Jesuh nih a thih lai ah hitin a rak chim: “Miphun vialte hna ca i tehte si awkah Vancung Pennak kong Thawngṭha hi khuazakip ah chim a si lai, cun cu hnu lawngah cun donghnak cu a si lai!” (Matthai 24:14) Asinain vawlei pumpi phungchimnak rian cu zeitindah kan liim khawh lai? Jesuh nih vawleicung a um lio i a tuahmi kan i zohchunhnak thawng in kan liim khawh lai.—Luka 8:1.

Mi sin phungchim khawh awkah an inn ah kan kal. Jesuh nih a zultu hna kha innkhat hnu innkhat ah thawngṭha chim ning a rak cawnpiak hna. (Matthai 10:11-13; Lamkaltu 5:42; 20:20) Kumzabu pakhatnak i phungchimtu hna caah phungchimnak hmun kha a rak khiahpiak hna. (Matthai 10:5, 6; 2 Korin 10:13) Tuchan zong ah, phungchimnak rian cu ṭha tein timhtuah a si i, Khrihfabu kip phungchimnak hmun pek kan si. Cuticun Jesuh nih a kan fialmi ‘mi sin thawngṭha chimnak le tehte khaannak’ rian kha kan liim khawh.—Lamkaltu 10:42.

Mi an umnak hmun paoh ah phungchim kan i zuam. Jesuh nih rili kam le zapi hmanmi tikhor ti bantuk mi an tamnak hmun ah phung a chimnak zong in zohchunhawk ṭha a chiah. (Marka 4:1; Johan 4:5-15) Kannih zong telephone in asiloah lam cung, rianṭuannak hmun, pangpar dum ti bantuk khoika hmun paoh ah Baibal kong kha kan chim. Caanṭha kan hmuh fate innpa, rianṭuan hawi, sianginn kai hawi le kan rualchan sin zongah phung kan chim. Cutin kan i zuamnak thawng in vawlei pumpi i a ummi mi nuai tampi nih “khamhnak thawngṭha” kha an theih khawh.—Salm 96:2.

Nang tah Pathian Pennak kong thawngṭha le mah nih zeidah a tuah lai timi kong kha na chungkhar asiloah na theihhngalh pakhatkhat na chim kho hna lai maw? Mah thawngṭha kha nangmah ca lawng ah i chiah hlah. A rannak in chim hna!

• Zei “thawngṭha” dah kan chim awk a si?

• Jehovah Tehte Hna nih Jesuh phungchim ning kha zeitindah an i zohchunh?