Bethel timi cu Hebru holh a si i “Pathian inn” tinak a si. (Genesis 28:17, 19) Jehovah Tehte Hna nih phungchimnak rian kha lamhruai awk le zohkhenh awkah vawlei pumpi i an sakmi inn hna kha Bethel tiah ti cu aa tlak tukmi a si. Uktu Bu cu U.S.A., New York State ah a ummi zungpi ah rian an ṭuan. Mahka cun ram tampi ah a ummi bethel rianṭuannak kha an tlangtlak. Bethel inn ah rian a ṭuanmi hna kha Bethel innchungkhar tiah ti an si. Chungkhar pakhat bantukin lungrual tein hmunkhat ah an umṭi hna i rian an ṭuanṭi hna, rawl an eiṭi hna i Baibal an cawngṭi hna.—Salm 133:1.

Mah ca ṭhatnak hlaw in chungkhar pakhat bantuk in rian a ṭuanmi hna umnak hmun a si. Bethel inn ah a ummi Khrihfa pa le nu hna cu Pathian duhnak tuah awk le caantling in Pathian Pennak ṭhanchonak ca rianṭuan awkah aa pumpemi an si. (Matthai 6:33) Ahohmanh lahkhah an hmu lo, asinain umnak le ei awk cu pek an si i anmah pumpak herhmi caah tangka tlawmpal pek an si. Bethel ah a ummi paoh rian pek an si, a cheu cu zung ah an ṭuan i a cheu cu rawl an chuang. Cheukhat cu canamnak, thianhhlimhnak, thil suknak, thil remhnak asiloah a dang rian kha an ṭuan.

Phungchimnak rian bawmh awkah fakpi in rianṭuannak hmun a si. Bethel kip nih a bik in aa tinhmi cu mi tam khawh chung tam nih Baibal biatak hngal hna seh ti kha a si. Mah kha hi brochure zong nih a langhter. Mah brochure cu Uktu Bu lamhruainak in ṭialmi a si i vawlei pumpi ah a ummi holhlehnak phu tampi sinah computer in an kuat hna. An leh dih hnuah Bethel canamnak seh in rang taktak in an nam i Khrihfabu 110,000 leng ah an kuat hna. Bethel chungkhar nih a biapi bik a simi thawngṭha chimnak caah mah rian vialte kha an ṭuan.—Marka 13:10.

• Ahote dah Bethel ah rian a ṭuan, zeidah pek an si?

• Bethel kip nih a biapi bikmi zei rain caah dah an ṭuan?