HI MINU le pa pahnih hna hi aho an si nan hngal hna maw? Minu cu Jesuh a hawikom a si mi Mari Magdalin a si. Cun puan rang aa aih mi pa hna cu vancungmi an si. Mari nih a zoh lengmang mi a khaan bite cu Jesuh a thih hnu in a ruak an vuinak hmun a si. Cucu lungkua thlan an ti. Sihmanhsehlaw atu cu a ruak cu a um ti lo! Ahonihdah a lak? Zoh hmanh u sih.

Jesuh thih hnu ah tlangbawi hna nih Pilat kha: ‘Jesuh cu a nun lio ah ni thum hnu ah ka tho ṭhan lai a rak ti. Cucaah thlan cu a cawnghter hna. Cun a zultu hna nih a ruak kha fir in thihnak in a tho ṭhan cang an ti kho hnga lo!’ an rak ti. Pilat nih tlangbawi pawl cu thlan cawngh awk ah ralkap kha thlah ko hna u tiah a ti hna.

Sihmanhsehlaw Jesuh a thih hnu nithumnak ni zingka tuante ah Jehovah a vancungmi pakhat duak tiah a rung ṭum. Thlan an kharnak lungpherpi kha a thawn. Ralkap cu an ṭih tuk i an cawl cang kho lo. A hnu bik ah thlan chung ah an zoh i ruak cu a um ti lo! Ralkap cheukhat kha khua chung ah an kal i, tlangbawi pawl kha an chimh hna. Khi tlangbawi ṭhalo hna nih zeidah an tuah nan hngal maw? Ralkap pawl kha lih bia chim awk ah zik an nawh hna. ‘A zultu pawl kha zan ah an ra i kan i hngilh kar ah a ruak kha an fir nan ti lai,’ tiah tlangbawi pawl nih ralkap cu an ti hna.

Cu lio ahcun Jesuh a hawikom nu cheukhat nih thlan an rak len. A lawng in an hmuh caah an khuaruah a har ngaingai! Chikkhatte ah puanrang aa aih mi vancungmi pahnih an rung lang. ‘Zeicahdah Jesuh cu hika ah nan kawl?’ tiah an hal hna. ‘ A tho ṭhan cang. Khulrang in va kal u law a zultu pawl kha va chim hna u,’ an ti hna. Ahodah a si nan hngal maw? Jesuh a si! ‘Va kal u law ka zultu pawl kha va chim hna u,’ a ti hna.

Nu hna nih zultu pawl cu Jesuh a nung ṭhan cang i lam ah kan hmuh tiah an chimh tik hna ah zultu pawl nihcun an zum kho hrim lo. Cucaah Piter le Johan cu anmah theng nih zoh awk ah thlan lei ah an tli ve, sihmanhsehlaw thlan cu a lawng cang! Piter le Johan an chuah lio ah khan Mari Magdalin cu hnulei ah a tang rih. Mah lio ahcun thlan chung ah a zoh i vancungmi pahnih kha a hmuh hna.

Jesuh a ruak cu zeitin a um ti nan hngal maw? Pathian nih a lohter. Pathian nih Jesuh cu a thihnak taksa pum in a thawhter ṭhan ti lo. Vancung i vancungmi hna bang in Jesuh kha thlarau pum thar a pek cang. Sihmanhsehlaw a zultu hna kha ka nung cang ti hmuhsak awk ah kan hngalh te lai bang in, Jesuh nih minung hmuh khawh mi pum kha aa rak i lak khawh.