Jehovah Tehte Hna nih leiser ral a tlun tikah harnak a tongmi kan unau hna kha kan bawmh colh hna. Mah nih pakhat le pakhat kan i daw taktak ti kha a langhter. (Johan 13:34, 35; 1 Johan 3:17, 18) Zeitindah kan bawmh hna?

Tangka in kan bawmh hna. Judea ram ah a fak ngaimi mangṭam a tlun tikah Antiok i a ummi Khrihfa hna nih Judea i a ummi Khrihfa hna kha tangka an kuat hna. (Lamkaltu 11:27-30) Cu bantukin, ram cheukhat ah kan unau pawl harnak an tong ti kan theih tikah an herhmi thilri bawmh awkah mahle hmun Khrihfabu in tangka kan kuat hna.—2 Korin 8:13-15.

Kan minung in kan bawmh hna. Leiser ral a tlunnak hmun i a ummi Khrihfa upa hna nih unau kip kha an kawl hna i himnak an hmuh nakhnga an bawmh hna. Unau pawl bawmhnak kawmiṭi nih rawl, din awk ti thiang, thilpuan, umnak le sii-ai pek awkah ṭha tein an timhtuah. A herhnak rian ah thiamnak a ngeimi Jehovah Tehte tampi cu a rawkmi inn le Biakinn kha remhpiak awkah anmah tangka tein an kal i an bawmh hna. Kannih cu a lung aa rualmi bupi kan si i hmun khat i rian kan ṭuanṭinak in kan hmuhmi hmuhtonnak nih a herh tikah a herh ningin bawmh awkah timhcia a kan siter. “Zumhnak lei i kan rualchan a simi hna” kha kan bawmh khun hna nain, a si thiam ahcun biaknak dangdang zong kan bawmh ve hna.—Galati 6:10.

Thlaraulei le lungthinlei kan bawmh hna. A hlei in, leiser ral a tongmi hna cu hnemh an herh. Cu bantuk caan ah, “zeizong vialte ah a kan bawmtu Pathian” Jehovah sin in thazaang kan hmu. (2 Korin 1:3, 4) Ruahchannak a ngei lomi hna kha Pathian Pennak nih a rauh hlan ah lungfahnak le sifah harnak a chuahtermi thil vialte kha a donghter dih cang lai timi Baibal biakam kha lungtho tein kan chimh hna.—Biathlam 21:4.

• Leiser ral a tongmi hna kha Jehovah Tehte Hna nih zeicah kan bawmh khawh colh hna?

• Leiser ral in a luatmi hna kha Baibal in zeitindah thazaang kan pek khawh hna?