilon in an chuak cang. Zeitindah an luat ning a si? Aho nih dah a kalter hna?

Persia siangpahrang Sairas nih a kalter hna. Sairas a chuah hlan kum tampi lio ah, Jehovah nih a profet Isaiah kha hitin a ṭialter cang: ‘Nangmah nih tuah seh ti ka duh mi kha na tuah lai.’ Hika i a chim bantuktein Babilon khua laknak ah Sairas nihcun a rak hruai hna. Media le Persia mi hna cu aa hung ko mi kutka in zan ah khualipi chung ah an lut.

Sihmanhsehlaw Jehovah a profet Isaiah nihcun Sairas nih Jerusalem le a biakinn sak ṭhan awk ah nawl a pek te hna lai tiah zong a chim ve. Sairas nih nawl cu a rak pe taktak hna maw? A si, a pek hna. Sairas nih Israel mi hna cu hitin a ti hna: ‘Atu cu Jerusalem ah va kal u law, nan Pathian Jehovah a biakinn kha va sa u.’ Cucaah Israel mi hna cu a chim bang in tuah awk ah an kal lio a si.

Sihmanhsehlaw Babilon i a um mi Israel vialte cu a hlat tuk mi Jerusalem lei ah an kal kho dih lo. A hlat tuk mi khuallam a si ko. Meng 500 (kilometer 800) hrawng a si i, a tampi cu cutluk hla mi khuallam kal awk ah an tar tuk cang i, a zaw tuk mi zong an um ve. Cun mi cheukhat an kal lonak sullam dang zong a um ve. Sihmanhsehlaw Sairas nih a kal lo mi hna cu: ‘Jerusalem le a biakinn sak ṭhan awk i a kal mi hna kha sui le ngun le a dang laksawng zong pe hna u,’ tiah a ti hna.

Cucaah Jerusalem i a kir hnga mi Israel mihna sin ahcun laksawng tampi an rak pek hna. Culeng ah, Jerusalem a rak hrawh lio i Jehovah a biakinn chung in Nebukhadnezzar nih a rak lak mi hrai le kheng vialte zong kha Sairas nihcun a pek ṭhan dih hna. Cucaah a kal mi hna cu phorh pah awk thil tampi an rak ngei.

Thlali hrawng an kal hnu ah Israel mi hna cu Jerusalem khua kha an phan ṭhan. Cucu khualipi a rawhnak in le mi pakhat hmanh an um lo nak in kum 70 hnu bak ah a si. Sihmanhsehlaw Israel mi hna cu anmah ram ah an phan ṭhan cang nain, hmailei kan cawn te lai bang in caan har cheukhat an rak ngei ṭhiamṭhiam.