Theocratic fimcawnnak cu Jehovah Tehte Hna i an hmelchunhnak a si. Pennak kong chim awkah caantling in an pum aa pemi hmaikal hna caah ‘phungchim rian an liim khawh nakhnga’ a hleiin timhpiakmi hmaikal tinṭan a um.—2 Timote 4:5.

Hmaikal Tinṭan. Hmaanhmaan hmaikal a ṭuannak kumkhat a si cangmi unau pawl cu an pawngkiang ah a ummi Biakinn ah niruk chung tuah dingmi tinṭan ah i tel ve dingin an min khumh a si. Mah tinṭan i aa tinhnak cu hmaikal pawl Jehovah Pathian he an i naih khawh nakhnga, an hmuhmi phungchimnak rian vialte kha hmual ngei tein an chim khawh nakhnga le zumhfek tein rian an ṭuan peng khawh nakhnga bawmh hna awk caah a si

Pennak Kong a Chimtu Hna caah Tinṭan. Mah thla hnih chung kai dingin timhpiakmi tinṭan cu hmuhtonnak a ngeimi hmaikal hna nih lungtho tein an umnak hmun kha kaltak in a herh deuhnak hmun ah rian an ṭuan khawh nakhnga caah a si. Cuticun annih nih vawleicung i Phung a chim balmi lakah a ngan bikmi Jesuh Khrih kha i zohchunh in hitin an chim khawh ve: “Keimah ka kal lai! Ka thlah tuah.” (Isaiah 6:8; Johan 7:29) Cutin hmun dang ah i ṭhial in nunning sawhsawh tein an nun khawh nakhnga thlennawnnak an tuah a hau. An va umnak hmun i nunphung, khuacaan le eidin hna cu a hmasa an umnak hmun he aa dang kho men. Cun holh thar cawn zong a hau kho men. Mah tinṭan nih nungak, tlangval hna le nuva hna kha Jehovah le a bupi thawngin an rianṭuannak ah a herhmi thlaraulei sining an tlinh nakhnga le an thiamnak kha tam deuh in an hman khawh nakhnga a bawmh hna lai. Mah tinṭan ah kum 23 in 65 tiang kai khawh a si.

Vennak Innsang Baibal Gilead Tinṭan. Hebreu holh ah “Gilead” timi cu “Tehte Tampi” tinak a si. 1943 in Gilead tinṭan cu thawk a si i mah thawk in tinṭan a kaimi cu 8,000 leng an si i annih cu missionary in “vawleicung dihlak” ah thlah an si caah tehte tampi kha an hmuh khawh hna. (Lamkaltu 13:47) Peru ah mah tinṭan a kaimi pawl an phanhka ah cun Khrihfabu a rak um lo, asinain atu cu 1,000 leng a um cang. Japan ah missionary pawl an phanhka ah cun Jehovah Tehte 10 hmanh an rak um lo nain, atu ah cun 200,000 leng an um cang. Mah thla nga chung an kaimi Gilead tinṭan ah Pathian Bia, Baibal kha ṭha tein hlathlainak aa tel. Caantling hmaikal a ṭuanmi, missionary rian a ṭuanmi, zung ṭengnge ah a ummi le peng zohkhenhtu hna kha zumhfek tein an um khawh nakhnga le vawlei pumpi rianṭuannak ah thazaang an ngeih khawh nakhnga bawmh dingin mah tinṭan kai awkah sawm an si.

• Zei timhnak he dah Hmaikal Hna caah Tinṭan tuah a si?

• Pennak Kong a Chimtu Hna caah Tinṭan cu ahote caah dah timhpiakmi a si?