HIKA ah hin cun Jesuh cu a thin a hung ngai mi a lo, a si lo mei? Zeicah mah tluk cun a thin a hun hnga nan hngal maw? Jerusalem khua Pathian a biakinn i hi mi hna hi an hak a kau tuk caah a si. Hika i Pathian biak awk ah a ra mi hna sin in tangka tampi hmunh awk an i zuam caah a si.

Khi cawtumno tete hna le tuu hna le ṭhuro hna khi nan hmu maw? Hi mi hna nih biakinn chung tiang an ra i hi saram hna kha an zuar. Zeicah an rak zuar nan hngal maw? Israel mi hna nih Pathian sin thawi awk ah saram hna le vate hna kha an herh caah a si.

Israel mi cu sualnak an tuah ahcun Pathian sin ah thawinak an pek lai tiah Pathian nawlbia nih a ti. Cun Israel mi hna nih thawinak tuah an herhnak caan dang zong a um ve. Asinain Pathian sin thawi awk saram le vate hna cu khuazei in dah Israel mi hna nih an hmuh khawh lai?

Israel mi cheukhat cu vate hna le saram hna anmah nih an ngeih. Cucaah mah cu an pek khawh ko. Sihmanhsehlaw Israel mi tampi cu vate le saram kha an ngei lo. Cun a dang cu Jerusalem in lam hlapi ah an um i, anmah saram kha biakinn tiang cu an rak i ratpi kho lo. Cucaah mi hna cu an ra i an herh mi saram le vate hna cu hika ah hin an cawk tawn. Asinain hi mi hna nih mi cu tangka tamtuk an lak hna. Mi hna kha an hlen hna. Cuhlei ah hi Pathian biakinn chung ah hin cun an zuar awk a si lo.

Cucaahcun Jesuh a thin a hun cu a si. Cucaah tangka an chiahnak an cabuai hna kha a lehpiak dih hna i an tangka vialte cu a tle dih. Cun hri pakhat aa hrual i saram vialte kha biakinn in a ṭhawl dih hna. Ṭhuro a zuar mi hna kha: ‘Hika hmun hin nan laileng kha chuahpi dih hna u! Ka Pa inn cu chaw dawrnak hmun ah ser hlah u,’ tiah nawl a pek hna.

Jesuh zultu cheukhat cu mah lio ahcun amah he Jerusalem biakinn chung ah an um ve. Jesuh nih a tuah mi an hmuh tik ah an khuaruah a har ngai. Cuhnu ah Pathian Fapa kong he aa tlai in Baibal chung ah hitin a ti kha an lung a hung pem ṭhan: ‘Pathian inn a dawtnak cu a chung ah mei bang in a kang lai.’

Jesuh cu Jerusalem ah lanhtak rawl danghnak puai a kai lio ah, khuaruahharnak thil tampi a tuah. A hnu ah, Judea peng in a chuak i, Kalili peng lei a va tlawng ṭhan. Sihmanhsehlaw a kal pah in Samaria peng kha a tan pah. Cuka ahcun zeidah a tlung zoh tuah u sih.