Biakinn cu Baibal cawnpiakmi i ruahceihnak hmun a si i a bik in Jesuh nih phung a rak chimmi Pathian Pennak kong kha kan i ruahceih.—Luka 8:1.

A Hmaanmi Pathian biaknak caah sakmi a si. Biakinn cu Jehovah Tehte Hna nih mahle hmun i phungchimnak rianṭuannak caah sakmi a si. (Matthai 24:14) Biakinn cu design phunphun le a hmetngan a phunphun in sakmi a si nain a sawhsawhte in sakmi a si, biakinn tampi cu Khrihfabu pakhat leng nih an hman. Nai kum hna ah, thawngthanhtu le Khrihfabu a karh caah Biakinn thar thong tampi (buaktlak in nikhat ah panga) kan sak. Mah cu zeitindah a si khawh?—Matthai 19:26.

Biakinn saknak ca pekmi thawhlawm in sakmi a si. Mah thawhlawm cu Bethel zung ah kuat a si. Mah tangka kha Biakinn sak a duhmi asiloah remh a duhmi nih hman khawh a si.

Mah lungtho tein aa pemi miphun kip nih sakmi a si. Ram tampi ah, Biakinn Satu Phu dirh a si. Mah phu le mah lungtho tein aa pemi hna cu an ram chung i a ummi Khrihfabu pakhat in pakhat ah an i ṭhial, lam hlatpi i a ummi Khrihfabu zongah an kal, cun Biakinn an sakpiak hna lioah mahka ah a ummi unau pawl kha an bawmh hna. Ram cheukhat ah cun, Biakinn saknak le remhnak tlangtlak awkah mahle hmun i a ummi sining a tlinhmi unau pawl kha rian pek an si. Hmun kip ah a um i mah lungtho tein aa pemi, inn sak a thiammi unau pawl nih rian an ṭuan ko nain Biakinn saknak hmun poah ah a bik in cuka i a ummi unau pawl nih an bawmh hna. Biakinn tampi kan sak khawhnak cu Jehovah thiang thlarau le a mi hna nih thazaang dihlak chuah in an i zuamnak thawng in a si.—Salm 127:1; Kolose 3: 23.

• Kan i pumhnak hmun kha zeicah Biakinn tiah kan auh?

• Vawlei pumpi i a ummi kan Biakinn vialte zeitindah kan sak khawh?