AW! AW! Zeidah kahin a cang? Vawlei i a it ko mi ngakchiapa cu fakpi in aa khong maw? Zoh hmanh! Inn chung in a hung chuak mi hna lak i pakhat cu Paul a si! Timote zong nan hmu maw? Hi ngakchiapa cu thlalangawng in maw a tlak?

A si, thlalangawng in a tlak mi a si. Troas khua ah Paul nih zultu hna kha phung a chim lio hna a si. A thaizing ah tilawng in khualtlawn aa thawh lai caah caan saupi tiang ka hmu kho ti hna lai lo ti kha a hngalh. Cucaah zanṭim tiang phung a chimh hna.

Mah lio ahcun hi ngakchiapa Zutikhas cu thlalangawng ah a ṭhu i, a ngu. Cucaah dot thum a sang mi hi thlalangawng in hin tanglei ah a tla! Cucaah mi hna cu an thin a phang ngaingai. Mi hna nih ngakchiapa cu an char tik ah, an thin a phan bang cun a thi taktak ko!

Paul nih ngakchiapa cu a thi ti a hngalh tik ah, a cung ah a bawk i, a kuhchih. Cun: ‘Nan thin phang hlah u. A ṭha ko cang!’ tiah a ti hna. A chim bang in a nung ṭhan taktak ko! Khuaruahhar awk ngai a si! Paul nih a nunter ṭhan! Mibupi cu an lung aa lawm tuk hringhran.

Cun cungdot ah an kai dih ṭhan i rawl an ei. Paul nih khuadei tiang phung cu a chimh hna. Sihmanhsehlaw Zutikhas cu a ngu ṭhan ti lai lo ti cu a fiang ko! Cuhnuah Paul, Timote le anmah he khual a tlawng mi vialte cu tilawng ah an kai dih. Khuazeiahdah an kal lai ti nan hngal maw?

Paul cu a voithumnak a phungchim khual tlawnnak kha a dih cang i inn ah a kir cang lai. Hi an khual tlawn lio ah hin Efesa khua lawng ah kum thum a cam. Cucaah a voi hnihnak a khual tlawn lio nak in a rau deuh.

Troas an chuahtak hnu ah lawng cu Melitas ah tlawmpal aa din. Cuka in cun Efesa cu meng tlawmpal lawng a hla. Cucaah an sin i hmanung bik bia a ruah khawh hna nak hnga, Paul nih Efesa i krifa upa hna kha Melitas ah ra hna seh tiah bia a cah hna. Khi hnu ah tilawng chuah caan a zat tik ah Paul a kal mi kha an hmuh i an ngaih a chia ngaingai!

Hmanung bik ah tilawng cu Sisaria ah a hung phan. Hika i zultu Filip inn ah a um lio ah, profet Agabas nih Paul cu ralrin a pek. Jerusalem a phanh tik ah Paul cu thong a tla te lai tiah a chim. A chim bantuk in a si taktak ko. Sisaria i thong-inn chung ah kum hnih a um hnu ah Paul cu Rom khua ah Rom ram uktu Sizarhmai ah a bia ceihpiak awk ah an kuat. Rom lei an kal lio ah lampi ah zeidah a cang ti zoh ṭhan hmanh u sih.