Mah hna hi zeicah hi tluk in an i nuamh? Kan civui pakhat ah an i pumh caah a si. Hlanlio Pathian salle cu kumkhat ah voithum i pumh awkah fial an rak si. Kannih zong civui kan tuah ve i mah civui ah i pumh kha kan i ngaih. (Deuteronomi 16:16) Kumkhat ah civui pathum kan tuah: peng civui kha nikhat kan tuah i kum khat ah voihnih kan tuah, cun pengkomh civui kha nithum kan tuah. Mah civui hna in zei ṭhatnak dah kan hmuh?

Mah nih Khrihfa unau dawtnak a fehter. Israel mi hna cu “pumhnak” i Jehovah an thangṭhat tikah an rak i nuamh bantukin, kannih zong civui ah Jehovah kha hmunkhat ah kan biakṭi tikah kan i nuam ve. (Salm 26:12; 111:1) Civui nih Khrihfabu dang le ramdang i a ummi zumtu unau hna he i tonnak le i hawikomhnak caanṭha a kan pek. Chun dinhcaan ah, civui tuahnak i rawl kan eiṭi hnanak zong nih i hawikomhnak caanṭha a kan pek. (Lamkaltu 2:42) Civui ah vawlei pumpi kan “unau” pawl an lung a rualtermi dawtnak kha kan hmuh.—1 Piter 2:17.

Mah nih thlaraulei ṭhancho awk a kan bawmh. Israel mi hna cu Baibal an fiantermi ‘a sullam an hngalhmi’ zong in ṭhatnak an hmu. (Nehemiah 8:8, 12) Kannih zong civui ah kan theihmi Baibal lamhruainak kha kan sunsak ve. Phung an chimmi paoh Baibal ah hram aa bunhmi a si. Lung a thawhtermi phungchimnak, aa tlaimi phungchimnak le hmuhsaknak nih kan nunnak ah Pathian duhnak zeitindah tuah khawh a si ti kha a kan hngalhter. Hi harnak caan ah unau pawl nih an tonmi harnak an tei khawhmi hmuhtonnak kan theih tikah thazaang tampi kan hmu. Pengkomh civui ah, hlanlio thilpuan in an piahmi drama nih Baibal ah aa ṭialmi kha kan caah a taktak a siter i fimnak tampi a kan pek. Pathian sinah an i pumpeknak langhter a duhmi hna caah civui kip ah tipil innak program a um.

• Zeicah civui ah kan i nuamh?

• Civui ah naa pumh ahcun zei ṭhatnak dah na hmuh lai?