NI HNA an liam lengmang bang in, Jesuh cu a zultu hna sin ah voi tampi a lang. Voikhat cu zultu 500 hrawng nih an hmuh. An sin i a langh lio ah Jesuh nih zei kong dah a chimh hna nan hngal maw? Pathian pennak kong. Jehovah nih Jesuh cu Pennak kong cawnpiak awk ah vawlei ah a run thlah mi a si. Cucaah thihnak in a thawh ṭhan hnu hmanh ah Jesuh nih hi kong cu a cawnpiak ko hna.

Pathian pennak cu zeidah a si nan hngal ti maw? A si, Pennak cu vancung i Pathian cozah taktak a si i, Jesuh cu siangpahrang ṭuan awk in Pathian thim mi a si. Kan cawn cang bang in, rawlṭammi a danghnak hna, mizaw a damhnak hna le mithi a thawhterṭhannak hna thawng in zeitluk khuaruahhar awk tlak siangpahrang dah a si te lai ti cu Jesuh nih a langhter cang!

Cucaah Jesuh nih vancung in kum thong khat chung siangpahrang in a uk tik ah, vawlei cu zei dah a lawh te lai? A si, vawlei dih lak cu aa dawh ngai mi paradis ah a cang te lai. Raldohnak sualnak, zawtnak le thihnak zong an um ti lai lo. Pathian nih vawlei cu minung nih a nuam an ti mi paradis si awk ah a ser caah, hi cu a hmaan hrimhrim ti kan hngalh. A hramthok i Eden dum a rak ser mi kha mah caah hin a si. Cun Pathian nih tuah si seh ti a duh mi cu a donghnak ah Jesuh nih a tlinter lai.

Atu cu Jesuh vancung a kirṭhannak can a phan cang. Ni 40 chung Jesuh cu a zultu hna sin ah a lang cang. Cucaah annih cu a nung ṭhan taktak ko ti kha fiang tein an zumh cang. Sihmanhsehlaw a zultu pawl kha a kaltak hna hlan ah: ‘Thiangthlarau nan hmuh hlan tiang Jerusalem ah rak um ko u,’ tiah a ti hna. Thiangthlarau cu Pathian a rian ṭuan ṭhawnnak, a hrang lengmang mi thli bantuk a si i, Pathian duhnak tuah awk ah amah zultu hna a bawmtu a si. A donghnak ah Jesuh nih: ‘Nannih cu vawlei a deng tiang in keimah kong kha nan chim lai,’ a ti hna.

Hi bia kha Jesuh nih a chim dih hnu ah khuaruahhar awk thil pakhat a cang. Hika i nan hmuh bantuk hin vancung ah kai hram a thok. Cu hnu ah minmei nih mit hmuh lo in a zelh i, zultu hna nih Jesuh cu an hmu ṭhan ti lo. Jesuh cu vancung ah a kai i, vawlei i amah hnu zultu hna kha vancung in cun uk awk hram a thok.