Baibal ah khrihfabu caah rian a ṭuanmi pa phu hnih kong aa ṭial, mah cu ‘khrihfabu bawmtu hna le khrihfa upa hna’ kha an si. (Filipi 1:1, NW) Khrihfabu tamdeuh ah cun mah bantuk unaupa tampi an um. Khrihfabu bawmtu hna nih kan caah zei rian dah an ṭuan?

Khrihfa upa phu kha an bawmh hna. Khrihfabu bawmtu hna cu thlarau lungput a ngeimi, bochan awk a tlakmi le a rian ah a felmi an si i mino zong upa zong an i tel. Khrihfabu le biakinn ah a herhmi rian kha an ṭuan. Cucaah Khrihfa upa hna nih phungchimnak le tuukhalhnak rian ah an lungthin an pek khawh.

A herhmi rian kha an ṭuan. Khrihfabu bawmtu cheukhat cu aa pummi vialte conghlawmh awkah khuallawmtu rian pek an si. Cheukhat an rian cu sehtlaih, cauk phawt, Khrihfabu cazin chek le lohmun zohkhenhnak rian kha a si. Biakinn i a herhmi thil remh zong an bawmh hna. Khrihfa upa nih tar pawl bawmh zong an fial tawn hna. Annih cu zei rian pek an si hmanh ah lungtho tein an ṭuan caah Khrihfabu nih upat awk an si.—1 Timote 3:13.

Zohchunhawk ṭha an chiah. Khrihfabu bawmtu hna cu Khrihfa ziaza an ngeih caah thim an si. Pumhnak ah rian pek an simi an ṭuan tikah kan zumhnak an fehter. Phungchimnak ah zohchunhawk ṭha an simi nih kan lung an thawhter. Khrihfa upa he lungtho tein rian an ṭuanṭi caah lawmhnak le lungrualnak an chuahter. (Efesa 4:16) A caan a cut tikah annih zong Khrihfa upa si awkah sining an tlinh ko lai.

• Khrihfabu bawmtu hna cu zei bantuk minung dah an si?

• Khrihfabu rian ṭha tein ṭuan khawh awkah Khrihfabu bawmtu hna nih zeitindah an bawmh?