HI mi hna lak i pakhat nih a sawh mi arfi ceu khi nan hmu maw? Jerusalem in an chuah tik ah arfi cu a lang. Hi mi hna cu Nichuahlei in a ra mi an si i, arfi kha an ngiat. Hi arfi thar nih hin a biapi ngaingai mi minung pakhat sin ah a kan hruai tiah an zumh.

Mi hna cu Jerusalem an phak tik ah, ‘Judah siangpahrang a si ding mi ngakchia cu khoikadah a um?’ tiah an hal hna. “Judah” ti cu Israel mi hna an min phunkhat a si. ‘Nichuahlei i kan um lio ah ngakchiapa a arfi cu kan hmuh hmasa bik i, amah biak awk ahcun kan ra,’ tiah an ti.

Jerusalem i siangpahrang Herod nih hi kong a theih tik ah, a awlok a chawng. Siangpahrang dang nih amah hmun rawlh ding kha a duh lo. Cucaah Herod nih tlangbawi ngan kha a auh hna i: ‘Biakam mi siangpahrang cu khuazei ah dah a chuah lai?’ tiah a hal hna. Annih nih: ‘Baibal nihcun Bethlehem khua chung ah a si lai a ti,’ tiah an leh.

Cucaah Herod nih Nichuahlei mi cu a auh hna i: ‘Va kal u law ngakchia cu va kawl tuah u. Nan hmuh tik ah rak ka chim ve te u. Keimah zong vakal in biak ka duh ve,’ a ti hna. Sihmanhsehlaw, a taktak cu Herod nih ngakchia kha thah awk ah hmuh a duh mi a si!

Cu hnu ah arfi cu khi mi hna an hmailei in Bethlehem lei ah a kal i, ngakchia a umnak hmun zawn ah a dir. Mi hna cu inn chung ah an vung luh tik ah Mari le ngakchia Jesuh cu an hmuh hna. An laksawng kha an chuah i Jesuh kha an pek. Sihmanhsehlaw a hnu ah Jehovah nih mi hna cu an mang ah Herod sin i kir ṭhan ti lo ding in ralrin a pek hna. Cucaah an ram lei ah lam dang in an kir ṭhan.

Herod nih Nichuahlei mi an ram ah an kir ṭhan cang ti a theih tik ah a thin a hung ngaingai. Cucaah Bethlehem khua chung i kum hnih le a tanglei ngakchia pa vialte thah dih awk ah nawl a pek. Sihmanhsehlaw Jehovah nih Josef kha a mang ah ralrin a rak pek chung cang i, Josef cu a innchungkhar hna he cun Izipt ram ah an zam. A hnu ah Josef nih Herod a thi cang ti a theih tik ah, Mari le Jesuh kha a lak hna i Nazareth ah a hung kir ṭhan. Cuka ahcun Jesuh cu a rak ṭhang.

Khi arfi thar cu aho nih a tlanter lai tiah dah nan ruah? Khi mi hna cu hmasa bik ah Jerusalem ah an kal ti kha philh hlah u. Satan Rulhreu nihcun Pathian Fapa kha thah a duh i, Jerusalem i Siangpahrang Herod nih Jesuh thah awk ah aa zuam lai ti kha a hngalh. Cucaah khi arfi a tlantertu cu Satan a si hrimhrim ko lai ti a fiang.