Khrih a thih hnuah, a hmasa Khrihfa hna lakah a hmaan lomi cawnpiaktu an hung chuak lai i Baibal biatak kha a hmaan loin mi an cawnpiak hna lai tiah Baibal nih a rak chimchung. (Lamkaltu 20:29, 30) Cutin a rak si taktak. Annih nih Jesuh cawnpiaknak le a hmaan lomi cawnpiaknak kha an cawh i a hmaan lomi biaknak an chuahter. (2 Timote 4:3, 4) Tuchan ah Baibal cawnpiakmi taktak kha a sullam a hmaan ning tein kan hngalhthiam tiah zeicah kan ti khawh?

Jehovah nih biatak a phuan caan a phan. ‘Donghnak caan ah, mi tampi nih ṭha tein an hlathlai lai i a hmaanmi hngalhnak a karh lai’ tiah Jehovah nih a rak chimchung. (Daniel 12:4, NW) 1870 ah, biatak a kawlmi phu hmete nih church cawnpiaknak tampi cu Baibal ah a um lomi a si ti kha an rak hngalh. Cucaah, Baibal cawnpiakmi taktak kha hngalhthiam awkah an rak kawl i an kawlnak ah Jehovah nih thluachuah a pek hna.

Lungthin ṭha a ngeimi hna nih Baibal kha ṭha tein an rak hlathlai. A lung a thomi Baibal Siangngakchia pawl (a hnuah Jehovah Tehte Hna tiah auhmi) nih an rak hmanmi Baibal hlathlai ning kha atu tiang kan hman ve. Baibal ah aa ṭialmi kong kha pakhat hnu pakhat in an rak i ruah. A sullam hngalh a harmi Baibal cang an hmuh tikah mah kha fianter awkah Baibal cang dang ah an kawl. Cun Baibal cang dangdang he aa tlak tiah biakhiahnak an tuah khawh hnuah mah kha an ṭial. Cuticun Baibal kha amah le amah an fianternak thawng in Pathian min le a Pennak, minung le vawlei ca i aa tinhmi, mithi kong le thawhṭhannak ruahchannak kong he aa tlaimi biatak kha an rak hmuh ṭhan. Cutin an kawl caah a hmaan lomi zumhnak le cawnpiaknak tampi in an rak luat.—Johan 8:31, 32.

1879 ah, Baibal Siangngakchia pawl nih mi sinah biatak chim caan a phan cang ti kha an rak hngalh. Cucaah mah kum thawk in, Jehovah Pennak Thanhnak Vennak Innsang mekazin kha an rak chuah i atu tiang an chuah rih. Atu ah, ram 240 leng ah holh phun 750 leng in Baibal biatak kha mi sinah kan chim. Biatak hngalhnak hi mah tlukin a karh bal lo.

• Khrih a thih hnuah, Baibal biatak cu zeitindah a rak um?

• Baibal biatak kha zeitindah an rak hmuh ṭhan?