Kan si khawh chung in “phun kip, ram kip, holh kip le mi kip sin” ah “thawngṭha” chim khawh awkah kan cauk kha holh phun 750 leng in kan chuah. (Biathlam 14:6) Cutluk in a harmi rian cu zeitindah kan ṭuan khawh? Vawlei pumpi ah a ummi Jehovah Tehte caṭialtu hna le calettu phu hna bawmhnak thawng in kan ṭuan khawh.

A hmasa bik ah Mirang ca in an ṭial. Uktu Bu nih kan zungpi ah a ummi Caṭialnak Department i rianṭuannak kha an tlangtlak. Mah department nih kan zungpi le Bethel cheukhat ah rian a ṭuanmi caṭialtu pawl rianpeknak kha an tlangtlak. Hnulei sining aa dangmi caṭialtu tampi kan ngeih hna caah miphun zakip caah man a ngeimi kong kha an ṭial khawh, cucaah miphun tampi chung i mi hna nih kan cauk kha an duh.

Mah ca kha calettu hna sinah an kuat. An ṭialmi ca kha Uktu Bu nih an zoh ṭhan i a palhnak kha an remh dih hnuah, vawlei pumpi i a ummi calettu unau pawl sinah computer in an kuat hna, annih nih an leh, an check, an rel i an remh. Mirang ca i aa ṭialmi a sullam ning in leh khawh awkah a hmaanmi biafang kha thim an i zuam.—Phungchimtu 12:10.

Computer nih rian hma a kalter. Computer nih ca a ṭial kho lo i ca zong a let kho lo. Asinain, computer hmannak thawng in rian hma a kal deuh. Jehovah Tehte Hna nih Holh Phun Tampi In Ca Chuah Khawhnak Electronic System (MEPS) timi kha an tuah, mah System ah holh phun tampi a lut kho i ca nam awkah hmanthlak le ca a chuahter khawh.

Kan lehmi holh cheukhat cu mi thong tlawmte lawng nih an hman. Anmah hna holh i tel in holh phun tampi in zeicah mah tluk in ca leh awkah kan i zuam? Zeicah ti ahcun “mi vialte nih khamhnak hmu hna seh ti le biatak kha hngal hna seh” ti kha Jehovah nih a duh caah a si. —1 Timote 2:3, 4.

• Kan cauk pawl hi zeitindah ṭial a si?

• Kan cauk pawl hi zeicah holh phun tampi in kan leh?