Baibal na hngalhnak a ṭhancho nakhnga hlathlainak tuah na duh maw? Baibal ah a kong aa ṭialmi minung pakhat, hmun asiloah thil pakhat kong tamdeuh in hngalh na duh maw? Asiloah na lungre a theihnak kha Baibal nih a ka bawm kho hnga maw ti kha hngalh na duh maw? Na duh ahcun kan Biakinn i cauk chiahnak ah hlathlainak na tuah khawh.

Cuka ah hlathlainak ca bawmtu thilri a um. Jehovah Tehte Hna nih Baibal hrambunh in an chuahmi cauk vialte kha nan holh in na ngei dih men lai lo. Asinain Biakinn cauk chiahnak ah cun nai ah chuahmi cauk tampi a um. Holh phun tampi in lehmi Baibal, a ṭhami dictionary le cherhchanmi cauk dang zong a um. Pumh hlan le pumh dih hnuah na rel khawh. Biakinn cauk chiahnak i computer cu hman khawh a si ahcun Vennak Innsang Library kha an rawn men lai. Mah cu kan cauk tampi rawnmi electronic program pakhat a si i kawl na duhmi a kong pakhat, biafang asiloah Baibal cang kha fawi tein kawl khawh awkah tuahmi a si.

Nunning le Rianṭuannak i rian a ngeimi caah bawmtu a si. Na rian ca naa timhtuah tikah Biakinn cauk chiahnak kha ṭha tein na hman khawh. Nunning le Rianṭuannak tlangtlatu nih cauk chiahnak kha a tlangtlak i, hmanung bik chuahmi kan cauk pawl a tling maw, ṭha tein chiah a si maw ti kha a zoh. Amah asilole Baibal aan cawnpiaktu nih hngalh na duhmi a konglam zeitindah kawl khawh a si kha aan chimh lai. Asinain zei cauk hmanh cauk chiahnak in chuahpi awk a si lo. Chingchiahnak zong tuah awk a si lo, ṭha tein hman awk a si.

“Pathian hngalhnak” hmuh kan duh ahcun “thuhmi ro bantukin” kawl a hau tiah Baibal nih a ti. (Phungthlukbia 2:1-5) Cutin kawl awkah Biakinn cauk chiahnak nih aan bawmh khawh.

• Biakinn cauk chiahnak ah hlathlainak ca bawmtu a simi zei bantuk thilri dah a um?

• Cauk chiahnak kha ṭha tein hman awkah aho nih dah aan bawmh khawh?